MWANDISHI wa habari wa gazeti la Tanzania Daima, Agnes Yamo, amefariki jana katika Hospitali ya Jeshi ya Lugalo jijini Dar es Salaam alikokuwa amelazwa.
Agnes alilazwa juzi hospitalini hapo kutokana na matatizo ya kuishiwa damu.
Akizungumza na gazeti hili jana jijini Dar es Salaam, kaka wa marehemu, Samuel Yamo, alisema mipango ya mazishi inafanyika nyumbani kwa kaka yake Buguruni Sokoni katika ghorofa za madaktari.
Alisema mwili wa marehemu unatarajiwa kusafirishwa leo kupelekwa mkoani Morogoro ambako mazishi yatafanyika kesho.
Enzi za uhai wake, Agnes aliwahi kufanya kazi katika kampuni ya New Habari Corporation na baadaye kujiunga na gazeti hili mwaka 2005.
Baada ya kufanya kazi ya uandishi wa habari kwa miaka kadhaa, alihamishiwa idara ya matangazo ambako alidumu hadi mauti yalipomkuta.
Akimzungumzia marehemu, Mhariri Mtendaji wa Tanzania Daima, Absalom Kibanda, alisema atakumbukwa kwa mchango mkubwa aliokuwa akiutoa kwa kampuni hadi kulazimika kumhamishia idara ya matangazo.
Huu ni msiba mzito uliotukuta, Agnes tumefanya naye kazi kwa muda mrefu katika kampuni hii. Tulijitahidi kuhakikisha tunaokoa uhai wake, lakini hatukufanikiwa. Mwenyezi Mungu amemchukua ili akapumzike, alisema.
Mchezaji wa Kick Boxing wa timu ya Free Media, Bi Agnes Yamo akipambana na mchezaji wa TSN Adam Amon katika michezo ya Bonanza la waandishi wa habari lililofanyika Msasani Beach jijini Dar es salaam