NI saa 12 asubuhi, mlango wa chumba changu unagongwa: Kaka Zitto, kaka Zitto, ndivyo mama yangu Bi Shida huita wanawe wote wa kiume.
Naamka, mama ananiambia: Shelembi ametutoka. Ni kama ndoto hivi, maana ni jana yake tu nilitoka kuzungumza na Katibu wa Chama cha Demokrasia na Maendeleo (CHADEMA) wa Mkoa kuhusiana na hali ya Mwenyekiti wake, Magadula Shelembi.
Baada ya kuzungumza na Dk. Molekwa wa Hospitali ya Mkoa wa Shinyanga, nilipata ahueni kwamba mpiganaji wetu atapata matibabu stahili.
Mungu hakutaka. Shelembi ametangulia mbele ya haki. Kwa heri. CHADEMA imepoteza mwanachama mahiri, kiongozi asiyeyumba na mwenye msimamo.
Wananchi wa Shinyanga, Kata ya Ndala na wananchi wote wa Manispaa ya Shinyanga wamepoteza diwani makini mwenye uwezo mkubwa wa kutetea masilahi ya wananchi wake.
Familia imepoteza baba mwema aliyependa familia yake. Taifa limepoteza mmoja wa waasisi wa mfumo wa vyama vingi, ambapo miaka ya hivi karibuni tumeshuhudia watu wengi waliokuwa wameanzisha vyama hivi vipya wakijiunga na Chama Cha Mapinduzi (CCM).
Pia wengine kutoka CCM ama kwa kupenda sera za vyama vipya au kwa kutafuta fursa za kiuchaguzi wamejiunga na vyama vipya na hata chama chetu cha CHADEMA.
Shelembi hakuyumba licha ya changamoto mbalimbali ndani ya chama ambapo wakati mwingine ilidhaniwa angeweza kukata tamaa na kuondoka kwenye chama.
Alibaki muumini mkubwa wa CHADEMA na hata kupoteza maisha yake akiwa kiongozi wa chama kitaifa kama mjumbe wa Kamati Kuu, kimkoa kama mwenyekiti wa chama wa mkoa na kiwilaya kama diwani wa Manispaa ya Shinyanga.
Huu ni usia mkubwa kwetu na hasa vijana kwamba tuwe na uvumilivu wa kisiasa.
Ndani ya CHADEMA tulimwita mashine ya kusaga na kukoboa. Kiukweli yeye ndiye alianzisha jina hili wakati anagombea ujumbe wa Kamati Kuu mwaka 2009. Uchaguzi ulikuwa mgumu sana, wanatakiwa wajumbe watatu tu wanaume Bara kati ya wagombea zaidi ya 20.
Wasomi kama kina Dk. Kitila Mkumbo kutoka Chuo Kikuu cha Dar es Salaam na Mwanazuoni mwenzake, Professa Mwesiga Baregu, walikuwa katika kundi hili.
Kulikuwa na wagombea kama Peter Msigwa, ambaye sasa ni Mbunge wa Iringa Mjini na wengine wengi.
Shelembi, mashine ya kusaga na kukoboa aliongoza katika kundi hili akifuatiwa na Baregu na Kitila Mkumbo.
Hii ilionyesha mapenzi makubwa aliyokuwa nayo ndani ya chama chetu. Waliompenda na wasiompenda walimpa kura.
Kila mjumbe alipenda msimamo wake kwa mambo aliyoyasimamia. Hakufinyanga maneno wala kumungunya. Alisema alichoamini, jina hili lilimfaa kabisa.
Shelembi alikuwa tayari kubakia peke yake na msimamo wake hata kama kikao kizima kinampinga.
Nakumbuka wakati tumekaa katika kikao cha Kamati Kuu Dodoma tukiwa na changamoto kubwa ya kumsimamisha aliyekuwa Makamu Mwenyekiti wa chama Bara marehemu Chacha Wangwe, Shelembi alisimama peke yake mpaka mwisho kupinga kusimamishwa kwa Wangwe.
Nakumbuka alisimama na kusema kwa lugha yake ya Kiswahili cha Kisukuma "Eeh, kumbe siasa ndiyo hivi, nimeogopa kabisa, yaani na wewe (akimtaja mmoja wa wajumbe) unakubali makamu asimamishwe wakati tulikuwa wote kupinga hili?
Kwa kweli licha ya tension iliyokuwepo, kikao kiliangua kicheko. Alikuwa na namna yake ya kuwasilisha hoja yake. Alikuwa mzungumzaji mzuri. Hakuogopa kusema mawazo yake. Alisimamia demokrasia ya kweli ndani ya vikao vya chama.
Hili ni fundisho kwa Wanachadema tuliobakia. Kuwa na misimamo bila kuathiri uhai wa chama. Kwamba tofauti ya mawazo ndiyo kushamiri kwa demokrasia.
Kuna watu walitaka kujaribu kutumia tofauti kadhaa za mawazo ndani ya chama kumfanya akiasi chama. Alikataa. Alikuwa Mwanachadema kindakindaki. Alikipenda chama si kinafiki, alichukia unafiki kwa maana ya kuuchukia.
Alihakikisha chama kinajengwa katika mkoa wake na hata kutoa wabunge wengi zaidi wa kuchaguliwa wa CHADEMA kuliko mkoa mwingine wowote Tanzania Bara, na kuufanya Mkoa wa Shinyanga kuwa mkoa wa pili kwa kutoa wabunge wengi zaidi wa upinzani.
Shelembi alikuwa kamanda makini na mahiri. Umetuachia changamoto ya kuendeleza ushindi wetu na kuhakikisha tunabeba majimbo yaliyobakia katika Mkoa wa sasa wa Shinyanga ambao umegawanywa na kutoa mikoa ya Simiyu na Geita.
Ni Changamoto ambayo tupo tayari kuichukua. Tunaweza kama ulivyoweza Shelembi! Umeshatuwekea msingi imara.
Shelembi hakuwa mwenyekiti wa mkoa aliyepeleka mbele wapiganaji na yeye kubakia nyuma, hapana. Yeye mwenyewe aligombea Jimbo la Shinyanga Mjini na pia udiwani katika Kata ya Ndala.
Alishinda vyote. Akatangazwa mshindi kwenye udiwani, akapokonywa ubunge. Kuna mkanganyiko wa kura alizopata, yeye alisema alitangazwa ameshindwa kwa tofauti ya kura moja, Mbunge wa Shinyanga Mjini Masele Stephen anasema hapana, ilikuwa ni tofauti ya asilimia moja.
Hakukubali uchakachuaji huu wa haki yake. Alikwenda mahakamani. Amefariki dunia akiwa anapigania haki yake mahakamani.
Nakumbuka mara ya mwisho nilikutana naye akiwa Dar es Salaam kumwona Wakili Mabere Marando kuhusiana na kesi.
Alikuwa ana ari ya kuhakikisha anashinda kesi ili atangazwe kuwa mbunge halali wa Shinyanga Mjini. Hii ni changamoto nyingine iliyo mbele yetu, kuhakikisha haki hii ya watu wa Shinyanga inalindwa.
Kamanda Shelembi, umetangulia. Tutaifanya kazi hii. CHADEMA itaendeleza kazi hii. Chama chako ulichokipigania tangu kianzishwe hakitakutupa. Watu wa Shinyanga walimpenda Shelembi. Hakuwa na ukwasi. Ni mwananchi wa kawaida kabisa. Ninapoandika makala hii ya kumuaga, ninapata fahari ya mambo mawili.
Moja, ndani ya nchi yetu, bila kujali uwezo wa kifedha wa mtu bado unaweza kuwa kiongozi. Mbili, ndani ya chama changu, mtu maskini kabisa na hohehahe ana fursa ya kutekeleza haki yake ya kidemokrasia.
Shelembi alikuwa ni mtu wa daraja la chini, hakuwa middle class, lakini aliweza kutumia haki yake ndani ya chama chetu. Inatia moyo kuwa bado misingi ya waasisi wa taifa ipo. Aliendesha kampeni zake za mwaka 2010 kwa michango ya wananchi.
Nakumbuka nilipopita Shinyanga katika ziara yangu ya kunadi wagombea ubunge, tulipata watu wengi katika mkutano. Kofia na mifuko ya rambo ilipita mara baada kuzungumza.
Wananchi wa kawaida kabisa waliitikia wito wa kumchangia mafuta ili aweze kwenda mkutano wa pili.
Tulikusanya zaidi ya shilingi laki sita na ushei ndani ya nusu saa tu. Jimbo pekee lililozidi Shinyanga Mjini ni Jimbo la Sumbawanga Mjini, ambapo tulikusanya shilingi laki nane na nusu.
Shelembi, tangulia. Ulipendwa si kwa mali zako bali kwa uwezo wako wa kutetea haki za watu wako. Tuna majonzi tu kuwa hutaona wakati tunachukua dola mwaka 2015. Naamini utatutumia salamu huko uliko. Nenda. Msalimu Chacha Rasta! Mwambie chama kipo imara. Harakati zinaendelea.
Zitto Kabwe ni Mbunge wa Kigoma Kaskazini, Naibu Kiongozi wa Upinzani Bungeni na Naibu Katibu Mkuu wa CHADEMA (Tanzania Bara).
