Kinachoendelea Tz kiutawala ni jambo la kumsikitisha kila mtu makini. Ni kama mfumo wa dola umekufa. Kila mtu anatoa tamko, na kinachoshangaza zaidi ni kwamba hata wale ambao tunadhani wana mamalaka, nao wanaonekana hawana nguvu na wanalalamika kama raia wa kawaida. Ukweli ni kwamba, kwa mfumo wetu wa kiutawala, rais wa nchi ndiye mwenye mamlaka yote. Hao wengine kama Waziri Mkuu hawana mamlaka ya kufanya kitu chochote tofauti na utashi wa rais.
Matokeo yake ni kwamba rais akiwa mchapakazi, mfumo wote unakuwa hai. Kinyume chake, rais akilala, mfumo wote nao unaenda likizo, na hapo ndipo tunaona watu wakijichotea rasilimali za nchi bila bughudha, huku wale ambao wanapaswa kuwaadabisha wakiishia kulalamika tu. Pinda sijui sana uwezo wake kiutendaji. Ninachojua ni kwamba si fisadi kama hao wenzake.
Pamoja na hayo, hata angekuwa mkali kama Sokoine, angeishia frustration tu, na hata kupoteza nafasi yake, kwa sababu bosi wake ni mtu wa maneno tu bila utendaji wowote. Hilo ni moja. Pili, tusisahau kwamba Pinda ni mwana-CCM, na hao vigogo wanaoibia nchi nao wengi wao ama ni wana-CCM au ni maswahiba wa karibu na watawala wa CCM (ambayo m/kiti wake ndiye rais).
Tunarudi kule kule. Kwa maslahi ya kisiasa, Pinda na watendaji wake hawawezi kuwafanya lolote hao wahujumu uchumi kwa kuwa wanatoa mchango wa maana ndani ya chama. Naamini watu hao wanafahamika vizuri, tena kwa majina, lakini ndo hivyo tena. Zaidi ya yote ni kwamba hii nchi imeshaoza kwa rushwa na ufisadi.
Ingawa hawa wahujumu wanafahamika, wale wanaopaswa kuwachukulia hatua wanawaogopa kwani hata wenyewe nao si wasafi. Wapo mmoja mmoja wasafi lakini wengi ni wale wale. Je, nani amfunge paka kengele? Tumuombe Mungu awamu ijayo tupate rais mchapa kazi. Kinyume na hapo hakuna njia ya mkato, inabidi tuwe tu wapole.