Maparasaiti

[OleWako]

Katika vilindi vya ngozi, chini ya vazi la nyama na damu, mwili wa binadamu unakuwa uwanja wa mashindano yasiyoonekana kwa macho ya kawaida. Uwanja huu wa ajabu huvutia wavamizi wa aina moja - maparasaiti -ambao wote wana lengo moja kuu: damu, chanzo kikuu cha uhai kinachozunguka kupitia mishipa ya mwili.


Miongoni mwa wavamizi hawa, yapo makundi manne makuu yanayoshindana katika mbinu na muda wa uvamizi wao:

Chawa (Lice)​

Wadudu hawa wadogo hukaa kwenye nywele za kichwa na mara nyingine kwenye maeneo ya siri ya binadamu. Harufu ya damu pekee huwafanya waanze safari ya kusambaa kwa kasi ya kushangaza. Kwa ujanja wa hali ya juu, hujifanya kuwa sehemu ya mazingira yao ya kuishi - akili ya kichwa na nguvu ya viungo - lakini ukweli ni kuwa wao ni wavamizi tu, wasio na mchango wowote kwa mwenyeji wao.

Kupe (Ticks)​

Arachnidi hawa wadogo huonekana kwa msimu maalum. Wakiambatana na mazingira yenye majani, hujishikiza kwa nguvu kwenye ngozi ya binadamu. Wananyonya damu kwa muda, miili yao ikinenepa mara nyingi zaidi ya ukubwa wao wa awali. Msimu wao huisha mara nyingi kufikia Oktoba - wakishajaza matumbo yao, huondoka kimya kimya, wakiacha alama zao.

Kunguni (Bed Bugs)​

Wataalamu wa kujenga makazi na kuanzisha familia zao ndani ya nyumba ya binadamu. Wakiwa na mpangilio wa kipekee, hunyonya damu kwa mstari kana kwamba wanafuata mfumo fulani. Mara wanapohamia, kuwatimua si kazi rahisi.

Mbu (Mosquitoes)​

Wenye mabawa na uwezo wa kuruka, mbu huingia uwanjani kwa kificho cha giza. Wakija kutoka maeneo ya mbali, hujipenyeza kwa ustadi, wakajaza matumbo yao kwa damu kisha kutoweka haraka, kabla mwenye uwanja - binadamu - hajagundua kuwa tayari ameporwa rasilimali yake kuu.


Lakini usidanganyike. Makundi haya hayashirikiani kama timu kwenye mechi ya mpira. La hasha. Wanashindana, na mara nyingine hata kuangamizana wao kwa wao, kwa ajili ya nafasi na damu.

Uwepo wao hautambuliki tu kwa macho, bali pia kwa muasho, uvimbe, na mara nyingine maradhi hatari:

• Chawa huweza kuleta homa ya typhus, ugonjwa unaoweza kuchanganya hata akili ya binadamu.
• Kupe husambaza ugonjwa wa Lyme, unaoshambulia mfumo wa fahamu hadi kuzimika kwa ubongo.
• Kunguni huweza kusababisha mzio (allergies) unaosababisha kero na kuwashwa.
• Mbu ni wapitishaji wa malaria, ugonjwa unaodhoofisha mwili mzima kwa kasi ya kutisha.

Mashindano haya yana matokeo mabaya kwa uwanja wenyewe – mwili wa binadamu.

Ni jukumu la binadamu kutowaruhusu hawa wavamizi kushinda. Kuwatambua mapema, kuwazuia kwa njia za kinga kama chanjo, na kuchukua hatua madhubuti pale wanapojitokeza ni njia pekee ya kulinda uwanja huu wa thamani.

Hakuna nafasi ya kujadiliana na wanaonusurika wakila msingi wa uhai wa wengine.