Kama kuna waziri ninayemhurumia sana kwenye Baraza la Mawaziri lililoundwa na Rais Jakaya Kiwete, basi ni John Magufuli aliyetwishwa majukumu mazito ya kutandika mkeka kwenye barabara zote hapa nchini.
Namhurumia Waziri Magufuli kwa kuwa hawezi kabisa kufikia ndoto zake za kuifanya Tanzania ing'are kwenye medani za kimataifa kama nayo ni moja ya nchi maskini inayojitutumua katika ujenzi wa barabara za lami.
Kwangu mimi naziita barabara za mkeka kwa kuwa zinafanya kazi ya kuanika unga wa muhogo ukisha kauka thamani ya mkeka huishia hapo, unakunjwa na kuwekwa kwenye kona ya chumba ili kusubiri unga mwingine na wanaofaidi unga huo hukumbuka mkeka siku unga ukiisha.
Leo nataka niseme na Dk. Magufuli najua ni mmoja wa mawaziri wachapa kazi kweli kweli lakini kwa bahati mbaya amefungwa kitambaa cheusi usoni hajui hatima ya barabara zetu na mwisho wake ni nini.
Bahati nzuri waziri huyo amekuwa bingwa wa kuwa na takwimu za kutosha za kile kinachoendelea kuhusu ujenzi wa barabara zote hapa nchini, akiimba moja baada ya nyingine na majina ya wakandarasi anayataja mithiri ya watoto wake.
Dk. Magufuli pia ni bingwa wa kujua na kukariri shughuli karibu zote zinazofanywa na wizara yake na naweza kusema ni mmoja wa mawaziri aliyefanikiwa kuzigusa na kuzikoga nyoyo za marais alimgusa Rais wa awamu ya tatu, Benjamin Mkapa na sasa anaendelea kukonga nyoyo za Rais Jakaya Kikwete kila linapotokea tukio la uzinduzi wa barabara na madaraja.
Pia huzikonga nyoyo za wananchi ambao kwa bahati nzuri miradi ya barabara imefanikiwa kupita katika maeneo yao licha ya upande wa pili wananchi wameumizwa na sheria ya akiba ya barabara na kuonekana kuwa kero kubwa kwao kwa kila aliyejenga jirani na barabara.
Huko sitaki kuingilia sana najua kuwa uamuzi wa kuwepo kwa upana wa kiasi gani kutoka upande mmoja wa barabara hadi mwingine si maamuzi ya Waziri Magufuli ni maamuzi ya sheria zilizopitishwa na Bunge ili kuwa na barabara zenye viwango hilo halina ubishi.
Namhurumia Dk. Magufuli kwa kuwa jitihada za kuimba takwimu na idadi ya barabara zinazoendelea kujengwa, madaraja na vivuko kazi hiyo kwa ujumla wake si rahisi kwenye nchi inayojaribu kujiondoa kwenye lindi la umaskini wa kujitakia na kufikiria kuwa siku moja Tanzania itakuwa miongoni mwa nchi tajiri.
Sawa barabara zetu zinaendelea kujengwa kwa kasi, zinatofautiana kwa viwango na ubora kutokana na aina ya makandarasi waliopatikana na wao pia wanatofautiana kwa dhana za kazi na utaalamu kutoka nchi moja kwenda nyingine kulingana na namna walivyopatikana.
Hilo la makandarasi nalo siliingilii sana kwa kuwa nafahamu jinsi Wakala wa Barabara hapa nchini (TANROADS) ni mabingwa pia wa kutoa zabuni za ujenzi wa barabara na madaraja kwenye makampuni yenye sifa ndiyo maana barabara zetu hazidumu kwa muda mrefu.
Kwa nini barabara zetu licha ya kuwa na wataalamu wenye sifa na makandarasi wa kimataifa, iweje zianze kuharibika kabla nyingine hazijazinduliwa, ni nini kinachosababisha barabara ziwe mbovu kwa muda mfupi? Hapo ndipo ninapoanza kumuonea huruma Waziri Magufuli.
Sasa tatizo nini na kwa nini leo hii nimuonee huruma Dk. Magufuli na barabara zake? Hivi kwa nini nimuonee huruma na madaraja yanayojengwa kutoka Tunduma hadi Sumbawanga? Kuna nini hapo? Pole sana Magufuli.
Nakupa pole kwa kuwa hujui kuwa umefunikwa kitambaa cheusi usoni, pengine hajui kuwa mkeka unaondelea kuuanika wanaokula unga ni wengi. Hawajui thamani ya mkeka na hawajui mtu aliyeusuka mkeka huo ndiyo maana ukitumika kuanika unga haijulikani lini utakumbukwa.
Sasa nikuambie kuwa watu wanaoharibu barabara zetu zinazojengwa kwa gharama kubwa si wengine ni wamiliki wa malori makubwa ya mizigo, naweza kusema kuwa adui mkubwa wa barabara za Watanzania ni magari makubwa ya mizigo.
Utafiti nilioufanya katika barabara zote kuu, tatizo kubwa la uharibifu wa barabara na madaraja ni magari makubwa ya mizigo, hakika hatuwezi kufika popote kwa mwendo huu wa kupitisha kwa siku magari zaidi ya 5,000 kutoka Dar es Salaam hadi Tunduma, kutoka Dar es Salaam hadi Arusha, kutoka Dar es Saalam hadi Mwanza.
Kila barabara hapa nchini zinaumizwa kwa kiasi kikubwa na uzito wa magari hayo yanayobeba bidhaa mbalimbali kutoka ndani ya nchi na nje, mizani zinazoendelea kujengwa hazisaidii kitu, hazizuii magari makubwa ya mizigo kupita.
Mizani za barabarani zimekuwa kero kubwa kwa mabasi ya abiria wanapita, kwenye mizani kwa uzito wa tani 10 hadi 18 huku malori yakiwa yanapitisha mizigo ya uzito kati ya tani 60 hadi 70. Kwa jibu la haraka ni magari ya aina gani yanayostahili kupita kwenye mizani?
Kama tumegundua au nimegundua kuwa adui mkubwa wa barabara ni magari makubwa ya mizigo, hiyo mizani imejengwa kwa ajili ya kupima nini, barabara karibu zote zinazounganisha mkoa na mkoa haziwezi kudumu kwa kuwa utitiri mkubwa wa magari ya mizigo si mkombozi wa barabara zetu.
Nakuonea huruma Dk. Magufuli kwa kuwa tumeua reli zetu ili tufanye biashara ya usafirishaji kwa njia ya barabara, madhara yake ni makubwa zaidi kwa nchi inayojaribu kujikomboa kiuchumi kama Tanzania, hatuwezi kufika popote pale kwa hasara kubwa inayofanywa na magari hayo.
Angalia jinsi mizigo mizito inavyosafirishwa kwa njia ya barabara inavyochangia kuharibu na kutia hasara ambazo Dk. Magufuli inawezekana haoni kuwa nyingi zimegeuka kuwa na vibiyongo, zina nundu na mashimo yasiyoweza kuzibwa.
Kwenye miinuko ya milima na miteremko barabara za lami zimeshindwa kuhimili uzito wa mizigo, zinagawanyika katikati hali ambayo inahatarisha zaidi usalama wa abiria wanaosafiri kwenye mabasi, maeneo kama hayo ni hatari lazima mabasi na magari madogo yahame njia na mengine mengi yamekuwa yakipata ajali.
Kuna maana gani ya kuzidi kuruhusu shaba nzito kutoka Zambia kuja Bandari ya Dar es Salaam isafirishwe kwa njia ya barabara wakati Reli ya Tazara ipo? Kuna sababu gani ya kusafirisha mbao kutoka Malawi hadi Dar es Salaam wakati reli hiyo ipo.
Kuna sababu gani ya kusafirisha saruji kutoka Tanga kwa magari mazito ya mizigo wakati reli ipo? Kuna sababu gani ya kusafirisha saruji kutoka Mbeya hadi Dar es Salaam kwa malori huku mabehewa ya kubebea mizigo yakiendelea kuota kutu? Ni nini kipo nyuma ya pazia kuhusu malori hayo?
Dk. Magufuli utajenga barabara ngapi zinazoendelea kuharibika kila siku huku ukijua kuwa reli zipo? Unawajua vizuri wamiliki wa magari hayo? Nini siri ya biashara hiyo ya usafirishaji kwa njia ya barabara? Nakuonea huruma kwa kuwa tambo na takwimu zinazomfurahisha rais si suluhu ya matatizo ya wananchi na mustakabali wa uchumi wa nchi.
Sura yako ya ucheshi na ukarimu ielekeze kwa waziri mwenzako wa uchukuzi, Dk Harrison Mwakyembe, mwambie: "Safirisha mizigo mizito kwa reli, meli na ndege, barabara zangu zinaumia, zinabomoka, mbona hunionei huruma?" Mwambie Mwakyembe akuonee huruma, huwezi kufika popote, malori haya ni balaa kwa uchumi wa nchi. Kama ndio ufahari mwambie Rais Kikwete kuwa nchi inaliwa
|
|
