real G
JF-Expert Member
- Feb 7, 2013
- 5,227
- 5,303
Mafundi wa Kampuni ya Patty Interplan, wakifunga vyuma maalumu kuzunguka jengo lenye urefu wa ghorofa 16 lililopo katika Mtaa wa Indira Gandhi Dar es Salaam jana. Picha na Venance Nestory
Kwa ufupi
Ubomoaji utakamilika kwa kipindi cha miezi mitatu
Dar es Salaam,
Jengo la ghorofa 16 lililopo Mtaa wa Indira Gandhi, wilayani Ilala limezungushiwa nguzo ili kurahisisha kazi ya ubomoaji inayoanza leo.
Wafanyakazi wa Kampuni ya Patty Interplan iliyopewa kazi hiyo kwa gharama ya Sh1 bilioni, jana walionekana wakizungusha nguzo hizo.
Mwezi uliopita, Waziri wa Ardhi, Nyumba na Maendeleo ya Makazi, William Lukuvi alitoa siku 18 kwa uongozi wa Manispaa ya Ilala kubomoa jengo hilo.
Mkurugenzi wa Manispaa ya Ilala, Isaya Mngulumi alisema kazi hiyo imeshaanza na inatarajia kukamilika katika kipindi cha miezi mitatu.
“Kufunga nguzo ni maandalizi lakini kazi ya kubomoa itaanza kesho (leo) ili kutekeleza agizo la Waziri Lukuvi na tumejipanga kuikamilisha bila kuleta madhara kwa binadamu.
“Tunataka kazi hii ifanyike haraka hata kabla ya miezi mitatu ikiwezekana iwe imekamilika kwa sababu kuna baadhi ya majirani wa eneo hili wamelazimika kuhama makazi yao,” alisema.
Mngulumi alisema gharama za ubomoaji zitalipwa na mmiliki wa jengo hilo ambaye ni Ali Raza Investment.
Naibu Meya wa Manispaa ya Ilala, Omar Kumbilamoto alisema jengo hilo lilikuwa hatarishi kwani lipo kwenye eneo lenye shughuli nyingi za kibiashara.
“Mtaa wa Indira Gandhi na Morogoro una watu wengi hivyo ghorofa likiwa limejengwa chini ya kiwango linaleta wasiwasi kwa wapitanjia,” alisema Kumbilamoto.
“Unajua wakati wa kubomoa hatari yoyote inaweza kutokea hivyo familia nyingi zimehama kwa ajili kujiepusha na maafa ambayo yanaweza kutokea,” alisema mmoja wa wafanyabiashara katika eneo hilo.
CHANZO: Mwananchi
