Dismiss Notice
You are browsing this site as a guest. It takes 2 minutes to CREATE AN ACCOUNT and less than 1 minute to LOGIN

Malenga wetu na sakata la Richmond

Discussion in 'Habari na Hoja mchanganyiko' started by KIM KARDASH, Dec 6, 2011.

  1. K

    KIM KARDASH JF-Expert Member

    #1
    Dec 6, 2011
    Joined: Sep 21, 2011
    Messages: 5,073
    Likes Received: 16
    Trophy Points: 135
    Nova Kambota

    Kalamu yangu nashika, shairi nakutungia

    Kamanda umeongea, kiwingu umeondoa
    Hukutaka kusinzia,makosa kuyarudia
    Jibu umetupatia, viva kamanda Lowassa

    Mwananchi nimesoma, la jana nilinunua
    Machoya yakatuama, dukuduku umetoa
    Uliyosema Dodoma, Kwakweli yanavutia
    Jibu umetupatia, viva kamanda Lowassa

    Richmond kupasua, mapema uligundua
    Kikwete ukamwambia, mkataba kuondoa
    Rais akakataa, nini alitegemea?
    Jibu umetupatia, viva kamanda Lowassa

    Nape akashikilia, lile asilolijua
    Mikoani kaambaa, uzushi kang'ang'ania
    Jinalo kulichafua, wewe ukavumilia
    Jibu umetupatia, viva kamanda Lowassa

    Mapema nilitabiri, falsafa nikapinga
    Magamba sikukariri, kuvuana sikuunga
    Ukweli niliukiri, mantiki iso kunga
    Jibu umetupatia, viva kamanda Lowassa

    Beti sita nakomea, kalamu naweka chini
    Mengi nimeongelea, soma tena kwa makini
    Yatazidi kutokea,kusini kaskazini
    Jibu umetupatia, viva kamanda Lowassa.

    Nkwazi Mhango

    Kambota nakushukuru, kwani umevua gamba,
    Kumbuka umekufuru, matapishi utaramba,
    Siku kweli ikizuru, utajiona mshamba,
    Shairi lako la hovyo, kwani wasifu fisadi.

    Kwa wachumiao tumbo, Lowassa mtu shujaa,
    Wafikirio kwa matumbo, Lowassa tiba ya njaa,
    Watapigana vikumbo, kwenda kwake ganga njaa,
    Shairi lako la hovyo, kwani wasifu fisadi.

    Hebu rudi darasani, jifunze misamiati,
    Udhaifu tabaini, uijue tofauti,
    Kamanda na marhuni, vina kubwa tofauti,
    Shairi lako la hovyo, wamsifia fisadi.

    Kama Lowassa Kamanda, basi ni wa mafisadi,
    Kwa hili sitamponda, kulhali ni fisadi,
    Kwake nilichokipenda, kukubali yu fisadi,
    Kamueleza Kikwete, kuwa sote mafisadi.

    Kambota nakushangaa, sijaona kicho chako,
    Tafuta dawa ya njaa, si kuvua nguo zako,
    Kesho kaka ni balaa, mafisadi si wenzako,
    watakutumia sana, utatupwa ja nepi.

    Kambota umenikuna, kufichua sura yako,
    Ila la maana huna, kwa huo mradi wako,
    Wamtumikia ngwena, kitoweo mwisho wako,
    Uliza waliowini, kihalali si jinai.

    Uchangu kimaadili, umegeuka mradi,
    Wachovu waona dili, kutumiwa na fisadi,
    Watupia senti mbili, kusafisha mafisadi,
    Mwisho wa siku walia, warambapo matapishi.

    Kaditamati kituo, mbele sitaendelea,
    Onyo wapiga chapuo, fisadi kunyenyekea,
    Ipo siku mlo huo, puani utatokea,
    Kambota u mmojawapo,wapi utaficha sura?


    Nova Kambota

    Lowassa Ni Msafi, Hahitaji Kusafishwa ( Jibu)
    Mjengwa naomba tena, jukwaani nirejee
    Niliyoandika jana, napenda niyatetee
    Mkuranga kimanzichana, Lowassa aendelee
    Nkwazi hujaelewa, umefakamia mada

    Mhango kajichanganya, kujibu asichojua
    Kauropoka unyanya, pasipo kulitambua
    Si hasi wala si chanya, Nkwazi kasimamia
    Mhango wajipotosha, kujibu usichojua

    Lowassa ni mtu safi, tegua kitendawili
    Angelikuwa ni ni fisi, mahakama mhimili
    Hojazo ni mufilisi, wewe ndumilakuwili
    Nkwazi rudi shuleni, kaisome CCM

    Mhango wanishangaza, ukweli kutofahamu
    Waonekana kilaza, rejea Dar es salaamu
    Kwa hoja ntakuchakaza, wewe mwana wa Adamu
    CCM huijui, fitina wamezoea

    Lowassa ni kiongozi, hili unalitambua
    Achana na upuuzi, ule walomzushia
    Usijifanye dandizi, kudandia usojua
    Nkwazi mwana Mhango, uliza nakusikia

    Beti sita natuama, nimefikia tamati
    Lowassa mtu wa maana, hodari wa mikakati
    Nkwazi soma kwa sana, tambua hizi nyakati
    Lowassa ni mtu safi, hahitaji kusafishwa.


    Nkwazi Mhango

    Kambota achaujuha, CCM siyo fani,
    Kijana acha mzaha,kunambia sina fani,
    Sema yenyemkutadha, siyo kuleta uhuni,
    Kama kakaumehongwa, tulia kula kizani

    Najua uko kazini,wataka akusikie
    Lowassa ni yakodini, lazima umsifie,
    Ila jua u kizani,ni heri ujililie,
    Kambotaunachekesha, noisome CCM!

    Sikujua tokamwanzo, ninakinzana na zoba,
    Mwenye mgandomawazo, aso kifani mjuba,
    Sikujua hamnazo,nilomvisha kikuba
    Kambota achaujuha, soma maoni ya watu.

    Wasema nirudi Dar,nipambane na mgao!
    Nani amekuhadaa,huyo kakupiga bao
    Lowassa kaka balaa,ndiye chanzo cha mgao,
    Kambota hebukomaa, mambo ya kitoto acha.

    Mie kwako nimwalimu, hilo kaka walijua,
    Kaiulize kaumu,najua wanitambua,
    Nii mwalimu wawalimu, Bongo nzima watambua,
    Kambota shikaadabu, kiatu changu huvai.

    Hata utetee vipi,Lowassa bado fisadi,
    Wenye mawazomafupi, humuona maridadi,
    Awatumia ja chupi,waona wanafaidi,
    Kambota achautani, haramu haishibishi.

    Wino umeniishia,mbele sitaendelea,
    Karima akijalia,hoja itaendelea,
    Muhimu toto sikia,adabu upate tia,
    Lowassa atakuponza,ukweli ukidhihiri.



    Nova Kambota



    MHANGO ACHA UJUHA

    Mhango acha ujuha, heshima wajishushia
    Wasababisha karaha,kuimba kuitikia
    Wajiletea jeraha,moyoni hutalilia?
    Kwa hili umechemsha, zumbukuku nakuita.

    Lowassa wamtamka, uzushi wamtungia
    Hoja zako za kubaka, maneno unadandia
    Hakika u kibaraka, leo nakupasulia
    Ikulu ya kutumia, Kikwete swahiba wako.

    Huijui Richmond, kwanini unaropoka
    Tena wajifanya fundi, huku unaweweseka
    Punguza wako upimbi, punguza kubwekabweka
    Nkwazi acha ujinga, heshima wajishushia.

    Kanada umetopea, hupakumbuki nyumbani?
    Halafu wajitetea, uhesabiwe kundini
    Tatizo lako sikia, upeo wa kiganjani
    Miaka umenizidi, Kwa hoja usithubutu.

    Wamtukana Lowassa, nini amekukosea?
    Umegeuzwa galasa, uzushi kufakamia
    Kwani kamanda Lowassa, nani alimteua?
    Nkwazi wewe mjinga, fumbo hutaling'amua.

    Hapa mwisho nagotea, tamati nimefikia
    Nkwazi nakushangaa, nini unajivunia?
    Siri zako nafichua, Ikulu yakutumia
    Nkwazi nipe jawabu, unalipwa bei gani?


    Nkwazi Mhango

    Kabota nitakubota, hata kama kiroboto,
    Yote unayolumbata, si chochote ni kokoto,
    Huna mpata na kata, nijuacho u limpyoto,
    Kabota acha unywanywa, naona unatumiwa.

    Lowassa bado fisadi, hata mmpambe vipi,
    Kambota wewe hasidi, watumika kama nepi,
    wajiona wafaidi, kumbe kesho ni makapi,
    Kabota acha unywanywa, Lowassa akutumia.

    Wauliza nalipwaje, Nani huyo anilipe?
    Sijalipwa hata punje, mie mwezio si kupe,
    Shurti nijikunje, niishi si kwa mahepe,
    Kabota acha ushamba, Lowassa atakuponza.

    Naijua Richmond, Richmond ni Lowassa,
    Kikwete ni Richmond, Richmond ni mkasa,
    Kambota nawe ni bundi, Richmond takutesa,
    Japo wachumia tumbo, Kambota acha ujuha.

    Utajaliwa ja ng'oda, Siku yako ikifika
    Ja ng'oda utakonda, Lowassa akikutoka
    Ukuuishie ukuda, ubaki kulalamika
    Fisadi hana rafiki, Jifunze kwake Lowassa

    Mambo yalipombana, Kikwete kaumuumbua,
    Hawa marafiki sana, Itakuwa wewe bua,
    Leo sana wajiona, ujinga wakusumbua,
    Kambota acha ujuha, Lowassa hasafishiki.

    Huna mpaka na nune, Kambota wala jaani,
    Leo wewe ujivune, kumbe wenda majilini,
    Sema sana utukane, itafika arobaini,
    Kambota acha ujuha, Lowassa hasafishiki.

    Kaditamati natua, mbele sitaendelea,
    Kwa hapa naomba dua, wadudi anisikia,
    Ninamuomba mulua, Kambota aone jua,
    Kambota chumia tumbo, hebu tumia ubongo.


    ROYALS
    Ninakuunga mkono, wewe mr kambota
    Tena kwa maandamano, ya Dar hadi Msata
    Ulosema ni manono, kama ya nyama ya bata
    Laigwenan msafi, wao walimchafua.



    Nova Kambota

    MHANGO WAJUA NINI?

    Nkwazi nakuuliza, nini kimekuingia?
    Mwenyewe wajishangaza, kubisha usiyojua
    Kwa hoja nakuchakaza, hili unalitambua?
    Mhango wajua nini? Zaidi ya kutumiwa?

    Nakuuliza hasidi, nijibu nikulipue
    Nitoe na ushahidi, watu wote wakujue
    Watumiwa kama pedi, kanusha nikuumbue
    Nyumba unayoringia, mimi ni mjenzi wake.

    Lowassa mchapakazi, Leigwani maridadi
    Tena yu baba mlezi, wa viwango na spidi
    Muda wake hapotezi, Kulumbana nawe kidi
    Nkwazi unachekesha kumtuhumu Lowassa.

    Unalipwa bei gani, kwanini jibu hunipi?
    Nimekutoa manani, wamung'unywa kama pipi
    Unazungumza nini?, msimamo wako upi?
    Nkwazi wanichekesha, kupungukiwa na hoja

    Richmond mali ya mtu, Kikwete namtangaza
    Punguza roho ya kutu, uongo kuutandaza
    Wewe ni kidudu mtu, kwa hoja nakuchakaza
    Mimi naitwa Kambota, "Kabota" waweweseka

    Kwa hoja nakuadhibu, tamati nimefikia
    Nakufundisha adabu, Zinduka umesinzia
    Kwa hoja wewe ni bubu, leo nakupasulia
    Nkwazi wajua nini? zaidi ya kutumiwa?


    JE KUNA MTU ANAWEZA KUINGILIA KATI MALUMBANO HAYA KWA STYLE YA MASHAIRI KAMA HAWA,NA JE NANI ANATUMIWA KATI YA HAWA MALENGA WETU??????????????????????

     
  2. k

    kilolambwani JF-Expert Member

    #2
    Dec 6, 2011
    Joined: Dec 3, 2010
    Messages: 395
    Likes Received: 1
    Trophy Points: 0
    lowasa kukwepa hili hawezi

    kilola mwana wa pwani, ebu nishike kalamu,
    niingie ulingoni, huku nikiwasalimu,
    nami nitoe maoni, kwenye huu udhalimu,
    lowasa hapa hatoki, kukwepa hili hawezi.

    Lowasa tatizo lake, nae alijiingiza,
    yeye kwa kauli zake, wizara aliagiza,
    na vile vimemo vyake, uzito viliongeza,
    lowasa hapa hatoki, kukwepa hili hawezi.

    Alipoona mkulu, ushauri hautaki,
    yeye angetunusuru, na kututendea haki,
    sheria angenukulu, na kanuni kuhakiki,
    lowasa hapa hatoki, kukwepa hili hawezi.

    Lakini akasahau, manunuzi nchi hii,
    hayahitaji nahau, yanahitaji utii,
    sheria kaidharau, kaingiza usanii,
    lowasa hapa hatoki, kukwepa hili hawezi.

    Wangefuata sheria, halisi ya manunuzi,
    isingeleta udhia, na hivyo vigugumizi,
    maana tungetambua, ni taratibu za kazi,
    lowasa hapa hatoki, kukwepa hili hawezi.

    Kufuata mizania, hupunguza matumizi,
    na gharama halisia, sisi tungezimaizi,
    thamani ya kulipia, ingefanana na kazi,
    lowasa hapa hatoki kukwepa hili hawezi.

    Sasa huo ushauri, wa makatibu wakuu,
    mbona kaufanya siri, hakutaka kunukuu,
    angeuweka dhahiri, ingekuwa ni nafuu,
    lowasa hapa hatoki, kukwepa hili hawezi.

    Lowasa mtu mahili, uamuzi atoapo,
    lakini kwa jambo hili, amenasa kama popo,
    lazima alikubali, asikwepe kwa viapo,
    lowasa hapa hatoki, kukwepa hili hawezi.
     
  3. K

    KIM KARDASH JF-Expert Member

    #3
    Dec 6, 2011
    Joined: Sep 21, 2011
    Messages: 5,073
    Likes Received: 16
    Trophy Points: 135
    Ahh mie yangu macho mashairi siyawezi,ngoja tusubiri waje wenye fani,wapi nkwazi,wapi kambota??kazi kwenu,natahakikisha hii kitu inaendelea mpaka tunampata rais mpya 2015 na kuendelea.....
     
  4. Barubaru

    Barubaru JF-Expert Member

    #4
    Dec 6, 2011
    Joined: Apr 6, 2009
    Messages: 7,163
    Likes Received: 10
    Trophy Points: 0
    Nitapita baadae.
     
  5. K

    KIM KARDASH JF-Expert Member

    #5
    Dec 6, 2011
    Joined: Sep 21, 2011
    Messages: 5,073
    Likes Received: 16
    Trophy Points: 135
    Karibu tujumuike kamanda!
     
  6. K

    KIM KARDASH JF-Expert Member

    #6
    Dec 7, 2011
    Joined: Sep 21, 2011
    Messages: 5,073
    Likes Received: 16
    Trophy Points: 135
    [h=2]Mbona malenga wetu wako kimya siku hizi mbili au mpaka lowassa avunje ukimya?[/h]
     
  7. Mwita Maranya

    Mwita Maranya JF-Expert Member

    #7
    Dec 7, 2011
    Joined: Jul 1, 2008
    Messages: 10,564
    Likes Received: 66
    Trophy Points: 145
    Mashairi yametulia haya. Inanikumbusha kipindi cha malenga wetu miaka ile tukiwa na redio ya taifa pekee.

    Tangu ziingie hizi FM stations hata sijui RTD niliipotezea wapi!
     
  8. K

    KIM KARDASH JF-Expert Member

    #8
    Dec 7, 2011
    Joined: Sep 21, 2011
    Messages: 5,073
    Likes Received: 16
    Trophy Points: 135
    Yah!kweli kabisa,enzi za kina sauti ya kiza ambae alikua akiijiita hivyo kutokana na ulemavu wa macho aliokuwa nao!jamaa alikua kiboko ya njia....
     
  9. Ndahani

    Ndahani JF-Expert Member

    #9
    Dec 7, 2011
    Joined: Jun 3, 2008
    Messages: 11,551
    Likes Received: 132
    Trophy Points: 160
    Ooooh I am rejuvinated again...this was my passion when I was in primary school! Mashairi yana radha yake bwana.
     
  10. K

    KIM KARDASH JF-Expert Member

    #10
    Dec 7, 2011
    Joined: Sep 21, 2011
    Messages: 5,073
    Likes Received: 16
    Trophy Points: 135
    Tupe mistari basi kamanda....mbona unabana?
     
  11. bucho

    bucho JF-Expert Member

    #11
    Dec 7, 2011
    Joined: Jul 13, 2010
    Messages: 4,408
    Likes Received: 89
    Trophy Points: 145
    hakyanani mmenikumbusha mbali sana . nilikuwa sipendi hiko kipindi kabisa , nilikuwa nikitoka shule mchana huyo jamaaa alikuwa ananipa kichefu chefu. ilikuwa kila nyumba nayopita namskia huyo jamaaa akisoma mashairi pamoja na harufu ya ugali unaopikwa kila nyumba kweli ilikuwa inanikata stimu sana.
     
  12. G

    Gagnija JF-Expert Member

    #12
    Dec 7, 2011
    Joined: Apr 28, 2006
    Messages: 5,548
    Likes Received: 57
    Trophy Points: 145
    Sofia Simba amewahi kutamka kuwa hakuna mwanaume kama Lowasa. Atawaoa wengi huyu.
     
  13. K

    KIM KARDASH JF-Expert Member

    #13
    Dec 7, 2011
    Joined: Sep 21, 2011
    Messages: 5,073
    Likes Received: 16
    Trophy Points: 135
    Bora wewe wengine unakuta jiko limenuna halafu malenga wetu ndio anaunguruma redioni!
     
  14. K

    KIM KARDASH JF-Expert Member

    #14
    Dec 7, 2011
    Joined: Sep 21, 2011
    Messages: 5,073
    Likes Received: 16
    Trophy Points: 135
    wapambe wake wanamwita mwanaume wao wa shoka eti!
     
  15. K

    KIM KARDASH JF-Expert Member

    #15
    Dec 13, 2011
    Joined: Sep 21, 2011
    Messages: 5,073
    Likes Received: 16
    Trophy Points: 135
    Yote kwa yote Lowassa hawezi kusafishwa kwa mashairi bali kwa kusimama hadharani mchana kweupe na kutueleza anachokijua na asichokijua kuhusu richmond,tunateseka sana na gharama za umeme hatutamsamehe alieileta richmond.
     
  16. K

    KIM KARDASH JF-Expert Member

    #16
    Dec 17, 2011
    Joined: Sep 21, 2011
    Messages: 5,073
    Likes Received: 16
    Trophy Points: 135
    Malenga wetu mpo?????mbona kimya kimezidi????????????????????
     
  17. K

    KIM KARDASH JF-Expert Member

    #17
    Feb 16, 2012
    Joined: Sep 21, 2011
    Messages: 5,073
    Likes Received: 16
    Trophy Points: 135
    Du watu wanavipaji jamani,wako wapi hawa malenga wetu?
     
Loading...