Mfumo mpya unachelewesha mishahara.

MKURUGENZI wa Manispaa ya
Kinondoni, Fotnatus Fwema,
amesema kuwa ucheleweshaji
wa mishahara ya watumishi
wake umesababishwa na
mfumo mpya wa serikali
katika ulipaji.
Fwema alisema hayo baada
ya watumishi wa halmashauri
hiyo kulalamika kuwa
hawalipwi mishahara yao kwa
wakati.
Alisema tatizo hilo
halijawakumba wao tu, bali
limeikumba nchi nzima baada
ya serikali kuweka mkakati
huo wa kuweka mfumo mpya
wa ulipaji.
Akizungumzia suala la
walimu, Fwema alisema
ametoa barua yenye
Kumbukumbu namba KMC/ED/
PF/ iliyokuwa na kusudio la
kuwachukulia hatua za
kinidhamu kwa kushiriki
mgomo kwa kutofika katika
kituo cha kazi.
“Nakiri kutoa onyo kwa
walimu kupitia barua hiyo,
nilitoa siku saba tangu
mwanzoni mwa mwezi huu,
lakini sitoweza tena
kuwachukulia hatua kutokana
na mgomo huo kumalizika
kwa amani,” alisema.
Awali watendaji wa
halmashauri hiyo walisema
kuwa kitendo cha
ucheleweshwaji wa
mishahara katika manispaa
hiyo ni cha kawaida, tokea
mwanzoni mwa mwaka huu
hali inayozorotesha utendaji
wao wa kazi.
Pia walisema kuwa hawapewi
fedha kwa ajili ya saa za
ziada wanazokuwa kazini,
ama wanapokuwa nje ya
kituo kikazi hali
inayowafanya wajigharamie
wenyewe.