Dismiss Notice
You are browsing this site as a guest. It takes 2 minutes to CREATE AN ACCOUNT and less than 1 minute to LOGIN

Namlilia Mtema

Discussion in 'Jukwaa la Siasa' started by Mrimu, Mar 6, 2012.

  1. M

    Mrimu Member

    #1
    Mar 6, 2012
    Joined: Jul 23, 2009
    Messages: 5
    Likes Received: 0
    Trophy Points: 3
    (1) Poleni sana poleni, poleni tena nasema
    Nasema tena poleni, kifo cha dada Mtema
    Hiki ni kitu kigeni, naona kama sinema
    Mrimu wa Herakuli, namlilia Mtema.

    (2) Namlilia Mtema, wa Herakuli Mrimu
    Naja hapa nikihema, sikupiga hata simu
    Mwili unanitetema, kikumbuka marehemu
    Wa Herakuli Mrimu, namlilia Mtema.

    (3) Pema usijapo pema, kipema si pema tena
    Ametutoka mapema, Duniani hako tena
    Tanganyika alipema, pakawa si pema tena
    Mrimu wa Herakuli, namlilia Mtema.

    (4) Taa yetu imezima, tutaiwashaje tena?
    Macho yanitoka pima, ni giza sioni tena
    Na ulimi umekwama, nashindwa hata kunena
    Mrimu wa Herakuli, namlilia Mtema.

    (5) Poleni sana CHADEMA, Mwenyekiti na wengine
    Ni wewe Mbowe na Lema, wa Arusha si mwingine
    Na Uchaggani Kilema, Tanganyika na kwingine
    Mrimu wa Herakuli, namlilia Mtema.

    (6) Wabunge wenye heshima, mliopo Tanganyika
    Nawaita mje hima, mkutano kufanyika
    Mkaijue hatima, nchi imegawanyika!
    Mrimu wa Herakuli, namlilia Mtema.

    (7) Dada Mdee Halima, na wewe Joni Mnyika
    Wabunge wa Daresalima, mkaunde ushirika
    Nyinyi sio mayatima, ni vijana wa marika
    Mrimu wa Herakuli, namlilia Mtema.

    (8) Tanganyika nilihama, sasa niko Marekani
    Ni karibu na Bahama, visiwa Karibbeani
    Poleni sana Kahama, na wa-Rombo wilayani
    Mrimu wa Herakuli, namlilia Mtema.

    (9) Kinijalia Karima, nitarejea mwakani
    Nije Kibosho Kirima, na Holili Mpakani
    Na Usseri Kitirima, nijue mu hali gani
    Mrimu wa Herakuli, namlilia Mtema.

    (10) Mbunge wetu Halima, wa Tegeta Darajani
    Nakuomba kwa heshima, uje nilaki mwandani
    Ndege 'kisimama wima, hapo Dar uwanjani
    Mrimu wa Herakuli, namlilia Mtema.

    (11) Ikiwa wewe mzima, andamana na jirani
    Silayo au Shirima, wa Ubungo Kilimani
    Mnyika iwe lazima, asikose uwanjani
    Mrimu wa Herakuli, namlilia Mtema.

    (12) Toka uwanja wa Ndege, twende zetu Ifakara
    Tumuage Kambarage, nyinyi sasa ni vinara
    Tupite Picha-Ya-Ndege, Morogoro Barabara
    Mrimu wa Herakuli, namlilia Mtema.

    (13) Tutanunua na Mbege, kwa Wachagga wa Kimara
    'Cheze 'Iringi' na 'Rege', Moro tukifika mara
    Katu hatubebi zege, hatuujengi mnara
    Mrimu wa Herakuli, namlilia Mtema.

    (14) Mi si mtu legelege, sina kukuru kakara
    Na wala sina matege, nimesimama imara
    Sitaki mkanitege, nifikapo Ifakara
    Mrimu wa Herakuli, namlilia Mtema.

    (15) Mimi na nyinyi wajomba, tuwe kwenye msafara
    Wa Kibamba na Kwa-Komba, msitishe biashara
    Siku moja ya kuomba, hamtapata hasara
    Mrimu wa Herakuli, namlilia Mtema.

    (16) Misa Kuu tutafanya, Kilombero Ifakara
    Tutaanza kwa kufanya, ya Msalaba ishara
    Komunyo tutagawanya, kukamilisha kafara
    Mrimu wa Herakuli, namlilia Mtema.

    (17) Sasa naita malenga, hii Jamii Foramu
    Choveki sipige chenga, chukua yako kalamu
    Shairi lako kulenga, utoe zako salamu
    Mrimu wa Herakuli, namlilia Mtema.

    (18) Na Barubaru malenga, tunga tupate fahamu
    Uwajulishe wahenga, ni msiba si karamu
    Usimtume mshenga, huyo sitamfahamu
    Mrimu wa Herakuli, namlilia Mtema.

    (19) Mzee Mwanakijiji, mkulima ndugu yangu
    Najua wewe ni gwiji, la tungo za hapo tangu
    Uje basi twende hiji, Ifakara kwa dadangu
    Mrimu wa Herakuli, namlilia Mtema.

    (20) Ahsante kutufariji, Waluguru na Wasangu
    Na wa Kigoma-Ujiji, Morogoro ndio kwangu
    Hukusahau Rufiji, na wa Mtoni-Marangu
    Mrimu wa Herakuli, namlilia Mtema.

    (21) Kaditamati wa tama, nimefika ukingoni
    Bado nimeshika tama, naumia mgongoni
    Huku nanguruma kama, fisi aliye pangoni
    Mrimu wa Herakuli, namlilia Mtema.

    (22) Salamu zao 'Wakama', na watemi wa Kingoni
    Na wewe 'mangi' Maruma, Pale Moshi Korongoni
    Mle kuku wa kuchoma, mwiko kumla Kongoni
    Mrimu wa Herakuli, namlilia Mtema.


    Mwombolezaji: Mrimu wa Herakuli (Jitu la miraba minne)
     
  2. k

    kilolambwani JF-Expert Member

    #2
    Mar 6, 2012
    Joined: Dec 3, 2010
    Messages: 395
    Likes Received: 1
    Trophy Points: 0
    YU WAPI REGIA?

    1. Masikini ndugu yetu, Regia twakulilia
    Ulikuwa mwana kwetu, tuliye kutegemea,
    Kujenga taifa letu, hili la watanzania,
    Pengo ulotuachia, nani atatuzibia?

    2. Habari hatuzipati, za Arumeru jimboni,
    Watu hawana wakati, umuhimu hawaoni,
    Wa kuweka mikakati, ku-update jamvini,
    Pengo ulotuachia, nani atatuzibia?

    3. Ulikuwa ukoshapu, habari kutupatia,
    Ziwe zile za Kishapu, hata zile za Mafia,
    Wakusanya kwenye kapu, kuja kutumiminia,
    Pengo ulotuachia, nani atatuzibia?

    4. Tulidhani Josephini, nafasi angechukua,
    Kutuweka habarini, kila linalotokea,
    Lakini haonekani, wapi amejichimbia?
    Pengo ulotuachia, nani atatuzibia?

    5. Halima walibaini, kwamba angesaidia,
    Lakini yu vichakani, Kawe amejichimbia,
    Umuhimu hauoni, habari kutupatia,
    Pengo ulotuachia, nani atatuzibia?

    6. Lakini nimebaini, pengo halitazibika,
    Maana makaburini, hili walilitamka,
    Kwamba haiwezekani, pengo hili kuzibika
    Pumzika kwa amani, Regia mpendwa wetu.

    7. Mrimu wa Herakuli, ona anavyojiliza,
    Ameyajaza bakuli, machozi atililiza,
    Hana lile wala hili, ameshindwa kujikaza
    Pumzika kwa amani, Regia mpendwa wetu

    8. Amealika malenga, kuja kukuomboleza,
    Wale waishio Tanga, hata wale wa Muheza,
    Waje hapa kujipanga, hisia kuzieleza,
    Pumzika kwa amani, Regia mpendwa wetu.

    9. Na miye Kilolambwani, malenga wa tangu enzi,
    Najisikia huzuni, kumpoteza kipenzi,
    Regia wetu jamani, katuachia simanzi,
    Pumzika kwa amani, Regia mpendwa wetu

    10. Kalamu naweka chini, nimeshindwa vumilia,
    Naona giza usoni, kwa sababu ya kulia,
    Wajua nalia nini?, namlilia Regia,
    Pumzika kwa amani, Regia mpendwa wetu
     
  3. B

    Bobuk JF-Expert Member

    #3
    Mar 6, 2012
    Joined: Oct 8, 2010
    Messages: 5,812
    Likes Received: 328
    Trophy Points: 180
    Umeniharibia siku yangu.

    Umenifanya nitoke na huzuni JF siku ya leo.
     
  4. n

    ngwendu JF-Expert Member

    #4
    Mar 6, 2012
    Joined: Jun 7, 2010
    Messages: 1,968
    Likes Received: 5
    Trophy Points: 0
    she is already gone. Nothing you can change. do other things.
     
Loading...