TCU yazifungia College mbili za St. Joseph University, Songea

Informer

Informer

JF-Expert Member
Jul 29, 2006
1,599
6,669
Tume ya Vyuo Vikuu(TCU) leo imefuta hati ya kuanzisha vyuo viwili vya elimu vya Chuo Kikuu cha Mt. Joseph TZ Songea kwa kutoa viwango duni vya elimu.

Vyuo vilivyofutiwa hati ni Chuo Kishiriki cha Sayansi ya Kilimo na Teknolojia na Chuo Kishiriki cha Tehama.

Wanafunzi 2,046 wanaosoma shahada na stashahada katika vyuo hivyo 2 vilivyofutiwa hati watahamishiwa kwenye vyuo vingine na Watajulishwa kupitia tovuti wa TCU.

============
KUFUTWA KWA KIBALI KILICHOANZISHA VYUO VIKUU VISHIRIKI VYA SAYANSI ZA KILIMO NA TEKNOLOJIA (SJUCAST) NA TEKNOLOJIA YA HABARI (SJUCIT) VYA CHUO KIKUU CHA MT. YOSEFU TANZANIA (SJUIT), KAMPASI YA SONGEA​

1. Tunapenda kuuarifu umma kwamba, Chuo Kikuu cha Mt. Yosefu Tanzania (SJUIT) ni mojawapo ya vyuo vikuu vilivyosajiliwa na Tume ya Vyuo Vikuu Tanzania (TCU). Chuo hiki kinamilikiwa na Shirika la Kitawa la Dada wa Maria Imakulata (DMI) pamoja na washirika wao. Hapa nchini chuo hiki kilianzishwa mwaka 2003 chini ya usajili wa Baraza la Taifa la Elimu ya Ufundi (NACTE).

Mnamo mwaka 2011, chuo hiki kiliwasilisha maombi ya kusajiliwa na TCU. Maombi hayo yaliidhinishwa na Tume tarehe 14 Desemba, 2011. Kisha tarehe 27 Septemba, 2012 kufuatia maombi ya uongozi wa Chuo, Tume iliidhinisha kuanzishwa kwa Vyuo Vikuu Vishiriki vitatu ambavyo ni: Chuo Kikuu Kishiriki cha Sayansi za Kilimo na Teknolojia (St. Joseph University College of Agricultural Science and Technology - SJUCAST), na Chuo Kikuu Kishiriki cha Teknolojia ya Habari (St. Joseph University College of Information Technology - SJUCIT) ambavyo vilianzishwa Songea; na Chuo Kikuu Kishiriki cha Uongozi, Uhasibu na Fedha (St. Joseph College of Management, Accounting and Finance - SJUCMAF) kilichopo Makambako, Njombe. Hivi sasa Chuo Kikuu hiki kina Kampasi nyingine Arusha, Boko na Luguruni, Dar es Salaam, huku Makao Makuu yakiwa katika Kampasi ya Luguruni.

2.Kwa mujibu wa kifungu cha 5(1) cha Sheria ya Vyuo Vikuu, Sura ya 346 ya Sheria za Tanzania, Tume ina mamlaka ya kusimamia na kudhibiti ubora na usimamizi wa uendeshaji wa Vyuo Vikuu hapa nchini.

3.Kwa muda mrefu katika Vyuo Vikuu Vishiriki vya Sayansi za Kilimo na Teknolojia (SJUCAST) na Teknolojia ya Habari (SJUCIT) kumekuwapo na mlolongo wa matatizo ya ubora, uongozi, ukiukwaji wa sheria na taratibu za uendeshaji wa chuo kikuu kama zilivyobainishwa na Sheria ya Vyuo Vikuu. Jitihada za Tume ya Vyuo Vikuu kukitaka Chuo Kikuu cha Mt. Yosefu Tanzania (SJUIT) kuhakikisha hivi Vyuo Vikuu Vishiriki vinatoa elimu inayokidhi viwango vya ubora vilivyowekwa na Tume hazikupewa uzito stahiki na uongozi wa chuo. Matokeo yake wanafunzi wa SJUCAST na SJUCIT wamekuwa hawapati elimu kwa kiwango stahiki. Hivi sasa katika vyuo hivi vishiriki viwili kuna jumla ya wanafunzi 2046 wanaosoma programu za digrii zifuatazo:

a)Bachelor of Technology in Agriculture [B. Tech. in Agriculture] (wanafunzi 282)

b)Bachelor of Technology in Horticulture [B. Tech. in Horticulture] (wanafunzi 61)

c)Bachelor of Technology in Agricultural Engineering [B. Tech. in Agric. Eng.]
(wanafunzi 255)

d)Bachelor of Technology in Food Process Engineering [B. Tech. in FPE.]
(wanafunzi 238)

e)Bachelor of Science with Education (wanafunzi 732)

f)Bachelor of Science in Computer Science (wanafunzi 250)

g)Bachelor of Computer Science with Education and Bachelor of Science in
Education with Computer Science (wanafunzi 196)

h)Diploma in Computer Science (wanafunzi 81)

4.Kutokana na yaliyobainishwa hapo awali, tunapenda kuuarifu umma kwamba, Tume imejiridhisha kuwa hivi Vyuo Vikuu Vishiriki viwili havitoi elimu ya chuo kikuu ya viwango stahiki. Kwa kuzingatia ukweli kwamba wanafunzi katika vyuo hivi vishiriki vya SJUCAST na SJUCIT ndio waathirika wakuu wa matatizo yaliyopo kwenye vyuo hivi, Tume imeamua kufuta kibali kilichoanzisha hivi vyuo vikuu vishiriki viwili yaani: St. Joseph University College of Agricultural Science and Technology (SJUCAST) na St. Joseph University College of Information Technology (SJUCIT); na kuidhinisha uhamisho wa wanafunzi wote waliokuwa wanasoma katika vyuo hivyo kwa gharama za Chuo Kikuu cha SJUIT.

Uhamisho huo pia unahusu wanafunzi wa mwaka wa kwanza na wa pili wanaosoma digrii za Bachelor of Technology in Agricultural Engineering [B. Tech. in Agric. Eng.] na Bachelor of Technology in Food Process Engineering [B. Tech. in FPE.] ambao hivi sasa wanasoma katika Kampasi ya Luguruni, Dar es Salaam.

5. Kufuatia uamuzi huu, wanafunzi wote wanaosoma katika Vyuo Vikuu vishiriki vya SJUCAST na SJUCIT wanaarifiwa kuwa watahamishiwa kwenye vyuo vikuu vingine vinavyofundisha programu za masomo zinazofanana na masomo wanayosoma hivi sasa chini ya utaratibu na masharti yafuatayo:

i)Wanafunzi wote wanapaswa kuondoka chuoni mara moja baada ya kukamilisha taratibu za kukabidhi mali na vifaa vingine vya chuo kwa mujibu wa taratibu zilizowekwa.

ii)Wanafunzi wote wanatakiwa kuripoti kwenye vyuo watavyopangiwa wakati wa kufunguliwa kwa muhula (semester) wa pili. Tarehe halisi ya kuanza kwa muhula wa pili kwa kila chuo watakachopangiwa itatangazwa na kuwekwa kwenye tovuti ya Tume ya Vyuo Vikuu Tanzania.

iii)Wanafunzi wote wanaosoma digrii ya sayansi za kilimo na uhandisi (programmes related to agricultural sciences and engineering) watahamishiwa katika Chuo Kikuu cha Sokoine cha Kilimo (SUA).

iv)Wanafunzi wanaosoma digrii ya ualimu wa sayansi watahamishiwa katika mojawapo ya vyuo vikuu vifutavyo: Chuo Kikuu cha Sokoine cha Kilimo
(SUA); Chuo Kikuu cha Dodoma (UDOM); na Chuo Kikuu cha Kikatoliki cha Mwenge (MWECAU).

v)Wanafunzi wote wanaosoma digrii na diploma ya sayansi ya kompyuta watahamishiwa katika Chuo Kikuu cha Sokoine cha Kilimo (SUA).

vi) Wanafunzi wote wanaosoma digrii ya ualimu na sayansi ya kompyuta watahamishiwa katika Chuo Kikuu cha Kikatoliki cha Ruaha (RUCU).

vii)Orodha ya wanafunzi waliohamishwa na majina ya vyuo vikuu walivyohamishiwa itatangazwa na kuwekwa kwenye tovuti ya Tume ya Vyuo Vikuu hivi punde.

viii)Wanafunzi wote waliohamishwa ambao hawakukamilisha mitihani yao ya mwisho wa muhula wa kwanza, au hawakufanya kabisa mitihani hiyo, watatakiwa kufanya mitihani hiyo katika vyuo vikuu watavyohamishiwa kwa utaratibu maalum utakaondaliwa na chuo husika.

ix)Kila mwanafunzi anawajibika kutunza kumbukumbu zake zote muhimu za maendeleo ya kitaaluma kwa ajili ya matumizi ya baadaye, ikiwa ni pamoja na matokeo ya mitihani aliyokwishafanya.

x)Wanafunzi wote ambao ni wanufaika wa Bodi ya Mikopo ya Wanafunzi wa Elimu ya Juu, mikopo yao itahamishiwa katika vyuo wakapokuwa wamehamishiwa.

6.Kampasi nyingine za Chuo Kikuu cha SJUIT zinaendelea na masomo kama kawaida.

7.Kwa taarifa hii, vyuo vikuu vyote nchini vinakumbushwa kufuata sheria na kuzingatia utoaji wa elimu inayokidhi viwango vya ubora vinavyokubalika kitaifa na kimataifa. Tume haitasita kuchukua hatua stahiki kwa chuo kikuu chochote kitakachobainika kutoa elimu isiyokidhi viwango vya ubora kwa kisingizio cha aina yoyote.

Imetolewa na
PROF. YUNUS D. MGAYA
Katibu Mtendaji
Tume ya Vyuo Vikuu Tanzania
19 Februari 2016 ​
 
Na Nyakongo Manyama, MAELEZO

TUME ya Vyuo Vikuu Tanzania (TCU) imefuta kibali kilichoanzisha vyuo vikuu viwili vishiriki vya Mtakatifu Joseph ambavyo ni Chuo Kikuu kishiriki cha Sayansi ya Kilimo na Teknolojia (SJUCAST) na Chuo Kikuu kishiriki cha Teknolojia ya Habari na Mawasiliano (SJUIT) vilivyopo Songea.

Akizungumza na waandishi wa habari leo katika ofisi za Tume hiyo, Katibu Mtendaji wa Tume ya Vyuo Vikuu Tanzania, Prof. Yunus Mgaya amesema kutokana na mapungufu yaliyobainishwa na Tume ambayo ni matatizo ya ubora wa elimu na ukiukwaji wa Sheria za uendeshaji wa Chuo Kikuu kama ulivyobainishwa na Sheria ya Vyuo Vikuu hii imepelekea Tume kuchukua hatua ya kufuta usajili wa vyuo hivyo.

“Kutokana na yaliyobainishwa hapo awali tunapenda kutaarifu umma kwamba, Tume imejiridhisha kuwa hivi vyuo vikuu vishiriki viwili havitoi elimu ya Chuo kikuu ya viwango stahiki na ukizingatia wanafunzi katika Vyuo hivi ndio waathirika wakubwa wa matatizo yaliyopo” alisema Prof Mgaya.

“Napenda kufafanua kwamba Vyuo vikuu vishiriki tuliyovifutia usajili ni tawi la Songea na Vyuo vingine vishiriki vya Mtakatifu Joseph vilivyopo Dar es Salaam na Arusha vitaendelea kufanya kazi kama kawaida”Alisema Prof Mgaya.

Prof Yunus Mgaya amesema wanafunzi wote wanaosoma katika vyuo vishiriki vilivyofutwa usajili wanaarifiwa kuwa watahamishiwa kwenye vyuo vikuu vingine vinavyofundisha programu za masomo zinazofanana na masomo wanayosoma hivi sasa chini ya utaratibu uliopangwa.

Amevitaja vyuo ambavyo watapelekwa wanafunzi walipo katika vyuo vishiriki vilivyofutwa usajili kuwa ni Chuo Kikuu cha kilimo Sokoine (SUA), Chuo Kikuu cha Dodoma (UDOM),Chuo Kikuu cha Kikatoliki cha Mwenge(MWECAU) na Chuo Kikuu cha Kikatoliki cha Ruaha(RUCU).

Amesisitiza kuwa orodha ya majina ya wanafunzi na vyuo watavyohamishiwa yatawekwa kwenye tovuti ya Tume hivi karibuni na wale wote wanaonufaika na Mikopo toka Bodi ya Mikopo ya Wanafunzi wa Elimu ya Juu, mikopo yao itahamishiwa katika vyuo watakavyokuwa wamehamishiwa.

Vyuo vikuu vyote chini vinakumbushwa kufata Sheria na kuzingatia utoaji wa elimu inayokidhi viwango vya ubora vinavyokubalika kitaifa na kimataifa, hivyo Tume haitasita kuchukua hatua stahiki kwa chuo kikuu chochote kitakachobainika kutoa elimu isiyokidhi viwango vya ubora kwa kisingizio cha aina yoyote.
 
Majipu ya vyuo vikuu. Elimu vyuo vikuu haendani na ukuaji wa teknolojia ya sasa. Vyuo vichache kama mzumbe sheria vinaweza kutoa wataniwa wenye uwezo wa kukumbana na changamoto za kizazi hiki, but majority ni kukaririshana past papers , no time to read books, kozi nyingi ndani ya semester moja.
Vyuo vikuu vimekosa ubunifu na hadhi kama chombo cha kutegemewa kutatua matatizo ya kijamii.
Dunia nzima integemea vigezo hivi kutoka kwa mhitimu wa chuo kikuu,
1455887617352.jpg
 
Ni kujihami tu Mgaya anajitumbua mwenyewe
Ni mara ngapi amepelekewa malalamiko na wanafunzi.."! Tena toka wakiwa mwaka wa kwanza.
Leo kasikia jirani yake loan board kantumbuliwa ndo anajiosha.!
Hivi St.Joseph Songea na Arusha zinatofauti gani... Kama syllabus ni moja na mtihani sometimes wana-share..!!
ST.JOSEPH (SONGEA=ARUSHA) ni kitu kimoja
Arusha na dar ingekuwa haina kasoro mgewamishia huko..


Sent from mTalk
 
Polen wadogo zangu... vyuo hivyi vya St joseph na Kampala ni janga kwa elimu ya Tz
 
Ngosha255 said:
Ni kujihami tu Mgaya anajitumbua mwenyewe
Ni mara ngapi amepelekewa malalamiko na wanafunzi.."! Tena toka wakiwa mwaka wa kwanza.
Leo kasikia jirani yake loan board kantumbuliwa ndo anajiosha.!
Hivi St.Joseph Songea na Arusha zinatofauti gani... Kama syllabus ni moja na mtihani sometimes wana-share..!!
ST.JOSEPH (SONGEA=ARUSHA) ni kitu kimoja
Arusha na dar ingekuwa haina kasoro mgewamishia huko..


Sent from mTalk
Click to expand...
Kwan mgaya kaingia TCU mwaka gan
 
Hiki chuo kime-survive toka lini.Walianza lini kutoa elimu ya degree na kibali walikipata wapi na siku zote hizo walikuwa wapi katika kuhakikisha elimu inayotolewa ni bora.

Nadhani TCU nayo ijitatmini
 
Huyu YUNUS D.MGAYA ndo jipu la tcu,yeye ndo anafuta vyuo na ndo yeye aliyevisajili.
Anawapanga watoto huko na kuacha UDOM kuna nafasi
 
The hammer said:
Hiki chuo kime-survive toka lini.Walianza lini kutoa elimu ya degree na kibali walikipata wapi na siku zote hizo walikuwa wapi katika kuhakikisha elimu inayotolewa ni bora.

Nadhani TCU nayo ijitatmini
Click to expand...
Vyuo hupewa usajili wa muda kama kinaanzishwa au kuanzishwa kwa kozi mpya, baada ya hapo kinakuwa chini ya uangalizi kabla hakijapata usajili wa kudumu.
 
Vipi kuhusu wanafunzi wanaosoma mwaka wa tatu na wale mwaka nne
Maana hawaja onyesha kuwa na watawahamisha au watabaki pale kumalizia masomo Yao?
 
ilonga said:
Vyuo hupewa usajili wa muda kama kinaanzishwa au kuanzishwa kwa kozi mpya, baada ya hapo kinakuwa chini ya uangalizi kabla hakijapata usajili wa kudumu.
Click to expand...
Kile chuo kimeanza 2004 na kilikuwa kimepata usajili,sasa sijui hapo alaumiwe nani
 
Sasa waende SUA wakafundishwe nini maana ya elimu!!! Nawaonea huruma..Kazi wanayo kwa kweli!!!
 
You must log in or register to reply here.

Similar Discussions

Back
Top Bottom
Forums
New posts
Post thread
Back