WATANZANIA TUWE MACHO
Jumatatu, 25 Febr, 2019
Nimemsikiliza Dk. Suleiman Kisango Mkurugenzi wa Sera za Uchumi na Utafiti wa Benki Kuu ya Tanzania akieleza sababu za kuanguka kwa thamani ya shilingi dhidi ya dola ya Marekani ambapo katika siku za karibuni Dola moja ya Marekani imebadilishwa kwa hadi shilingi 2,415 za Tanzania. Hiki ni kiwango kikubwa kuwahi kutokea.
Moja ya sababu zilizotajwa kusababisha kuanguka kwa shilingi yetu ni maneno yanayosemwa na wanasiasa yanayoashiria kuwa Tanzania kuna hali mbaya inayochagizwa na mauaji ya watu yanayofanywa na Serikali, kuanguka kwa uchumi, unyanyasaji mkubwa dhidi ya wawekezaji, utawala wa kidikteta nakadhalika.
Kama kweli hii ni sababu muhimu kuna kila sababu za sisi Watanzania kujiuliza kama wanaomwaga sumu hii wanatusaidia ama wanatuangamiza?
Wanasiasa wa upinzania akina Tundu Lissu na Zitto Kabwe ambao kwa sasa wameacha majukuku yao ya kuhudumia wananchi na badala yake wanafanya kampeni ya kumwaga sumu dhidi ya Rais Magufuli na kuichafua nchi. Bila shaka wanahusika na kuanguka kwa thamani ya shilingi yetu.
Na ndio hao hao wanapoona mbao za viwango vya kubadilisha fedha zinaonesha kuanguka kwa shilingi wanashangilia na kupanga ziara za kupita kwa mabeberu kutangaza mafanikio ya kampeni yao ya kuidhohofisha Serikali ya Tanzania.
Halafu wanaongea upuuzi kabisa kuwa wao hawaichafui nchi bali wanashughulika na Serikali iliyopo madarakani. Swali dogo tu anayehudumia wananchi ni nchi au ni Serikali iliyopo madarakani?
Kama kweli tunakubaliana na hoja kwamba Rais ni kioo cha nchi, hivi kioo cha nchi kikichafuka nchi itakuwa salama?
Ndio maana nasema Watanzania tuwe macho, hawa watu wanaofanya kampeni hizi leo tupo baadhi tunawashangilia lakini ipo siku tutalia na wakati huo tutakuwa tumefikia mahali ambapo ni pagumu zaidi.
Naipongeza Serikali kwa jinsi inavyochukua hatua dhidi ya wanasiasa wanaotaka kuvuruga nchi, wanaodhani wanashika madaraka kwa kuharibu nchi. Kwenye suala la kulinda maslahi ya nchi hatupaswi kucheka na nyani.
Navipongeza vyombo vya dola kwa hatua vinazochukua dhidi ya wavunja sheria. Waendelee kufikishwa kwenye vyombo vya kisheria na wakikutwa na hatia wapate adhabu.
Na sisi Watanzania tuwakatae watu hawa na kampeni yao chafu dhidi ya nchi yetu. Leo hii shilingi inaanguka kwa namna yoyote bei ya bidhaa inapanda mwisho wa siku mnunuzi wa bidhaa ambaye ni mtanzania wa kawaida ndio anayeumia.
Nawapongeza Watanzania ambao wamekuwa wakiwapinga wanasiasa hawa wanaofanya kampeni ya kuichafua nchi yetu na Rais wetu. Maana kila Zitto Kabwe anapoweka upuuzi wake kwenye mitandao ya kijamii au anapofanya mahojiano kama aliyoyafanya juzi na Sudi Mlete wa DW wapo wengi waliompinga kwa kumueleza ukwei kuwa anatumiwa na mabeberu kumiuliza Tanzania. Halikadhalika wapo ambao wameendelea kumshambulia Tundu Lissu kila kampeni yake inaporushwa kwenye mitandao ya kijamii. Huku ndio kujitambua kwenyewe.
Nawapongeza waandishi wa habari ambao wamekataa kuwa njia ya kueneza upuuzi wa akina Zitto Kabwe na wenzao. Ukiangalia kwa umakini utagundua ni vyombo vya habari vya nje ya nchi tu ndivyo vinatumiwa na wanasiasa.
Nilikuwa namuangalia Sudi Mlete akimhoji Zitto Kabwe na Zitto akawa anadanganya eti Serikali ya Tanzania ina mpango wa kutia saini Mkataba wa kinyonyaji na Jumuiya ya Ulaya uitwao EPA na kwamba yeye na wenzake wanapinga, wakati ukwei ni kwamba Serikali ya Tanzania ndio iliyokataa kutia saini mkataba huo wakati Kenya imekubali na Rwanda imeonesha kuwa tayari kutia saini. Na kwamba hadi sasa Umoja wa Ulaya umekasirishwa na kitendo cha Tanzania kukataa kutia saini mkataba huo ambao una madhara kwa mpango wa ujenzi wa viwanda.
Mwisho nawaomba Watanzania tuendelee kuwa macho na wanasiasa hawa ambao wakati nchi yetu inapambana kuingia katika uchumi wa kati, uchumi wa viwanda kwa kuhakikisha tunalinda rasilimali zetu, tunakomesha rushwa, tunakusanya kodi, tunahimizana kuzalisha mali kwa wingi na tunadhibiti matumizi ya hovyo, wao wanatukwamisha.
Nawatakia Jumatatu njema.
Joshua Salitoni
Dar es Salaam
Sent using
Jamii Forums mobile app
