Cag: Mawaziri wapya wakicheza watang'oka | JamiiForums | The Home of Great Thinkers

Dismiss Notice
You are browsing this site as a guest. It takes 2 minutes to CREATE AN ACCOUNT and less than 1 minute to LOGIN

Cag: Mawaziri wapya wakicheza watang'oka

Discussion in 'Jukwaa la Siasa' started by mwitaz, May 7, 2012.

  1. mwitaz

    mwitaz JF-Expert Member

    #1
    May 7, 2012
    Joined: Feb 19, 2012
    Messages: 314
    Likes Received: 4
    Trophy Points: 35
    CAG: Mawaziri wapya
    wakicheza watang'oka

    ASEMA ATAWAKAGUA NA
    KUTOA RIPOTI KATIKA
    VIPINDI VITATU, VIGOGO
    WENGINE 'WAPUMULIA
    MASHINE'
    Boniface Meena MDHIBITI na Mkaguzi Mkuu
    wa Hesabu za Serikali
    (CAG), Ludovick Utouh
    amewaonya mawaziri
    wapya na watendaji
    serikalini kwamba ripoti zake hivi sasa zina nguvu
    za kusimamia uwajibikaji
    hivyo, wanapaswa
    kusimamia vyema wizara
    zao kuzuia ubadhirifu wa
    fedha za umma. Kauli hiyo ya Utouh ni ya
    kwanza tangu ripoti yake
    ya mwaka huu kuwang’oa
    mawaziri sita kati ya
    wanane ambao wizara zao
    zilionekana kugubikwa na ufisadi wa fedha za umma. Akizungumza jana, Utouh
    alisema mawaziri
    wanapaswa kufahamu
    kwamba kuanzia sasa hadi
    mwaka 2015, zitatoka
    ripoti nyingine tatu, hivyo ni vyema wakachukua
    tahadhari wakiwa ndiyo
    wasimamizi wakuu wa
    shughuli za wizara. Alisema kilichotokea
    bungeni na hadi mawaziri
    kuwajibishwa,
    kimethibitisha kuwa sasa
    kutakuwa na uwajibikaji
    mkubwa utakaosababishwa na
    ripoti zake kama watendaji
    wasipofuata taratibu za
    Serikali. “Mawaziri ni wasimamizi
    wa wizara hata kama ni
    wanasiasa, wao ndiyo
    wanaowajibika
    kuhakikisha mambo
    yanakwenda vizuri wizarani hivyo ni muhimu
    wakafanya hivyo,” alisema
    Utouh. Alisema kilichotokea ni
    sehemu ya uwajibikaji na
    kusema hatua
    iliyochukuliwa na Rais
    imetokana na ripoti ya ofisi
    yake kuonyesha udhaifu katika usimamizi
    uliofanywa na watangulizi
    wao hivyo kuwataka
    kuwa makini. Utouh alisema kwa kuwa
    ofisi yake inapaswa
    kuandaa ripoti tatu hadi
    kufikia mwisho wa Serikali
    ya Awamu ya Nne ya Rais
    Jakaya Kikwete watendaji hao waandamizi wa Serikali
    wanakabiliwa na
    changamoto kubwa ya
    kutimiza wajibu wao. Alisema angalizo hilo
    haliwahusu mawaziri tu,
    bali hata watendaji
    walioko chini yao. CAG alisema hivi sasa ofisi
    yake inaandaa ripoti
    nyingine mahsusi kuhusu
    vitendo vya jinai, rushwa
    na ubadhirifu
    vilivyotokana na kile kilichowang’oa viongozi
    hao tayari kwa ajili ya
    kuiwasilisha kwa Taasisi ya
    Kupambana na Kuzuia
    Rushwa (Takukuru). “Barua ambayo Takukuru
    walituandikia kuhusu wale
    ambao wamezungumzwa
    kwenye ripoti nimeiona na
    tunaishughulikia lakini
    nikwambie tu kwamba hata kama
    wasingetuandikia
    tungewapelekea kwa
    kuwa tumekuwa
    tunafanya kazi nao kwa
    karibu,” alisema. Ripoti hiyo ya CAG ndiyo
    iliyamlazimu Rais Kikwete
    kupangua Baraza lake la
    Mawaziri na kuwang'oa
    sita, Dk Cyril Chami
    (Viwanda na Biashara), Omary Nundu (Uchukuzi),
    Ezekiel Maige (Maliasili na
    Utalii), Dk Hadji Mponda
    (Afya na Ustawi wa Jamii),
    Mustafa Mkulo (Fedha) na
    William Ngeleja (Nishati na Madini). Nafasi za mawaziri hao sasa
    zimejazwa na Mbunge wa
    Handeni, Dk Abdallah
    Kigoda (Viwanda na
    Biashara), Mbunge wa
    Kalenga, Dk William Mgimwa (Fedha) na
    Mbunge wa Kuteuliwa
    Profesa Sospeter Muhongo
    (Nishati na Madini), Dk
    Harrison Mwakyembe
    (Uchukuzi), Dk Hussein Mwinyi (Afya na Ustawi wa
    Jamii) na Balozi Hamis
    Kagasheki (Maliasili na
    Utalii). Kilichowang’oa
    Baadhi ya tuhuma
    zilizokuwa zimeibuliwa na
    CAG kwenye Wizara ya
    Fedha iliyokuwa chini ya
    Mkulo ni kuvunja Bodi ya Shirika Hodhi la Mashirika
    ya Umma (CHC), ili kuficha
    tuhuma zake ikiwemo
    uuzaji wa Kiwanja Na.10
    kwa Kampuni ya Mohamed
    Enterprises (MeTL). Ukaguzi wa CAG ulibaini
    kuwa Ofisi ya Msajili wa
    Hazina na Wizara ya Fedha,
    zilihusika moja kwa moja
    katika uuzwaji wa kiwanja
    hicho kilichopo kando ya Barabara ya Nyerere bila
    kuishirikisha bodi ya CHC. Aidha, CAG alibaini kuwapo
    kwa utata katika hati ya
    madai ya Sh2.4 bilioni
    kutoka katika kampuni ya
    DRTC zinazodaiwa kuwa ni
    gharama za ulinzi na tozo la matumizi ya barabara ya
    kuingilia kwenye Kiwanja
    Na.192 kando ya Barabara
    ya Nyerere. Upungufu pia ulionekana
    kwenye uuzwaji wa Jengo
    la Kampuni ya Tanzania
    Motors (TMC) lililopo
    Kiwanja Namba 24
    kilichopo katika eneo la Viwanda la Chang’ombe
    kwa Kampuni ya Maungu
    Seed. Kwa upande wa Ngeleja,
    alikabiliwa na kashfa
    baada ya CAG kubaini
    kuwa Shirika la Umeme
    Tanzania (Tanesco), kwa
    mwaka mmoja wa fedha linafanya ununuzi wenye
    thamani ya Sh300 bilioni
    hadi Sh600bilioni. Kwa mwaka wa fedha
    2009/2010, Tanesco
    lilitumia Sh1.8 bilioni
    ukilinganisha na Sh65
    milioni zilizokuwa
    zimepangwa katika bajeti ya ukarabati wa gati
    mojawapo katika Kituo
    cha Bwawa la Mtera na
    kuingia mikataba isiyo na
    tija kwa taifa. Kwa Maige, ripoti ya CAG
    ilieleza kuwa ofisi yake
    ilipoteza Sh874,853,564
    baada ya kufanya uamuzi
    wa upendeleo wa kutoa
    kiwango cha chini cha mrabaha kwa mauzo ya
    misitu. Katika kipindi cha ukaguzi
    wa hesabu za Shirika la
    Hifadhi ya Taifa Tanzania
    (Tanapa), ilibainika kuwa
    liliingia katika mkataba na
    kampuni ya CATS Tanzania Ltd unaohusiana na
    matengenezo ya kawaida,
    ufungaji wa vifaa vya
    mawasiliano na vifaa
    vingine katika mkataba wa
    jumla ya Dola za Marekani milioni moja (wastani wa
    Sh1.5 bilioni). Pia anatuhumiwa kuweka
    mazingira ya rushwa
    katika ugawaji wa vitalu
    vya uwindaji, ambao
    unadaiwa kutawaliwa na
    dosari nyingi ikiwa ni pamoja na kutangaza
    majina ya waliopata vitalu
    bila kuonyesha jinsi
    walivyopewa. Pia, Kamati ya Kudumu ya
    Bunge ya Ardhi, Maliasili na
    Mazingira ilieleza kuwa
    kampuni 16 zilizopewa
    vitalu hivyo hazikuomba
    na kwamba vitalu hivyo vilikuwa vya daraja la
    kwanza na la pili. Mbali na tuhuma hizo, Maige
    hivi karibuni alidaiwa
    kununua nyumba kwa
    Dola za Marekani 700,000
    iliyopo Mbezi Beach, Dar es
    Salaam, tuhuma ambazo alizipinga na kusema kuwa
    nyumba hiyo ameinunua
    kwa Dola 410,000, sawa na
    zaidi ya Sh600 milioni). Dk Mponda alikabiliwa na
    kashfa ya Bohari ya Dawa
    (MSD) ambako ukaguzi
    maalumu ulibaini kuwapo
    tofauti ya Sh658.9 milioni
    ikiwa ni pungufu ya kiasi ambacho kilipokewa na
    kuripotiwa na wizara hiyo
    kwenda bohari, huku
    ushahidi wa kupokewa
    kwake ukiwa
    haujatolewa. Pia, ukaguzi huo maalumu
    ulibaini kuwapo kiasi cha
    Sh4.5 bilioni zilizotoka
    Hazina kwenda wizara hiyo
    kununulia dawa na vifaa
    vya hospitali, lakini kiasi cha Sh4.344 bilioni tu
    ndicho kilichopokewa na
    MSD. Nundu alikabiliwa na
    kashfa ya Shirika la Ndege
    Tanzania (ATCL) na mradi
    wa upanuzi wa Bandari ya
    Dar es Salaam huku
    akituhumiwa kuipigia kifua Kampuni ya Chinese
    Merchant ipewe zabuni ya
    upanuzi huo wa bandari. Lakini, Nundu alimtuhumu
    aliyekuwa naibu wake,
    Athumani Mfutakamba
    ambaye naye ameng'olewa
    kwamba alikuwa
    akishinikiza Kampuni ya China Communication
    Construction Company
    (CCCC), ipewe kazi ya
    kujenga gati namba 13 na
    14 katika Bandari ya Dar es
    Salaam kwa kuwa ilimgharamia safari kadhaa
    kwenda nje. Hata hivyo, Mfutakamba
    alipoulizwa kuhusu safari
    zake hizo za nje
    kugharamiwa na CCCC na
    baadaye kuandika ripoti
    akishinikiza ipewe kazi ya kujenga gati hizo, alikiri
    kusafirishwa lakini
    akasema alifuata taratibu
    zote za kiserikali. Dk Chami alituhumiwa
    kumlinda Mkurugenzi
    Mkuu wa Shirika la
    Viwango Tanzania (TBS),
    Charles Ekelege kutokana
    na tuhuma za kuwepo ofisi hewa za ukaguzi wa TBS
    zilizopo nje ya nchi. Ekelege anadaiwa
    kusimamia ofisi hewa za
    ukaguzi wa magari huko
    Singapore na Hong Kong
    na kuitia Serikali hasara ya
    karibu Sh30bilioni.

    Source: Mwananchi
     
  2. c

    collezione JF-Expert Member

    #2
    May 7, 2012
    Joined: Oct 22, 2010
    Messages: 360
    Likes Received: 33
    Trophy Points: 45
    Safi CAG.
     
  3. marejesho

    marejesho JF-Expert Member

    #3
    May 7, 2012
    Joined: Jan 6, 2011
    Messages: 6,337
    Likes Received: 585
    Trophy Points: 280
    Wasijetuwakam-mwakyembe!!!!!!!!Maana hao walioenguliwa kwa lazima,hasira zimewajaa!!!!
     
Loading...