Mkalukungone Mwamba
JF-Expert Member
- Aug 29, 2022
- 3,127
- 7,185
Mpelelezi wa kesi inayomkabili daktari wa binadamu, Conrad Kahyoza, ameiambia Mahakama ya Wilaya ya Kinondoni kuwa mshtakiwa huyo alikiri kumshambulia askari wa Usalama Barabarani, F.8886 Sajenti Andrew, katika mahojiano ya polisi.
Koplo Samwel wa Kituo cha Polisi Oysterbay, ambaye ni shahidi wa tano katika kesi hiyo, ametoa ushahidi huo Jumatano, Oktoba 28, 2026, mbele ya Hakimu Mfawidhi, Jacqueline Rugemalira. Amesema alianza uchunguzi baada ya kupokea jalada la kesi kutoka kwa Mkuu wa Upelelezi.
Amedai baada ya kumjulisha Kahyoza kosa analotuhumiwa, haki zake na kumwonya kuwa maelezo yake yanaweza kutumika kama ushahidi, daktari huyo alikubali kutoa maelezo bila wakili, akakiri kosa na kusaini baada ya kuyasoma.
Hata hivyo, mpelelezi huyo amesema hakuwasilisha maelezo hayo mahakamani kama kielelezo cha ushahidi.
Kwa mujibu wa mpelelezi huyo, tukio lilitokea Septemba 8, 2026, saa 1:30 asubuhi, Barabara ya Bagamoyo, eneo la Makongo, Dar es Salaam. Amesema Kahyoza anadaiwa kukaidi amri ya Sajenti Andrew ya kusimamisha gari, na askari alipokwenda kumdhibiti kwa kuchomoa funguo za gari, daktari huyo akaanza kumshambulia.
Wakati wa maswali ya wakili wa utetezi, Yohana Kibingu, mpelelezi huyo hakuwa na jibu alipoulizwa kwa nini hakuwasilisha maelezo hayo mahakamani. Upande wa mashtaka umesema una mashahidi wengine watatu, na kesi imeahirishwa hadi Novemba 10, 2026.
Soma Pia:
Kahyoza, anayefanya kazi Hospitali ya Taifa Muhimbili (MNH)-Mloganzila, anakabiliwa na shtaka chini ya kifungu cha 243(d) cha Sheria ya Kanuni ya Adhabu, Rekebu ya 2023, na yuko nje kwa dhamana inayoendelea.
