Dar es Salaam. Waziri wa Nchi Ofisi ya Rais (Uhusiano na Uratibu), Stephen Wassira amesema Mpango wa Matokeo Makubwa Sasa (BRN), umepata mafanikio makubwa ikiwa ni mwaka mmoja tangu ulipoanza kutekelezwa.
Wassira alisema hayo juzi alipokuwa akiwasilisha Rasimu ya Mpango wa Maendeleo wa Taifa kwa Mwaka wa Fedha wa 2014/15.
Alisema mafanikio yaliyopatikana katika sekta ya elimu ni kuongezeka kwa ufaulu wa mtihani wa kidato cha nne kutoka asilimia 43.08 mwaka 2012 hadi asilimia 58.25 mwaka 2013.
"Ngazi ya elimu ya msingi ufaulu umeongezeka kutoka asilimia 31 mwaka 2012 hadi asilimia 50 mwaka 2013. Tumeongeza maabara katika shule za kata, kuanza ukarabati wa shule kongwe za kitaifa na kukamilisha ujenzi wa miundombinu katika shule 56 kati ya 264 za awamu ya kwanza," alisema.
Katika kilimo, alisema mafanikio ni kutoa mafunzo ya kuendesha skimu ya umwagiliaji kwa maofisa 95 na wakulima 95, kupata hatimiliki za mashamba makubwa mawili ya Bagamoyo na Mkulazi (Rufiji), kutoa hati za kimila kwa mashamba madogo 185 na kutoa mafunzo kuhusu biashara.
Wassira alisema katika nishati mafanikio yaliyopatikana ni wateja wapya 138,931 kuunganishiwa umeme ikilinganishwa na lengo lililowekwa la kuwaunganishia wateja 150,000 kwa mwaka 2013/14.
"Tumepunguza upotevu wa umeme kutoka asilimia 21 mwaka 2012 hadi asilimia 19 mwaka 2013," alisema.
Katika sekta ya uchukuzi, Wassira alisema Serikali imeongeza ufanisi katika Bandari ya Dar es Salaam kwa kuhudumia zaidi ya tani milioni 13, Desemba mwaka jana, ikilinganishwa na tani milioni 12, Desemba mwaka 2012.
"Katika Reli ya Kati, Serikali imekamilisha ujenzi wa madaraja matatu, uundwaji upya wa vichwa vitatu vya treni na kuendelea na uundaji wa vichwa vitano, kukamilisha malipo ya vichwa 13, mabehewa ya mizigo 274, mabehewa 34 ya breki na toroli 30 za umeme," alisema Wassira.
Alisema katika sekta ya maji, mafanikio ni ujenzi wa vituo vya kuchotea maji 9,644 na kuhudumia wananchi milioni 2.3 waishio vijijini ikilinganishwa na watu 300,000 hadi 500,000 awali.
Katika ukusanyaji wa mapato, Wassira alisema Mamlaka ya Mapato Tanzania (TRA), imeanza kutumia kifaa bora cha uthaminishaji wa bidhaa na kutoa makadirio bora zaidi ya viwango vya kodi. Mpango huo wa BRN umegawanywa katika maeneo sita ambayo ni elimu, kilimo, maji, nishati, utafutaji wa rasilimali fedha na uchukuzi.