Wakati mtoto wa Kitanzania mwenye umri wa miaka 10, Ayubu Shaaban, alipopanda jukwaani katika Taasisi ya Confucius katika Chuo Kikuu cha Dar es Salaam, watu wachache tu katika ukumbi uliojaa watu ndio walitarajia mvulana huyo mpole angevutia hadhira kwa lugha fasaha ya Kichina.
Akiwa amevalia sare yake nadhifu ya shule, mwanafunzi huyo wa Darasa la Sita kutoka Shule ya Msingi na Chekechea ya Longquan Bodhi alizungumza kwa kujiamini na utulivu mkubwa wakati wa Shindano la sita la Daraja la Kichina la Ustadi wa Lugha ya Kichina kwa Wanafunzi wa Shule ya Msingi na Shindano la tatu la Ustadi wa Kichina katika Shule ya Msingi ya Tanzania.
Dakika chache baadaye, shangwe lililipuka ukumbini huku wasimamizi wakimtangaza Shaaban kama mshindi wa jumla wa shindano hilo, ambalo liliwashirikisha wanafunzi 12 wenye umri wa miaka tisa hadi 13 kutoka shule za Dar es Salaam, Dodoma, Lindi, na Zanzibar.
"Nilipotangazwa kuwa bingwa, sikuamini masikio yangu, na hapohapo machozi ya furaha yakaanza kutiririka," Shaaban aliiambia Xinhua muda mfupi baada ya kupokea kombe lake, cheti, na zawadi ya pesa taslimu.
Akishikilia kombe la dhahabu kifuani mwake, Shaaban alisema kujifunza Kichina kwa yeye anaona ni zaidi ya shughuli ya shule.
"Kichina ni ufunguo wa kufungua mlango wa fursa," alisema huku akitabasamu. "Ndoto yangu ni kuzungumza Kichina kama Wachina wa huko Beijing."
Bingwa huyo mchanga sasa anatarajia kusafiri kuja China kuiwakilisha Tanzania katika fainali za kimataifa za shindano hilo, ambalo waandaaji wanasema ni fursa inayoweza kubadilisha maisha ya wanafunzi wanaoshiriki.
Kwa Shaaban, ushindi huo ulikuwa hatua nyingine muhimu katika safari iliyoanzia madarasani mwa Shule ya Msingi na Chekechea ya Longquan Bodhi, shule binafsi jijini Dar es Salaam, ambapo wanafunzi hufundishwa lugha ya Kichina pamoja na elimu ya maadili na utamaduni.
"Katika miaka iliyopita, mabingwa wetu wametoka katika shule hii," alisema Xian Hong, mkuu wa shule hiyo. "Mwaka juzi tulikuwa na nafasi ya kwanza na ya pili, na mwaka huu tena tumeshinda ubingwa."
Xian alisema mafanikio ya shule katika mashindano ya lugha ya Kichina katika miaka ya hivi karibuni yalitokana zaidi na kujitolea kwa walimu wa kujitolea wa Kichina ambao hutumia muda wao kuwanoa watoto hawa wa Tanzania.
Akizungumza wakati wa shindano hilo, Flora Magige, kaimu naibu mkuu wa Chuo Kikuu cha Dar es Salaam, anayehusika na taaluma, alielezea tukio hilo kama jukwaa muhimu la kukuza vipaji vya vijana.
"Lengo la shindano hili ni kupima uwezo wa wanafunzi katika kuzungumza, kuimba, na kuelewa lugha na utamaduni wa Kichina," Magige alisema.
Alibainisha kuwa kuanzisha ujifunzaji wa lugha ya Kichina katika ngazi ya shule ya msingi kunaweza kusaidia kutoa wataalamu wa siku zijazo wenye uwezo wa kuchangia maendeleo ya Tanzania na kuimarisha ushirikiano wa kimataifa.
"Tunaamini kwamba kama watoto hawa wataanza kujiimarisha kutoka ngazi ya msingi, watakuwa na uwezo mkubwa sana watakapojiunga na chuo kikuu," alisema.
Che Zhaoguang, mwambata wa mambo ya utamaduni katika Ubalozi wa China nchini Tanzania, alisema mashindano ya Daraja la Kichina yanaonyesha utashi unaoongezeka miongoni mwa vijana wa Tanzania wa kujifunza Kichina huku uhusiano kati ya nchi hizo mbili ukiendelea kupanuka.
Che pia alibainisha kuwa mashindano hayo yamekuwa jukwaa zuri lililoanzishwa kwa wanafunzi nchini Tanzania kuonyesha ujuzi wao wa lugha na uelewa wa kitamaduni.
"Lugha ya Kichina si somo au karatasi ya mtihani tu," Che aliwaambia washindani. "Lugha ya Kichina inaweza kuwa mabawa unapotaka kuruka, au mnara unaposafiri baharini, au ngazi unapopanda kilele cha Mlima Kilimanjaro katika maisha yako ya kielimu na kitaalamu."
