Baada ya kuelezea 'scenario' ya jana rafiki yangu mmoja amenitafuta. Ni rafiki yangu wa muda mrefu, lakini sikuwahi kujua sana kuhusu upande wa pili wa maisha yake.
Yeye ni firstborn kwenye familia. Baba yake alifariki akiwa kidato cha 3, hivyo alipomaliza kidato cha 4 aliamua kusomea ualimu (grade III) ili asaidie wadogo zake. Pamoja na kufaulu vizuri lakini kwenda form five angeshindwa kulea wadogo zake.
Akasomea ualimu na kuhitimu. Akapangiwa shule ya kufundisha mkoani Arusha. Akaweza kujikimu na kusaidia wadogo zake kusoma. Baadae akaamua kujiendeleza kidato cha 5&6 kama Private Candidate. Akafanya mtihani na kupata division 2 ya points 10. Yani alama moja tu apatae division 1.
Akapata udahili chuo kikuu. Akaomba ruhusa kwa mwajiri wake akapewa. Akasoma shahada ya kwanza ya ualimu. Enzi hizo walimu wa shahada hawakua wengi kama sasa. Lakini aliporudi kwa mwajiri (DED) hakumpandisha daraja wala kumuongezea mshahara. Akaendelea kufundisha shule ya msingi na degree yake, kwa mshahara uleule wa mwalimu wa certificate.
Hakuvunjika moyo. Baada ya muda akajiunga tena chuo kikuu kusoma shahada ya uzamili ya usimamizi wa elimu (Master of Education - Planing &Administration). Akahitimu kwa ufaulu mzuri. Akarudi kwa mwajiri lakini hakumuongezea mshahara wala kumbadilisha daraja.
Wakati huo mambo ya uhakiki yalikua yakiendelea. Uhakiki ukamalizika lakini hakupandishwa daraja wala kuongezewa mshahara. Akaendelea kufundisha shule ya msingi kwa mshahara uleule wa "certificate" bila kujali elimu yake ya "masters degree"
Baadae akapata ufadhili chuo kimoja nje nchi, kusoma Stashahada ya uzamili ya Elimu maalumu (Postgraduate Diploma in Special Education). Akapewa ruhusa ya kwenda kusoma. Akahitimu na kurudi kwa mwajiri wake. Akarudishwa kulekule shule ya msingi, bila kubadilishwa daraja wala kuongezewa mshahara.
Kwahiyo nchi hii ina mwalimu wa shule ya msingi mwenye Certificate ya Ualimu, Bachelor Degree ya Ualimu, PGD ya elimu maalumu na Masters Degree ya usimamizi wa Elimu. Lakini serikali imeamua kumtumia kuimba "mabata madogo madogo" na watoto wa darasa la 3B. Just imagine.!
Halafu akipata kazi nje ya nchi mnasema si mzalendo. Au akipata kazi sekta binafsi akaondoka serikalini mnasema amekimbia sababu ya maslahi, mnaagiza akamatwe na huko alikoenda hiyo taasisi ifungiwe. Hivi serikali ikoje? Yani nyie mmeshindwa kumtumia na hamtaki wengine wamtumie. Roho ya kichawi hii.!
Mtu kama huyu alitakiwa awe mahali ambapo ataweza kutumia elimu, uzoefu na vipawa vyake kwa manufaa ya taifa, sio kufundisha MAGAZIJUTO darasa la 3B. Lakini amehangaika sana kupandishwa daraja bila mafanikio. Mbaya zaidi analipwa mshahara uleule kama mwalimu mwenye certificate.
Kinachoumiza zaidi ni analipwa mshahara wa cerificate halafu HESLB wanamkata 18% ya mshahara huo kufidia mkopo waliompa wakati akisoma Degree, wakati degree yenyewe haijamsaidia. Mlipeni basi mshahara wa degree ili mkimkata mkopo kuwe na logic. Sio mnamlipa mshahara wa certificate halafu manamkata mkoko wa degree. Ilogical.!
Naomba Mhe.Silinde Ernest David ulione hili na kulifanyia kazi ukiwa kama Naibu Waziri mwenye dhamana. Hali hii inavunja sana moyo watumishi. Mchukueni kijana huyu mtafutie mahali panapomfaa kulingana na elimu na uzoefu wake.
Kama mlikua hamtaki kutumia elimu yake kwanini mlikua mnampa ruhusa ya kwenda kusoma? Mmempa na mkopo ambao anateseka kuulipa lakini elimu aliyochukulia mkopo hamtaki kuitumia. Jamaa yuko very frustruted, kwa sababu ana familia inamtegemea na kipato hakitoshelezi. Tumuombee asije kufanya maamuzi magumu kama yule wa Pugu.
Mwalimu mwenye uzoefu wa miaka zaidi ya 15, msomi Cert, BA, MA, PGD mmeshindwa kabisa kumtumia kwa tija? Mpelekeni basi hata vyuo vya kati akafundishe, na mumlipe kwa hadhi ya elimu yake. Kumuacha shule ya msingi ni matumizi mabaya ya rasilimali, na kuendelea kumlipa mshahara wa Certificate ni UONEVU usiovumilika. Si ajabu amewazidi hata "maboss" zake elimu na uzoefu.
Tafadhali lifanyie kazi hili litakupa heshima wewe na serikali yenu. Weka alama kwenye maisha ya huyu Mwalimu. Wasiliana nami kwa maelezo zaidi. Namba yangu ni ileile, naamini ulipohama 'chama' hukuifuta.!
Malisa GJ