Aliendelea kudai kwamba, siku ya tukio, mwanamke huyo, baada ya kunywa dawa ya Babu, saa chache baadaye alianza kuhisi kichefuchefu kilichoambatana na kutema mate kwa wingi. Alianza kusikia kichefuchefu, akawa anatema mate, mwisho ikaja hali ya kutapika, ndipo nyoka mweupe alipotoka kinywani mwake na kuangukia chini, alisema shuhuda. Alisema, baada ya tukio hilo, mwanamke huyo alijisikia mzima wa afya na kuamini amepona tatizo la tumbo lililomtesa miaka nenda, rudi. Aliendelea kusimulia kuwa, kwa upande wake, Saumu, yeye alikuwa kwenye foleni akifukuzia kikombe cha Babu kutokana na matatizo ya kutopata ujauzito tangu ameolewa. Alidai kwamba, saa chache baada ya kunywa dawa ya Mchungaji Masapile, alianza kuhisi tumbo kuvimba na kuwa kubwa mfano wa mjamzito. Shuhuda huyo alisema kuwa, ilifika mahali alipoeleza anavyojisikia, baadhi ya wanawake walimwambia ni mimba jamko ambalo lilisumbua akili ya Saumu akiamini haiwezekani apate ujauzito baada ya kupata kikombe. Aliendelea kudadabua kwamba, baada ya tumbo kukua zaidi, alianza kuhisi maumivu makali ambapo alipoyasimulia, wanawake walimwambia ni dalili ya uchungu wa kuzaa. Alidai kuwa, kilifika kipindi kingine kwa mwanamke huyo ambapo alisaidiwa ili ajifungue lakini cha ajabu, lilitoka pande la nyama kama kilo moja ya steki ya ngombe na kuwafanya watu kubaki vinywa wazi.
Baadhi ya watu walioshuhudia matukio hayo walisema kuwa, sasa wanaamini dawa ya Babu inaponya hata magonjwa ya kurogwa wakidai matukio yote mawili ya wanawake hao yametokana na nguvu za giza.
Hawa matatizo yao si ya kidaktari, itakuwa nguvu za giza. Naamini dawa ya Babu inaponesha hata mtu aliyerogwa, alisema mwanaume mmoja ambaye yuko kwa Mchungaji huyo kwa ajili ya mkewe anayesumbuliwa na presha mara kwa mara. Hivi karibuni, Babu alitamka kuwa, ili mtu apone kwa kutumia dawa yake anatakiwa kutanguliza imani ya kiroho huku akijifagilia kwamba, tiba yake ina mkono wa Mungu kwa asilimia mia moja.
Maandiko Matakatifu ya Wakristo (Babu ni muumini wake) yanasema kwa Mungu hata nguvu za giza zinashindwa.