KWA UFUPI
Habari ambazo zililifikia gazeti hili zinasema Makame alianza kuumwa usiku wa kuamkia juzi baada ya uvimbe mdogo uliokuwa umeota puani kupasuka na kuvuja damu nyingi.
Dodoma
Mjumbe wa Bunge Maalumu, Asha Bakari Makame amelazimika kuwahishwa kwenda Hospitali ya Taifa Muhimbili jijini Dar es Salaam kwa ajili ya matibabu baada ya kuzidiwa akiwa Dodoma ambako alikuwa akihudhuria vikao vya kamati.
Habari ambazo zililifikia gazeti hili zinasema Makame alianza kuumwa usiku wa kuamkia juzi baada ya uvimbe mdogo uliokuwa umeota puani kupasuka na kuvuja damu nyingi.
"Alivuja damu nyingi sana kiasi kwamba presha ilishuka na kulipokucha jana (juzi) asubuhi walipanga kumpeleka Dar es Salaam kwa ndege, lakini madaktari walishauri kwamba kwa hali yake asingeweza kuhimili usafiri huo, hivyo walimsafirisha kwa ambulance (gari la wagonjwa) saa tano asubuhi," kilisema chanzo chetu.
Mtoa habari wetu alisema Makame aliwahi kufanyiwa upasuaji hivi karibuni na kwamba mara kadhaa amekuwa akipatwa na matatizo ya kiafya. Mganga Mfawidhi wa Hospitali ya Rufaa ya Dodoma, Dk Nassoro Mzee alithibitisha kupokelewa kwa mjumbe huyo na kuhamishiwa Hospitali ya Rufaa ya Muhimbili kwa matibabu zaidi.
"Ni kweli alipokelewa jana (juzi) na tulimpa rufaa kwenda Hospitali ya Taifa ya Muhimbili kwa matibabu zaidi," alisema Dk Mzee. Hata hivyo, alikataa kutaja ugonjwa unaomsumbua mjumbe huyo.
Katibu wa Bunge Maalumu, Yahya Khamis Hamad alithibitisha mjumbe huyo kupelekwa Dar es Salaam kwa ajili ya matibabu baada ya kuugua ghafla.
"Hatujafahamu tatizo ni nini ila ni taarifa tulizonazo ni kwamba aliwahi kufanyiwa upasuaji hivyo ana tatizo ambalo limekuwa likimfanya apelekwe hospitalini kupatiwa matibabu mara kadhaa," alisema Hamad.