Juzi katika kile CCM ilichoita kujivua gamba, nilimsikia mzee Chiligati akieleza bayana kuwa wale watu wote wanaotajwatajwa kwenye kashfa za Richmondi na Dowans wajipime na kuchukua hatua za kukinusuru chama. Mimi hili nimelipokea kwa mikono miwili ila sina uhakika kama kweli mzee huyu alichotamka anakielewa au ni kutokana na furaha ya kurudi kwenye nafasi yake. Ninasema hivi kwa kuwa inapokuja suala la "wanotajwatajwa kwenye Kashfa ya Richmond na Dowans" ukiondoa mtu kama Rostam Azizi na Lowasa, Kuna baadhi ya viongozi waandamizi wa serikali ambao nao wametajwatajwa kuhusika kwa njia moja au nyingine kwenye kashfa hizo je nao tangazo hilo la kuwajibika linawahusu au siasa za kuoneana haya na unafiki zitaendelea ndani ya ccm? Maana unapozungumzia haya masuala ya Dowans, kama haki ikitumika, nafikiri serikali nzima ilihusika vilivyo kutufikisha hapa tulipo. Mzee Chiligati anataka atueleze kuwa kama ulihusika lakini hukutajwa sio tatizo, huu kwangu ni mchezo wa kuigiza maana kwa siasa hizi sasa sidhani kama ni za kukisaidia chama, maana huu ni mwanzo wa uhasama na kutakiana mabaya, sasa makundi ndani ya chama ndiyo yataibuka na sina uhakika kama ule mshikamano wa kwanza utarudi. CCM inajaribu kupiga mswaki kuondoa harufu wakati tumbo ndiyo linatatizo.