Mtambuzi
Platinum Member
- Oct 29, 2008
- 8,809
- 15,443
Hili ni jambo muhimu sana katika maisha. Usimuachie mtu mwingine majukumu yako kwani kwa kufanya hivyo unampa pamoja na uhuru wako. Uhuru wako umo ndani ya majukumu yako, uhuru ni matokeo ya kuwajibika.
Kama huwezi kuwajibika au kubeba msalaba wako, pia fahamu kwamba, huwezi kuwa huru, utakuwa mtumwa wa huyo unayemuachia majukumu yako. Ukiwajibika utakuwa huru, na ukiwa huru utakuwa mwenye furaha na amani na utaridhika katika maisha yako. Usipowajibika utakuwa mtumwa, na ukiwa mtumwa utakuwa huna furaha, utakuwa mwenye hofu, huzuni, hasira za haraka haraka, na utakuwa mtu mwenye kuumwa mara kwa mara.
Anza kutimiza wajibu wako kwa kuanzia kwenye mambo madogo madogo na baadaye itakuwa rahisi kwako kutimiza wajibu wako hata katika yale makubwa. Lakini pia, huwa tunapewa ahadi mbalimbali na watu wetu wa karibu wakiwemo waume zetu na wake zetu. Inapotokea wameshindwa kututimizia ahadi hizo huwa tunaumia sana. Tunaumia kwa sababu ya matarajio tuliyokuwa nayo.
Ukweli ni kwamba hakuna mtu yoyote mwenye uwezo wa kukutimiza matarajio yako. Ni wewe peke yako ndiye mwenye uwezo wa kutimiza matarajio yako kwa sababu yapo ndani yako. Unapokuwa na matarajio kutoka kwa mtu mwingine, ufahamu kwamba, mwenye kutimiza matarajio hayo siyo wewe, ila ni huyo mtu mwingine. Mtu huyo mwingine ana mamlaka ya kukutimizia au asikutimizie.
Lakini pia ukumbuke kwamba mtu huyo mwingine ana matarajio yake ambayo yanamsubiri ayatimize. Ni vigumu kukutimizia wewe matarajio yako wakati ya kwake yanamsubiri. Hivyo, usiumizwe na ahadi ulizoahidiwa na mtu mwingine hasa inapotokea akashindwa kukutimizia. Kwa maneno mengine ni kwamba usiwe mtegemezi wa ahadi kwani matokeo yake ni maumivu ya kihisia na kiakili na hatimaye ya kimwili.