Mgombea wa nafasi ya Urais wa Jamhuri ya Muungano wa Tanzania kupitia tiketi ya Chama Cha Mapinduzi CCM Dkt. Samia Suluhu Hassan amesema kwa miaka mitano iliyopita, serikali ya awamu ya sita imefanikiwa kuongeza pato la Wavuvi kutoka Shilingi Bilioni tisa na Milioni mia nne hadi kufikia Shilingi Bilioni thelasini na nane na Milioni mia nne na hivyo kukuza ajira na pato la wananchi.
Dkt. Samia amebainisha hayo leo Alhamisi Oktoba 09, 2025 Bunda Mjini Mkoani Mara kwenye Mkutano wake wa kampeni Mkoani humo, akiahidi pia kuendelea kuongeza nguvu kwenye sekta ya uvuvi na kilimo pamoja na ujenzi wa Viwanda vya kuchakata mazao ya kilimo na ufugaji kama ilani ya CCM ya 2025/30 inavyomuelekeza.
Amezungumzia pia utekelezaji wa ujenzi wa skimu za umwagiliaji, utoaji wa mbolea na pembejeo za kilimo katika miaka mitano iliyopita, akisema programu hizo zimewesha kuongeza uzalishaji wa mazao ya kilimo na uvuvi na hivyo kukuza pato la mwananchi mmoja mmoja pamoja na uchumi wa Mkoa wa Mara akisema Bunda pia imechangia kukuza utoshelevu wa chakula nchini kwa kufikia asilimia 128.
Dkt. Samia pia amezungumzia mahitaji ya skimu za umwagiliaji kwenye Wilaya ya Bunda pamoja na Mabwawa ya umwagiliaji na vituo vya zana za kilimo, akisema ilani ya Chama Cha Mapinduzi imemuelekeza kutekeleza mambo hayo kote nchini sambamba na ujenzi wa kongani za viwanda vya kuongeza thamani mazao ya kilimo, uvuvi na ufugaji.