WANANCHI waliojenga kwenye vyanzo vya maji wametakiwa kubomoa nyumba zao kwa muda wa siku saba ikiwa ni utekelezaji wa agizo la Mkuu wa wilaya hiyo.
Mamlaka ya Maji na Usafi wa Mazingira Mjini Maswa (Mauwasa), wilayani Maswa, imewataka wananchi kutekeleza agizo la Mkuu wa Wilaya ya Maswa,Dk. Seif Shekalaghe, la kuondoka kwa waliojenga ndani ya mita 60 kutoka vyanzo vya maji na madakio yote ya maji yanayopeleka katika bwawa la New Sola, ambacho ndicho chanzo kikuu kinachosambaza katika vijiji 11, kijiji cha Zanzui.
Akizungumza katika uwekaji alama ya X katika nyumba hizo, Mkurugenzi Mtendaji wa Mauwasa,Mhandisi Merchades Anaclet, alisema katika utekelezaji wa operesheni hiyo hakutakuwa na majadiliano na kuwataka watu wote waliojenga ndani ya vyanzo hivyo kubomoa wenyewe.
Alisema operesheni hiyo imezingatia Sheria ya maji na itasaidia upatikanaji endelevu wa maji, hivyo amewataka wananchi wapishe vyanzo vya maji kwa hiari kabla ya nguvu kutumika kuwaondoa.
“Tunawaomba wananchi waanze kuvunja nyumba zao wenyewe kabla ya muda tulioutoa kwa kuwa kinyume cha hapo, tutavunja sisi na gharama zitakazotumika watazilipa watu wote waliohusika kuvamia vyanzo hivyo,” alisema.
Alisema kuwa ombwe la wananchi na taasisi za serikali kujenga katika vyanzo vya maji ni tatizo sugu nchini linalohitaji tiba ya
kisheria ili kuepuka athari za uhaba wa maji zinazojitokeza na zitakazojitokeza miaka ya baadaye.
Hata hivyo, ubomoaji huo umepokelewa kwa hisia tofauti na wakazi waishio katika maeneo hayo huku wakilalamika kutoandaliwa kuondoka katika nyumba zao na wengine kudai kupatiwa viwanja na idara ya ardhi Wilaya ya Maswa.
Wananchi hao ambao ni waathirika wa ubomoaji wameiomba serikali iwapatie maeneo mbadala licha ya kuyamiliki maeneo hayo kihalali na kulalamikia kuwa bomoa bomoa hiyo huenda ikarudisha nyuma maendeleo ya wananchi.
Ofisa Ardhi wa Wilaya ya Maswa,Vivian Christian, alisema idara yake haijawahi kugawa viwanja kwa ajili ya ujenzi wa makazi, biashara au taasisi katika eneo hilo la vyanzo vya maji na kuwataka wote wenye madai hayo kufika ofisini kwake wakiwa na nyaraka zinazoonyesha uhalali wa kupatiwa viwanja hivyo
Chanzo: Nipashe
