Dismiss Notice
You are browsing this site as a guest. It takes 2 minutes to CREATE AN ACCOUNT and less than 1 minute to LOGIN

~!~Sambusa ni tamu bwana~!~

Discussion in 'Jukwaa la Lugha' started by Mzee Mwanakijiji, Oct 28, 2008.

  1. Mzee Mwanakijiji

    Mzee Mwanakijiji Platinum Member

    #1
    Oct 28, 2008
    Joined: Mar 10, 2006
    Messages: 30,402
    Likes Received: 2,478
    Trophy Points: 280
    Nipeni kiti nikae, nikae na niteteme,
    Ndugu msinishangae, nililonalo niseme,
    Ya chakula cha ukae, maneno yangu nipime,
    Sambusa ni tamu bwana, hasa za kitanzania!

    Nilialikwa na Rozi, Fatuma naye Amina,
    Nikawa kama balozi, mlaji mwenye amana,
    Hawakupika mbaazi, bali sambusa kwa sana,
    Sambusa ni tamu bwana, hasa za Kitanzania!

    Ilikuwa tafrija, ya vyakula vya nyumbani,
    Chakula kimoja moja, kikajapangwa mezani,
    Mtori sinia moja, na pilau mdalasini
    Sambusa ni tamu bwana, hasa za Kitanzania.

    Pembeni wali wa nazi, na nyama ya binzari,
    Bakuli ya maandazi, yaliyopikwa vizuri,
    Sikuifanya ajizi, wa kijiji sina shari,
    Sambusa ni tamu bwana, hasa za kitanzania!

    Vyote hivyo sikutaka, nilichotaka sambusa,
    Kuleni mnavyotaka, wadada niliwaasa,
    Mkila mlivyopika, niachieni sambusa,
    Sambusa ni tamu bwana, hasa za Kitanzania!

    Ndipo nikala za Rozi, sambusa zilivoiva,
    Nilikula kama chizi, kama ninakula mbeva,
    Nikatafuna kwa pozi, utadhani mi dereva,
    Sambusa ni tamu bwana, hasa za kitanzania!

    Ndipo kaleta Fatuma, sambusa kanigawia,
    Ulimi nikajiuma, utamu kuniingia,
    Nikakumbuka Dodoma, Sambusa zake Sofia,
    Sambusa ni tamu bwana, hasa za Kitanzania!

    Ndipo akaja Amina, sambusa kunipatia,
    Funga kazi kiaina, jinsi kanipakulia,
    Nikala tena na tena, manusura kuzimia,
    Sambusa ni tamu bwana, hasa za Kitanzania!

    Kama hujala sambusa, hasa za Kitanzania,
    Hujui unachokosa, utamu wauachia,
    Jaribu hata Mombasa, bure watakupikia,
    Sambusa ni tamu bwana, hasa za Kitanzania.

    Si fumbo nililosema, msianze kuwazia,
    Wajanja mkalalama, kusema nawafumbia,
    Yote niliyoyasema, ni sambusa nasifia,
    Sambusa ni tamu bwana, hasa za Kitanzania

    Kaditamati natama, beti haziendi tena,
    Kapiga simu Rehema, mwaliko katoa jana,
    Juma lijalo kasema, ni kwake kwenda jichana,
    Sambusa ni tamu bwana, hasa za Kitanzania!


    Na M. M. Mwanakijiji (Sauti ya Kijiji)
     
  2. A

    AmaniGK JF-Expert Member

    #2
    Oct 28, 2008
    Joined: Jan 10, 2008
    Messages: 1,100
    Likes Received: 17
    Trophy Points: 135
    Mzee shukrani naona umenchokoza acha nipumzike kidogo nitarudi
     
  3. M

    Mama JF-Expert Member

    #3
    Oct 28, 2008
    Joined: Mar 24, 2008
    Messages: 2,858
    Likes Received: 15
    Trophy Points: 0
    Heshima na taadhima, uwanjani naingia,
    jama simameni wima, la mgambo limelia,
    walio kwenye mlima, mabondeni nao pia,
    Sambusa mie siili, ni heri kula muhogo.

    Sambusa iwe ya moto, utamu sikilizii
    hata majira ya joto, sambusa siililii,
    ya baridi au moto, sambusa sing'ang'anii,
    Sambusa mie siili, ni heri kula muhogo.

    Sijui utamu wake, sambusa waisifia,
    yenye mapishi ya kike, ya Rozi ama Sofia,
    Fatuma naye apike, na warembo wa dunia,
    sambusa mie siili, ni heri kula muhogo.

    Sambusa nina aleji, Mwanakijiji ifaidi,
    afadhali ninywe uji, panapo siku ya idi,
    iwe kutoka Rifiji, ama kule Bariadi,
    sambusa mie siili, ni heri kula muhogo.

    Niulize ni kwa nini, sambusa siitamani,
    ina huo walakini, wa toka enzi jamani,
    hata uweke na nini, mimi niko alejini,
    sambusa mie siili, ni heri kula muhogo.


    Muhogo nautamani, mie kwetu kijijini,
    sambusa mi asilani, ni ya nyinyi wa mjini,
    muhogo wa dizaini, sambusa mie ya nini,
    sambusa kula mwenyewe, hata ile ilo chacha.
     
  4. Mzee Mwanakijiji

    Mzee Mwanakijiji Platinum Member

    #4
    Oct 28, 2008
    Joined: Mar 10, 2006
    Messages: 30,402
    Likes Received: 2,478
    Trophy Points: 280
    mama weee..

    Mama nakupa elimu, ya vyakula vya nyumbani,
    Miogo ni kazi ngumu, mpaka uichimbe chini,
    Sambusa yajaza hamu, miogo siitamani,
    Jaribu kula sambusa, mihogo hutatamani!

    Namfahamu Saida, apenda vyote viwili,
    Miogo ni kama ada, hata yenye pilipili,
    Na sambusa bila shida, anazila mbilimbili,
    Jaribu kula sambusa, mihogo hutatamani
     
  5. M

    Mundu JF-Expert Member

    #5
    Oct 28, 2008
    Joined: Sep 26, 2008
    Messages: 2,713
    Likes Received: 19
    Trophy Points: 135
    nami ninene yakwangu, yanayotoka moyoni
    wa kijiji na mamangu, halo nawasalimuni
    hakika hili la kwangu, nalinena kwa yakini
    siitamani sambusa, wala muhogo wa shamba

    mie napenda matunda, yanayotoka mtini
    yale hayawezi vunda, mimi nawaambieni
    Adamu aliyapenda, akakiuka yamini
    siitamani sambusa, wala muhugo wa shamba

    kwa chai ya asubuhi, vyakula vikasheheni
    jamani ninawasihi, matunda jitengeeni
    kula papai la bahi, au pera la handeni
    siitamani sambusa,wala muhogo wa shamba

    matunda ya mchanyato, rafiki utamuwini
    hasa yale ya Lushoto, yalimwayo milimani
    hamtapata majuto, wapendwa yajaribuni
    siitamani sambusa, wala muhogo wa shamba

    sambusa kichefuchefu, wapikavyo siamini
    wanaweka nyama mfu, iliyokufa kundini
    miye hiyo yanikifu, kwanini waitamani?
    siitamani sambusa, wala muhogo wa shamba

    kuna mihogo michungu, yachonyota kama nini
    hata upike kwa chungu, magadi uweke ndani
    hautaila mwanangu, utawashwa mdomoni
    siitamani sambusa, wala muhogo wa shamba

    kaditama wa tamati, nimefika kituoni
    unidunde kwa manati, au konzi la kichwani
    mimi hapo hunipati, sitiwi majaribuni
    ni heri nile mabungo, nijilambe mdomoni.
     
  6. Mzee Mwanakijiji

    Mzee Mwanakijiji Platinum Member

    #6
    Oct 28, 2008
    Joined: Mar 10, 2006
    Messages: 30,402
    Likes Received: 2,478
    Trophy Points: 280
    Mundu... mambo mazito hayo... shukrani!!!!
     
  7. M

    Mama JF-Expert Member

    #7
    Oct 28, 2008
    Joined: Mar 24, 2008
    Messages: 2,858
    Likes Received: 15
    Trophy Points: 0
    Mzee mwanakijiji, asante kwa ushauri,
    sambusa wanazifoji, wanatia na shayiri,
    sitaki mie kuhoji, ulosema mhariri,
    nitajilia muhogo, huhitaji spais.

    mihogo yachimbwa chini, asili yenye ashki,
    sambusa ninaihini, abadan siitaki,
    yasagwa nyama buchani, iliyokuwa mabaki,
    nitajilia muhogo, huhitaji spais.


    Sambusa na bakteria, ni kama chanda na pete,
    spaisi ukatia, na vipande vya mkate,
    sambusa kufaidia, shuruti uipakate,
    nitajilia muhogo, huhitaji spais.


    Nachelea na magonjwa , ya sambusa ilo lala,
    jee nayo utainywa, juisiye si jaala,
    mwenzangu we utawashwa, uitupe kwa jalala,
    sambusa niya wabwanga, asilani sithubutu.
     
  8. A

    AmaniGK JF-Expert Member

    #8
    Oct 29, 2008
    Joined: Jan 10, 2008
    Messages: 1,100
    Likes Received: 17
    Trophy Points: 135
    SAMBUSA NI KITU GANI KITAMU NI KITUMBUA

    Ntakupa hata kigoda,Ili haya utambue
    Utamezea na soda,Ila lazima ujue
    Hujakutana na Rhoda,Akakupa uchague
    Sambusa ni kitu gani,Kitamu ni kitumbua

    Sambusa imekauka,Ina mafuta ya choyo
    Wakati mwingine yanuka,Haipozi hata moyo
    Yakutaka kukuruka,Ili weze tuza moyo
    Sambusa ni kitu gani,Kitamu ni kitumbua

    Kitumbua cha mafuta,Utamuwe siulize
    Hata huwezi pauka,Utang'ara nikwambie
    Kipata sichopasuka,shida zako zitatue
    Sambusa ni kitu gani kitamu ni kitumbua

    Kitumbua kama nesi,Chaponesha njaa yako
    Wala usile upesi,Utakabwa koo lako
    Kuna vile vya wadosi,Vyeupe viso ukoko
    Sambusa ni kitu gani,Kitamu ni kitumbua

    Kwa sambusa wajiuma,Je ukila kitumbua
    Muulize hata Juma,Cha Halima chasumbua
    Kina ladha iso noma,Kama jipu watumbua
    Sambusa ni kitu gani Kitamu ni kitumbua

    Chaliwa na sebuleni,Waweza kula chumbani
    Ukipata siwe soni,Usifunge yako mboni
    Alikula kaka Boni,Kaka ake dada Moni
    Sambusa ni kitu gani,kitamu ni kitumbua

    Sambusa nyingi mekula,Hakuna ilovutia
    Nikila kwanza nalala,usingizi wanijia
    Kwanza ina kilo dala,Dukani siwezi jia
    Sambusa ni kitu gani,Kitamu ni kitumbua

    Alinipa Fauzia,Kitumbua lichopikia
    Kwa kuwa ni wangu dia,Hata sikukiringia
    Wakijiji nakusia,Mwombe mina takugea
    Sambusa ni kitu gani,Kitamu ni kitumbua

    Kalamu yangu nashusha,sambusa kuikandia
    Kwanza menikumbusha,Si kitu cha kusifia
    Kitmbua chanirusha,Mwili akili pia
    Sambusa ni kitu gani,Kitamu ni kitumbua
     
  9. K

    Kandambili Member

    #9
    Oct 29, 2008
    Joined: Aug 5, 2008
    Messages: 84
    Likes Received: 0
    Trophy Points: 0
    Mwanakiji umeyachokoza hizo shukrani zito kwa mistari.
    Very interesting and impressing watu wana vipaji bwana, nakumbuka malenga wetu sijui bado hii programm ipo? maana vijiredio vimekuwa vingi mpaka tunashindwa nini tusikilize
     
  10. Maverick

    Maverick JF-Expert Member

    #10
    Oct 29, 2008
    Joined: May 29, 2008
    Messages: 308
    Likes Received: 1
    Trophy Points: 0
    Kumbe fani ya maelnga bado inadumu. Nimepata faraja kubwa mno kusoma beti za wahusika. Hongereni.
     
  11. Akthoo

    Akthoo JF-Expert Member

    #11
    Oct 29, 2008
    Joined: Nov 5, 2007
    Messages: 473
    Likes Received: 69
    Trophy Points: 45
    LOL.Leo nimefaidi kweli utamu wa sambusa, kitumbua na mhogo!
    Hongereni sana malenga wetu. Ntafurahi zaidi kama mtiririko huu utaendelea.
     
  12. Mzee Mwanakijiji

    Mzee Mwanakijiji Platinum Member

    #12
    Oct 29, 2008
    Joined: Mar 10, 2006
    Messages: 30,402
    Likes Received: 2,478
    Trophy Points: 280
    Sambusa nasasambua,
    Nakula na kucheua,
    Vingine sitochukua,
    Hizi nimezichagua.

    Nakula nikirarua,
    Nyamanyama nanyafua,
    Utamu najing'atua,
    Nikila ninachenua!

    Kamwe sili kitumbua,
    Mizizi sitochukua,
    Sambusa zanikwatua,
    Nang'ata kama halua!

    Matunda yanichefua,
    Ya miti yenye maua,
    Mbegu zinanisumbua,
    Mdomoni kuchambua!

    Sambusa nimechagua,
    Natafuna kama muwa,
    Vidole vikichambua,
    Ulimi ukirambua!

    Hakika nimegundua,
    Baada ya kuchungua,
    Jaribuni mtajua,
    Nanyi mtajishaua!

    Onjeni mtatambua,
    Sambusa mtakwapua,
    Nanyi mtazinyakua,
    Mkipewa mwachukua!

    Nililosema mwajua,
    utamue mwaujua
    kuleni kama washua,
    Sambusa nasasambua!
     
  13. SaidSabke

    SaidSabke JF-Expert Member

    #13
    Oct 29, 2008
    Joined: Sep 28, 2006
    Messages: 1,628
    Likes Received: 74
    Trophy Points: 145
    Ya leo ni kali mnazi au ulanzi lakini itanoga zaidi kama itanywewa na wisky.Bravooo
     
  14. Sanda Matuta

    Sanda Matuta JF-Expert Member

    #14
    Oct 29, 2008
    Joined: May 9, 2007
    Messages: 953
    Likes Received: 9
    Trophy Points: 0
    safi sana.
    Mashairi ya meenda shule.
     
  15. Mzee Mwanakijiji

    Mzee Mwanakijiji Platinum Member

    #15
    Oct 29, 2008
    Joined: Mar 10, 2006
    Messages: 30,402
    Likes Received: 2,478
    Trophy Points: 280
    Nasubiri vitu vyako mzee..
     
  16. Sanda Matuta

    Sanda Matuta JF-Expert Member

    #16
    Oct 29, 2008
    Joined: May 9, 2007
    Messages: 953
    Likes Received: 9
    Trophy Points: 0
    Nimekuvulia kofia Sauti ya kijiji.
    najitahidi kusoma ili nione kama nitaweza kufikia huku.naona vijana wamechachamaa.
    Ninaburudika.
     
  17. Akthoo

    Akthoo JF-Expert Member

    #17
    Oct 30, 2008
    Joined: Nov 5, 2007
    Messages: 473
    Likes Received: 69
    Trophy Points: 45
    Heko tena Mzee Mwanakijiji!!! We ni zaidi hadi sasa!
    Tunasubiri majibu kwa hamu!
     
  18. M

    Mundu JF-Expert Member

    #18
    Oct 30, 2008
    Joined: Sep 26, 2008
    Messages: 2,713
    Likes Received: 19
    Trophy Points: 135
    mwanakijiji mzee,
    watoto unilelee,
    sambusa uwamegee,
    mimi nakukatalia

    nawe mama yangu wee,
    una muhogo pekee,
    wanangu siwatengee,
    bibi watakulilia

    amani kwa mambo wee!
    eti washerehekee,
    kitumbua bei chee,
    si levo ya kwangu mie

    tunda langu kwa wazee
    wajilia kwa ushee,
    hata uwaongezee,
    nyumbani watachukua

    tafakarini mazee,
    hadithi muirejee,
    nyumbani kwangu mjee
    matunda niwapatie.
     
  19. A

    AmaniGK JF-Expert Member

    #19
    Oct 30, 2008
    Joined: Jan 10, 2008
    Messages: 1,100
    Likes Received: 17
    Trophy Points: 135
    Kidete nimesimama
    Kamwe sitashika tama
    Kwa sambusa ilo nyama
    Huwezi kunisakama

    Kitumbua hamu yangu
    Ila sio cha kizungu
    Cheusi chenye ukungu
    Chanipunguzia gundu

    Kipike pishi la pwani
    Au hata la ziwani
    Kiweke mdalasini
    Hutoacha kutamani

    Mundu unalo tunda
    Visheti au bumunda?
    Ukinipa nitasunda
    Kitumbua bado nyanda

    Kitumbua chavutia
    Kwa sharubati na bia
    Laini kwa kujilia
    Kinauzwa shingi mia

    Sambusa si kitu kamwe
    Ladha yake dome dome
    Sura yake dume dume
    Nakufanya upogome
     
  20. H

    Habarindiyohiyo JF-Expert Member

    #20
    Oct 30, 2008
    Joined: Aug 11, 2008
    Messages: 263
    Likes Received: 1
    Trophy Points: 0
    Maharage

    Sambusa na vitumbua, ni kwa ajili ya chai,
    Onja na utatambua, vyote havina uhai,
    Muhogo nao hauna, zile ladha anuai,
    Maharage ya chumvi, kwa utamu tajilamba!
     
Loading...