IKUNGI, Singida: Wafanyabiashara wa asali wapewa mwezi mmoja kuacha kutumia chupa za Konyagi

[Ghazwat]

Wafanyabiashara wa asali katika wilaya ya Ikungi, mkoani Singida waliopo kando kando ya barabara kuu Singida - Dodoma, wamepewa muda wa mwezi mmoja kuanzia sasa, kutumia vifungashio halisi badala ya chupa za Konyagi, ili kulinda afya za walaji

Mkuu wa Wilaya ya Ikungi, Miraji Mtaturi, ametoa agizo hilo juzi wakati akizungumza kwenye hafla ya uzinduzi wa matumizi sahihi ya vifungashio vya asali, iliyofanyika katika kijiji cha Issuna tarafa Ikungi

Alisema ufungaishaji wa asali unaofanywa na wafanyabiashara wa asali katika wilaya ya Ikungi, sio wa kuridhisha na kwa namna moja au nyingine, unachangia kuharibika kwa asali

"Ufungaishaji unaofanywa na wafugaji wetu wa nyuki, unachangia kwa kiasi kikubwa kushuka kwa soko la asali. Wafanyabiashara hawa wanaouzia asali pembezoni mwa barabara, wanafungasha asali bila kuzingatia sheria na kanuni za biashara ya mazao ya nyuki hususani asali. Nawapeni mwezi mmoja mbadilike katika ufungaishaji", alisisitiza Mtaturi

Mkuu wa Wilaya hiyo, pia amewataka wauzie asali ndani ya jengo maalum la kuuzia mazao ya nyuki ambalo toka limalizike kujengwa mwaka 2013, hadi sasa halijawahi kutumiwa.