Muhongo atoa agizo kwa mameneja wa kanda Tanesco wasioweza kazi kuwajibishwa

[unanitaka]

Waziri wa Nishati na Madini, Profesa Sospeter Muhongo ameeleza kuwa Mameneja wa Shirika la umeme nchini (TANESCO) wanaosimamia Kanda mbalimbali nchini wataondolewa katika vyeo hivyo iwapo hawatatimiza maagizo mbalimbali waliyopangiwa na Wizara ya Nishati na Madini ifikapo Machi 1 mwaka huu.

Waziri wa Nishati na Madini alisema hayo wakati wa kikao chake na watendaji wa Shirika la Umeme nchini (TANESCO) na Taasisi nyingine zilizo chini ya Wizara ya Nishati na Madini kilichofanyika katika Kituo cha kuzalishia umeme cha Mtera.

Profesa Muhongo alitaja maagizo hayo kuwa ni kuunganisha huduma kwa wateja wengi, kuwa na makusanyo makubwa ya bili za umeme, kupunguza manung’uniko ya wananchi katika huduma za umeme na uboreshaji wa mawasiliano kati ya Shirika hilo na wananchi.

“Mkurugenzi Mtendaji wa TANESCO, ifikapo Machi Moja mwaka huu atatuthibitishia kama Mameneja hawa wataendelea na majukumu haya wanayoyasimamia ama la na hii itatokana na ufanisi wa utendaji katika majukumu tuliyowapangia,” alisema Profesa Muhongo.

Aidha, Waziri wa Nishati na Madini alisema kuwa Kitengo cha Uwekezaji cha Tanesco kama hakitakuwa na miradi mipya ya umeme ifikapo tarehe 2 Aprili mwaka huu, watendaji katika Ofisi hiyo wataondolewa katika nafasi hiyo kwa kushindwa kutimiza majukumu yake ipasavyo.

“Hapa hatuna mzaha kwani mahitaji ya umeme ni makubwa na tuna miradi mingi ya usambazaji umeme kwa wanannchi ikiwemo miradi ya REA na wananchi wanahitaji umeme kwa matumizi ya majumbani na kuanzisha viwanda vidogodogo, sasa bila miradi mipya ya umeme tutashindwa kusambaza umeme kwa wananchi hawa kwa kuwa kiasi cha umeme tulichokuwa nacho sasa bado hakitoshi,” alisema Profesa Muhongo.

Profesa Muhongo pia aliwaasa Mameneja wa TANESCO wa Kanda kuwakaribisha wawekezaji mbalimbali wa umeme ikiwemo miradi midogo ya uzalishaji umeme wa maji ili nchi iwe na umeme wa kutosha na sio kuwakatisha tamaa wawekezaji hao.

Vilevile Profesa Muhongo alisema kuwa watumishi watakaoleta urasimu katika kujadili masuala ya uwekezaji wa nishati wataachia ngazi kwani ndio wanaokwamisha juhudi za serikali katika kuongeza kiasi cha umeme nchini.

“TANESCO na EWURA kwa sasa pale anapojitokeza mwekezaji wa miradi ya umeme lazima mjadiliane naye kwa pamoja badala ya mwekezaji husika kwenda TANESCO baadaye anaenda EWURA au TPDC hivyo mwekezaji anapokuja jadilini naye kwa pamoja ili msitumie muda mrefu katika utekelezaji wa suala moja na hivyo kuchelewesha utekelezaji wa miradi mbalimbali,” alisema Profesa Muhongo.

Vilevile Profesa Muhongo aliwaagiza watendaji wa TANESCO katika vitengo vya ukaguzi kufanya kazi hiyo kwa ufanisi mkubwa ikiwemo usimamizi madhubuti wa nguzo za umeme ambazo baadhi huanguka kila inapofika msimu wa mvua na kusema kuwa suala hilo halikubaliki.

 

[mgt software]

safi sana kamau si muhongo huyu la profesari

 

[Designer_3434]

Tanzania mpya hiyo,

 

[Simiyu Yetu]

Tanzania tuitakayo ndiyo hiyo inakuja kwa kasi kubwa sana.

 

[Sometimes]

Mtoto wa nyoka lazima awe nyoka na siyo kenge. Watendaji wa Mhe. Rais Magufuli lazima waige utendaji wake ili kwenda sambamba naye, vinginevyo wampe nafasi achague wengine!

 

[singidadodoma]

WAZIRI wa Nishati na Madini, Profesa Sospeter Muhongo ameagiza mameneja wa Shirika la Umeme nchini (TANESCO), watakaoshindwa kutekeleza maagizo ya wizara hiyo, waondolewe kazini ifikapo Machi mosi mwaka huu.

Alisema hayo jana wakati wa kikao chake na watendaji wa Tanesco na taasisi nyingine zilizo chini ya wizara hiyo, kilichofanyika katika kituo cha kuzalishia umeme cha Mtera.

Profesa Muhongo alitaja maagizo hayo kuwa ni kuunganisha huduma kwa wateja wengi, kuwa na makusanyo makubwa ya ankara za umeme, kupunguza manung’uniko ya wananchi katika huduma za umeme na uboreshaji wa mawasiliano kati ya Shirika hilo na wananchi.

“Mkurugenzi Mtendaji wa Tanesco, ifikapo Machi mosi mwaka huu atatuthibitishia kama mameneja hawa wataendelea na majukumu haya wanayosimamia ama la, na hii itatokana na ufanisi wa utendaji katika majukumu tuliyowapangia,” alisema Profesa Muhongo.

Mbali na mameneja hao, Profesa Muhongo ameagiza Kitengo cha Uwekezaji cha Tanesco, kama hakitakuwa na miradi mipya ya umeme ifikapo Aprili 2 mwaka huu, watendaji katika Ofisi hiyo waondolewe katika nafasi hiyo kwa kushindwa kutimiza majukumu yao ipasavyo.

“Hapa hatuna mzaha kwani mahitaji ya umeme ni makubwa na tuna miradi mingi ya usambazaji umeme kwa wananchi ikiwemo miradi ya Rea (Wakala wa Umeme Vijijini). “Wananchi wanahitaji umeme kwa matumizi ya majumbani na kuanzisha viwanda vidogo, sasa bila miradi mipya ya umeme, tutashindwa kusambaza umeme kwa wananchi hawa kwa kuwa kiasi cha umeme tulichokuwa nacho sasa bado hakitoshi,” alisema Profesa Muhongo.

Profesa Muhongo pia aliwaasa mameneja wa Tanesco wa Kanda, kukaribisha wawekezaji mbalimbali wa umeme ikiwemo miradi midogo ya uzalishaji umeme wa maji, ili nchi iwe na umeme wa kutosha badala ya kuwakatisha tamaa wawekezaji hao.

Alionya watumishi watakaoleta urasimu katika kujadili masuala ya uwekezaji wa nishati, wataachia ngazi kwani ndio wanaokwamisha juhudi za Serikali katika kuongeza kiasi cha umeme nchini.

“Tanesco na Ewura (Mamlaka ya Udhibiti wa Huduma za Nishati na Maji) kwa sasa pale anapojitokeza mwekezaji wa miradi ya umeme, lazima mjadiliane naye kwa pamoja badala ya mwekezaji husika kwenda Tanesco na baadaye Ewura au TPDC (Shirika la Maendeleo ya Petroli). “Hivyo mwekezaji anapokuja, jadilini naye kwa pamoja ili msitumie muda mrefu katika utekelezaji wa suala moja na hivyo kuchelewesha utekelezaji wa miradi mbalimbali,” alisema Profesa Muhongo.

Pia amewaagiza watendaji wa TANESCO katika vitengo vya ukaguzi, kufanya kazi hiyo kwa ufanisi mkubwa ikiwemo usimamizi madhubuti wa nguzo za umeme, ambazo baadhi huanguka kila inapofika msimu wa mvua na kusema kuwa suala hilo halikubaliki.

Hatua hiyo ya Profesa Muhongo, imelenga kutekeleza malengo ya Wizara hiyo kuhakikisha asilimia 67 ya vijiji vyote nchini, vitapata umeme katika miaka miwili na nusu ijayo. Mbali na kuunganisha watu wengi na huduma hiyo, juhudi kuongeza uzalishaji wa umeme, Profesa Muhongo alizieleza mara tu alipoapishwa kushika wadhifa huo Desemba mwaka jana.

Katika hafla hiyo, Profesa Muhongo alisema Tanzania ina vyanzo vingi vya kuzalisha umeme, lakini bado umeme unaozalishwa hautoshi na kuwataka wawekezaji wenye uwezo watumie fursa hiyo kuwekeza katika sekta hiyo.

Aidha alisisitiza kuwa ili Taifa lifanikiwe kuwa nchi yenye kipato cha kati kufikia mwaka 2025, ni lazima nchi iwe na umeme wa kutosha, hivyo hadi kufikia mwaka huo, uzalishaji wa umeme unapaswa kufikia megawati 10,000.

 

[indelible]

Well said Prof, kuna uzembe ulikithiri, ukiritimba na mazingira tengenezwa ya rushwa kwenye shirika hili.

Sijafanya utafiti wa kimahesabu wa kina ila makadirio katika kila watu 10 walioomba kuwekewa umeme 05 Wametoa rushwa.

Bei ya umeme pamoja na kuwekwa kwenye madara matatu bado sio rafiki kwa watumiaji wa kawaida na wawekezaji.

Kunahaja ya shirika mbali na kauli ya waziri kujitathimini. Tumemsikia President JPM akiongelea collusion ya kihansi, mtera na kidatu kuhusu kina cha maji kuhujumiwa ili watu wauze mafuta hii ni zaidi ya kashfa huu ni uhujumu uchumi na adhabu zake ni pamoja na walio husika kutaifishwa Mali zao zote.

Kwa mazingira hayo unadhani wasimamizi waliopo wanauadifu kweli kwenye kushirikiana na mwekezaji wa umeme nje ya shirika

Hiyo mahakama ya mafisadi papa na ianze tu.