Ushairi: Siku hiyo ikifika

[Yussufhaji]

SIKU HIYO IKIFIKA

Siku hiyo njema kwangu,
Mateso tapumzika
Takutana mola wangu,
Moyo utafurahika
Tapata lo haki yangu,
Dunia lo dhulumika
SIKU HIYO IKIFIKA,
HAKI ZANGU TAZIPATA

Wale kwao nilo mwema,
Moyoni tahudhunika
Kwa wale nisio mwema,
Nyoyo zitafarijika
Ubaya na wangu wema,
Wote utadhihirika
SIKU HIYO IKIFIKA,
YALO SIRI TAFICHUKA

Maradhi yanonitesa,
Tamati yake tafika
Yatapona yote hasa,
Nafsi ta takasika
Si kwa hali wala pesa,
Ni amali tonishika
SIKU HIYO IKIFIKA,
VYA DUNIA TAVIACHA

Wale walo jenga chuki,
Msibani tajijaza
Watafanya unafiki,
Vilio watajiliza
Taficha zao hamaki,
Huku wakiwaza waza
SIKU HIYO IKIFIKA,
PILAU TAJAZWA NYAMA

Wale wanohangaika,
Kwa waganga kufukiza
Wataripuka kucheka,
Wakidhani meniweza
Kumbe ni mola rabuka,
Uhai anae tuza
SIKU HIYO IKIFIKA,
WAPO WATO DANGANYANA

Nakuomba ya rabuka,
Mola muweza ya yote
Siku hio ikifika,
Unipe baraka zote
Jahanamu kuepuka,
Peponi ta takasika
SIKU HIYO IKIFIKA,
MOLA WANGU NIPOKEE

Na
@Yosef_de_khuzhov
YouTube: Malenga wa Taifa
Fb: Tungo za dr Yosef
Email: hajjyussuf2@gmail.com

Sent using Jamii Forums mobile app