Mbunge wa Kigoma Kusini David Kafulila anapewa award na taasisi ya HUMAN RIGHTS DEFENDERS kwa kazi ya escrow.
Mgeni rasmi ni balozi wa Jumuiya ya ulaya. Shughuli hiyo itafanyika asubuhi hii katika ukumbi wa Blue Pearl Ubungo Plaza.
Akihutubia huko Muhambwe Kigoma juzi David Kafulila alilaani wanasiasa wanaotaka kudandia hoja ya Escrow ili kujipatia umaarufu huku wakiwa hawana hadhi yoyote kuzungumzia hoja hiyo.
Kafulila pia aliwataka wananchi kuhakikisha wanachagua wagombea wote wanaotokana na UKAWA kwenye uchaguzi mkuu ujao.
===
Wakuu hapa nawawekea kwa kifupi kile ambacho kilikuwa kinaendelea katika hili tukio......Watetezi wa Haki za Binadamu nchini, leo wameazimisha "Siku ya Watetezi wa Haki za Binadamu" ambapo katika Siku hii pia Mtandao wa THRDC wamemkabidhi Mbunge wa Kigoma Kusini (NCCR-Mageuzi) ngao ya heshima baada ya kuonyesha jitihada binafsi za kutetea sakata la Escrow.
Ernest Sungura, Mkurugenzi wa Mfuko wa Vyombo vya Habari Tanzania, (TMF) amesema katika kuelekea katika uchaguzi mkuu, wanahabari wanatakiwa kulindwa na vyombo vinavyoweza kudhamiria kuwakingia kifua kutokana na wao kuandika habari za uchunguzi ambazo mara kwa mara zimeonekana kugusa maslahi ya watu mbalimbali moja kwa moja.
Wawakilishi kutoka nchi za Umoja wa Ulaya nchini, na Washauri wa Masuala ya Haki za Binadamukatika nchi za Umoja wa Mataifa wameeleza kuwa, kama Serikali haithamini haki za mtu moja moja ipo hatari kubwa ya kupoteza nguvu kazi ya taifa kwa jambo ambalo lingeweza kutatuliwa kwa njia rahisi.
Balozi wa Jumuiya ya Ulaya chini, Filberto Sebrregondi, amesema umefika wakati wa kila mwananchi kutambua kuwa wimbi la kuminywa haki za watu wasio na uwezo lin akuwa kwa kasi nchini, licha ya kubainisha kwamba amefurahishwa kwa namna washiriki walivyoonyesha ushirikiano kwa mwamvuli wa mitandao hiyo ya kutetea haki za binadamu.
Mkurugenzi Mtendaji wa Kituo cha Sheria na Haki za Binadamu (LHRC), Dk.Helen Kijo-Bisimba, akiongea katika maadhimisho hayo, alisisitiza kwamba haki za binadamu ndizo zinazowafanya wanadamu waishi na kwamba mtu yeyote asipofanya utetezi wa haki za binadamu…anataka ubinadamu wa wengine uishie njia panda.
Mratibu wa THRDC, Onesmo Ole Ngurumwa, akiongea mara baada ya ufunguzi wa siku hiyo, alisema maaadhimisho haya ni ya pili kufanyika Tanzania ambapo kwa mara ya kwanza yalifanyika mwaka 2013.
Ametaka siku hii itambuliwe kimataifa na isiwe nchini tu, huku akisisitiza kwamba wanaofanya utetezi huo waangalie usalama wao katika harakati za kupigania haki za wengine.
Maadhimisho hayo yameenda sambamba na maonyesho ya watetezi hao, ambapo hao ikiwemo Kampuni ya Jami Media (Wamiliki wa mitandao maarufu ya kijamii nchini ya FikraPevu.com na JamiiForums, TGNP Mtandao, TAMWA, LHRC, HAKI ARDHI INSTITUTE, JUKWAA LA KATIBA, TAWLA, SIKIKA, ZLSC, TAS, TACOSODE, TANLAP, LEAT,Human Rights Comission, TVVA, Haki Catalyst, German Foundation, German Embasy,SANA, na CESOPE.
Waliotukukiwa tuzo
Watetezi waliotambulika na kupewa zawadi ya kuwa watetezi bora wa mwaka 2014 kutokana na mazingira hatarishi waliyofanyia utetezi wao ni David Kafulila aliyepokea tuzo ya Wajasiri wa kuibua maovu (Whistle blower), Mtetezi Mwanamke wa mwaka 2014 ni Bi. Salma Hamoud na Mtetezi wa haki za binadamu vijijini akiwa ni Maanda Ngoitiko.
Adhimisho hili limekuja baada ya siku mbili za warsha ya Universal Periodic Review, warsha ambayo ililenga kuleta pamoja asasi za kiraia ili ziweze kufuatilia utekelezaji wa Mapendekezo 107 yaliyotolewa na nchi wanachama za Umoja wa Mataifa na kukubaliwa na nchi.
