Herbalist Dr MziziMkavu
Platinum Member
- Feb 3, 2009
- 43,114
- 34,956
Inspekta Jenerali wa Polisi (IGP), Said Mwema
Inspekta Jenerali wa Polisi (IGP), Said Mwema, ameunda timu maalum ya operesheni na upelelezi kuongeza nguvu kwa polisi wa Mkoa wa Arusha pamoja na timu ya wataalamu iliyoundwa na Kamati ya Ulinzi na Usalama ya Mkoa, kuchunguza vurugu za uvamizi wa mashamba ya wawekezaji wilayani Arumeru kunakofanywa na mamia ya wananchi wilayani humo.
Naibu Kamishina wa Polisi kutoka makao makuu ya jeshi hilo jijini Dar es Salaam, Isaya Mngulu, alisema hayo wakati akizungumza na waandishi wa habari jijini hapa juzi jioni.
Inspekta Jenerali wa Polisi ameunda timu maalum kutoka makao makuu ya polisi kuja kuongeza nguvu na kuhakikisha wahusika wa vurugu hizo wanakamatwa, alisema na kuongeza timu hiyo itashirikiana na maofisa wa ngazi mbalimbali wilayani Arumeru na mkoani hapa.
Hata hivyo, Mngulu hakusema idadi ya watu wanaounda timu hiyo, lakini alisema itakuwa chini ya uongozi wake na kwamba itaendelea kufanya kazi wilayani humo kwa muda usiojulikana hadi hapo itakapopata tija.
Tunataka kusaidia ili mafanikio yapatikane mapema na kurejesha eneo hili katika hali yake ya utulivu tunatoa wito kwa wananchi ambaye ana taarifa kuhusu vitendo hivi vya uvunjifu wa amani ambavyo vimetokea wasisite kutoa taarifa za siri kwa polisi, mkuu wa mkoa, watendaji wa kata au makatibu tawala wa wilaya na mkoa, alisema.
Mapema wiki iliyopita, Mkuu wa Mkoa wa Arusha, Magesa Mulongo, aliunda timu ya wataalam watano ili kufanya uchunguzi na kuyapatia ufumbuzi matatizo ya uvamizi yaliyofanywa katika shamba la Dolly Estate Ltd, linalomilikiwa na mwekezaji wa kigeni Jerome Bruins.
Akizungumzia uvamizi huo wa mashamba, Mngulu alisema wawekezaji wanamiliki maeneo hayo kisheria hivyo utawala wa sheria unataka kila mtu
atii, hivyo kwenda kinyume cha hapo hatua za kisheria zitachukuliwa.
Alifafanua kuwa zipo njia ambazo wananchi wanaweza kuzitumia kuwasilisha malalamiko yao serikalini ya kukosa maeneo suala ambalo likifanywa kisheria linaweza kumshawishi Rais kutengua umilikishwaji wa mashamba hayo badala ya kuvumia nguvu kwa kuvamia.
Watu hawaelewi kwamba tumeongezeka, hivyo ni vema sasa hivi wananchi wakafuata taratibu, kanuni na sheria za ardhi badala ya kuvamia na kusababisha wengine kupoteza maisha ukienda mbali utaona hao wanaovamia si wote wana uwezo wa kuendeleza maeneo hayo, alisema.
Alisema sasa hivi watu wanawavamia wawekezaji lakini siku itafika wataanza kuvamiana wenyewe kwa wenyewe, hivyo ni vema wananchi wanaohitaji maeneo wakafuata utaratibu wa kisheria kutengua umiliki wake.
Kwa upande wake Kamishina Msaidizi wa Polisi, Engelbert Kiondo, kutoka makao makuu ya polisi, ambaye ni mkuu wa kitengo cha Polisi Jamii, alisema wamekuja mkoani hapa kujua kitaalam kibisa kiini cha matatizo ya uvamizi huo ili waweze kupata tiba yake.
Kama kiini ni siasa au ardhi tunataka kujua hilo siasa ndiyo inayotoa dira nani azalishe nini, amiliki nini na apate nini hivyo huwezi kukwepa siasa katika uvamizi huo, alisema.
Alisema wanatarajia kuwapa wananchi elimu ya kuchambua kauli mbalimbali za kisiasa zinazotolewa na viongozi wa siasa ili wasikurupuke na kufanya uvamizi.
Wilaya ya Arumeru ina jumla ya mashamba makubwa 19 ya wawekezaji wa ndani na nje na kuanzia Aprili 15, mwaka huu, kumekuwa na mfululizo wa matukio ya uvamizi ambapo hadi kufikia jana mashamba matatu ya wawekezaji yamekwisha kuvamiwa na kusababisha uharibifu wa mali na miundombinu.
SOURCE: NIPASHE