figganigga
JF-Expert Member
- Oct 17, 2010
- 25,492
- 54,890
Maafisa Utumishi wa Halmashauri ya wilaya ya Kwimba wamesimamishwa kazi kwa kosa la kutosimamia vyema zoezi la uhakiki wa vyeti vya ufaulu wa elimu ya Kidato cha nne, sita na ualimu.
“Nimemuagiza Mkurugenzi Mtendaji wa Halmashuri ya Wilaya ya Kwimba Pendo Malabeja kuwasimamisha kazi na kuwachukulia hatua za kinidhamu Mkuu wa Idara ya Utawala na Rasilimaliwatu Christina Bunini na Wasaidizi wake wane (4) ambao ni Edward Cornel, Rey Lema, Julius Kiduli na Clavery R.M,” alisema Katibu Mkuu, Ofisi ya Rais, Menejimenti ya Utumishi wa Umma, Dkt. Laurean Ndumbaro.
Dkt. Ndumbaro ametoa maelekezo hayo, baada ya kufanya ziara ya kikazi katika Halmashauri ya Wilaya ya Kwimba na kujiridhisha kuwa Maafisa Utumishi wa Halmashauri hiyo kutozingatia maelekezo ya kuwaondoa watumishi ambao taarifa zao walizojaza wakati wanaajiriwa zinaonesha kuwa wamehitimu na kufaulu kidato cha nne lakini wakati wa zoezi la uhakiki watumishi hao hawakutakiwa kuwasilisha vyeti husika kwa kigezo kuwa wana elimu ya darasa la saba.
“Kwa msingi huo na kwa kuzingatia kuwa Maafisa Utumishi hawakuwataka watumishi hao kuwasilisha vyeti vya elimu walizojaza wakati wanaajiriwa katika fomu ya taarifa binafsi, huko ni kukiuka na kupuuza agizo la Mhe. Rais Magufuli la kuwataka waajiri wote nchini kufanya uhakiki wa vyeti vya watumishi wa umma na kuwaondoa katika orodha ya malipo ya mshahara ya watumishi wa serikali (Payroll),” alisema Dkt. Ndumbaro.
Dkt. Ndumbaro amesema maafisa hao wameitia Serikali hasara kwa kuwaacha watumishi wasio na sifa kuendelea kuwepo kwenye (Payroll). Miongoni mwa watumishi walioachwa ni Bw. Ligwa Simando Simon aliyestaafu kwa hiari mnamo tarehe 04/01/2010 na Fundi Sanifu Mkuu Bw. Kalala Elieza Seleman ambaye amekiri kufanya udanganyifu kwa Katibu Mkuu-UTUMISHI Dkt. Ndumbaro baada ya kukutana nae katika Ofisi ya Mkurugenzi Mtendaji wa Halmashauri ya Wilaya ya Kwimba.
Dkt. Ndumbaro amemtaka Katibu Tawala Mkoa wa Mwanza, Kamishna wa Polisi, Bw. Clodwing Mtweve kupeleka Maafisa Utumishi wengine katika Halmashauri ya Kwimba ili kutoathiri utendaji kazi, sanjali na hilo Dkt. Ndumbaro amewataka waajiri wote nchini kuhakikisha zoezi la uhakiki wa vyeti vya watumishi linafanyika kwa umakini.
Aidha, Dkt. Ndumbaro ameanisha kuwa, suala hili litawasilshwa kwa Mamlaka ya uteuzi wa Mkurugenzi Mtendaji wa Halmashauri ya Wilaya ya Kwimba Pendo Malabeja kuona hatua stahiki za kuchukuliwa dhidi yake.