WanaJF,
Kupitia jamvi hili la JF kumekuwa na threads kadhaa zinazolenga kubeza mchango wa Mwalimu Nyerere katika ustawi wa nchi yetu kijamii, kisiasa na kiuchumi. Baadhi ya wachangiaji wa threads hizo wanamshambulia Mwl. Nyerere kwamba alishindwa kujenga uchumi imara kwa sababu za siasa yake ya ujamaa na kujitegemea. Wengine wamefikia hatua ya kusema kwamba aliwapendelea wakristo katika mambo muhimu na kuwabagua waislamu. Bahati mbaya sana, mifano inayotolewa kuhusu upendeleo huo ni ya kijinga na isiyo na mantiki kwa mtu mwenye akili na ufahamu wa kuchambua mambo.
Jambo moja ambalo linasahaulika katika hoja za wanaompinga Mwl. Nyerere ni je, huo uchumi unaoonekana sasa umeimarika tofauti na ilivyokuwa wakati wa Nyerere, unamnufaisha nani? Ni watanzania wangapi wanaofaidika na uchumi wa sasa? Je, uchumi wa sasa (kama kweli upo) tumeujenga kwa misaada yenye masharti yanayovuruga hata uhuru wetu wa kujiamulia mambo yetu wenyewe au tumeujenga kwa kujitegemea kirasilimali na kimawazo?
Kimsingi, Mwl. Nyerere alilenga kujenga uchumi ambao hata kama haukuwa mkubwa lakini ulinufaisha jamii pana ya watanzania. Alijitahidi kujenga nchi yenye uhuru kamili wa kujiamulia mambo yake kadri inavyoonekana inafaa. Hakuwa 'A YES SIR/MADAM PRESIDENT', kama ilivyokuwa kwa marais waliofuata na hususan rais wa sasa. Leo hii kila sekta nchini inaendeshwa kwa sera zilizojengwa chini ya misingi ya World Bank na IMF. Ndiyo maana ukisoma sera ya biashara, maji, elimu, n.k. ya Tanzania huwezi kuona tofauti ya sera za sekta hizo kwa nchi za Uganda, Kenya, Msumbiji, n.k. Na sababu kubwa ndiyo hiyo kwamba sera zote zinatokana na matakwa ya wakubwa hao wa dunia, jambo ambalo Mwl. Nyerere alikataa maishani mwake.
Mwl. Nyerere ataendelea na anastahili kuenziwa kama BABA WA TAIFA LA TANZANIA. Waziri wa Mambo ya Nchi za Nje wa Marekani wakati huo Bi. Maldelin Albright alipokuja nchini kwenye msiba wa Mwl. Nyerere alisema jambo moja kuhusu Mwl ambalo sitakuja nilisahau maishani mwangu. Bi. Albright alisema 'katika maisha yangu sijawahi na sitarajii kushuhudia kiongozi wa kiafrika mwenye msimamo thabiti na anayewatetea wananchi wake mbele ya mataifa makubwa, kama Mwl. Nyerere. Nitaendelea kumkumbuka Mwl. Nyerere kama mmoja wa viongozi maarufu wa karne hii'. Hivyo ndivyo alivyosema Bi. Albright uwanja wa Taifa (sasa uwanja wa uhuru) wakati wa hafla ya kuaga mwili wa Baba wa Taifa Hayati Mwl. Nyerere.