Dismiss Notice
You are browsing this site as a guest. It takes 2 minutes to CREATE AN ACCOUNT and less than 1 minute to LOGIN

Ukiguswa nawe Gusa - Ushauri

Discussion in 'Habari na Hoja mchanganyiko' started by Mzee Mwanakijiji, Apr 11, 2008.

  1. Mzee Mwanakijiji

    Mzee Mwanakijiji Platinum Member

    #1
    Apr 11, 2008
    Joined: Mar 10, 2006
    Messages: 30,402
    Likes Received: 2,478
    Trophy Points: 280
    Wawili wapendanapo, si ajabu kugusana,
    Popote pale walipo, wazee hata vijana,
    Ije mvua na upepo, mikono watashikana,
    Fumbo kubwa la mguso, unapoguswa gusika!!

    Wengine wanashituka, pale wao wanaguswa,
    Pembeni wakaja ruka, kama wamekoswa koswa,
    Wakabakia kucheka, hawajui la kupaswa,
    Ni utamu wa mguso, unapoguswa gusika!!

    Wapo wapenda mgongo, wakakigusa kiuno,
    Kwa mbwembwe na kwa maringo, wakikenua na meno,
    Wamejawa na usongo, yamewatoka maneno,
    Mtetemo wa mguso, unapoguswa gusika!!

    Wapo wapenda kifua, wakaligusa na tumbo,
    Lengo lao twalijua, wanaamsha majambo,
    Haraka wakipumua, utadhania mgambo,
    Ladha kubwa ya mguso, unapoguswa gusika!!

    Wapo wependa kugusa, visoguswa hadharani,
    Wakayafanya makosa, wakajaitwa wahuni,
    Mkitaka kuvigusa, mjifunguie chumbani,
    Ni fahari ya mguso, unapoguswa gusika!!

    Uguse aliye wako, karibu mshikilie,
    U mguse atakako, asije akachukie,
    Wa mwenzako huyo mwiko, tamaa usiwakie
    Siri kubwa ya mguso, unapoguswa gusika!!

    Ninawasihi wenzangu, msiogope kugusa,
    Ni kipaji chake Mungu, ukiguswa nawe gusa,
    Ukaondoa machungu, na machozi kupangusa,
    Ni uhondo wa mguso, unapoguswa gusika!!

    Na. M. M. Mwanakijiji (Sauti ya Shamba)
     
Loading...