Dismiss Notice
You are browsing this site as a guest. It takes 2 minutes to CREATE AN ACCOUNT and less than 1 minute to LOGIN

Maige anakumbuka shuka asubuhi kweupe!

Discussion in 'Jukwaa la Siasa' started by KAMBOTA, Jun 22, 2012.

  1. K

    KAMBOTA Senior Member

    #1
    Jun 22, 2012
    Joined: Mar 21, 2011
    Messages: 176
    Likes Received: 4
    Trophy Points: 0
    Na Nova Kambota
    novakambota@gmail.com
    www.novakambota.com

    Nakubaliana kwa asilimia mia moja na falsafa isemayo wenye upeo mdogo
    hujadili watu, wenye upeo wa kati hujadili matukio na wale wa upeo wa
    juu kabisa hujadili hoja tu. Hakika huu ni ukweli usio na chembe ya
    uongo ndiyo maana leo katika makala haya badala ya kumjadili yule
    waziri wa maliasili na utalii aliyepigwa chini Ezekiel Maige,
    nitajadili hoja zake anazozitoa kila uchao.

    Tangu ang’olewe kwenye nafasi ya uwaziri Maige amekuwa haishi
    kubwabwaja ovyo kiasi cha kunitia majaribuni kuanza kumfananisha na
    kilio cha mlevi aliyemwagiwa gongo yake, kwa jinsi anavyopiga mayowe
    ya “nikumbuke kikwete” sasa hata wachache waliokuwa wanamwona ameonewa
    wameshajiridhisha kuwa hakuonewa hata kidogo badala yake alistahili
    “kufilisiwa kabisa” na kufukuzwa uanachama wa CCM.

    Mimi si mshauri wa Chama Cha Mapinduzi lakini sitasita kukishauri
    chama hiko kumwajibisha mtu anayetoa kauli zinazoleta picha kuwa
    uwaziri nchi hii ni “ulaji” ndiyo maana mtu aking’olewa haachi kulia
    machozi ya mamba aliyekosa kitoweo. Mbunge huyo wa jimbo la Msalala
    huko Kahama ametabiri kuwa jimbo hilo litachukuliwa na CHADEMA mwaka
    2015.

    Ingekuwa busara endapo Maige angetwambia kama hayati Shehe Yahaya
    Hussen alimwachia mikoba ya utabiri ama la? Kwa maana haiingii akilini
    kwa Maige kuendelea kubaki ndani ya CCM anayoamini itakufa, au anataka
    tuamini uwezo wake wa kufikiri unamtuma kupanda basi analojua litapata
    ajali na yeye kufariki? Kama Maige amefikia hapa hafai kuwa hata
    “mpiga debe” wa daladala za kariakoo sembuse ubunge!

    Kwanza na hakika CHADEMA haihitaji mtabiri Maige kuitabiria itazoa
    majimbo mengi 2015, hili liko wazi CCM watake au wasitake kwa maana
    wananchi wameshachoshwa na wanasiasa “mufilisi” wa aina ya Maige na
    chama chao. Hata Maige angeimba mashairi mazuri kama Shaaaban Robert
    bado si Kikwete wala CCM yake wanaweza kumsikia kwa maana anachodhani
    kuwa CCM ingali hai ni mawazo yaliyopitwa na wakati , kilichobaki ni
    mazishi tu ya CCM.

    CCM haitakufa kwasababu Maige katabiri, bali imekufa kwasababu ya
    kupuuza walalahoi, kupeana vyeo kindugu, kuminya uhuru wa wananchi,
    kujenga shule za kata kuzalisha sifuri, ufisadi uliokubuhu,kulinda
    muungano kinguvu, kuuza madini yetu na kufukarisha wananchi. Haya
    ndiyo yameiua CCM sasa iweje Maige na wenzake wajifanye kushtuka sasa
    hivi? Hakika hili ni jaribio dhaifu la kukumbuka shuka asubuhi kweupe!

    Tunataka viongozi waseme ukweli hata kama unawagharimu kiasi gani,
    lakini ukweli unaosemwa kwa tamaa ya cheo au hasira za kunyimwa mkate
    ni unafiki mkubwa! Watu bado wanajiuliza kilichomsukuma Maige
    kujitumbukiza kwenye tasnia ya unajimu dhidi ya chama kinachompa
    “ulaji” ni kukosa cheo au udhaifu wa CCM?

    Kama tatizo ni kukosa uwaziri mbona wengi wameng’olewa lakini
    hawajataka kututapisha kwa maneno ya unafiki kutoka vinywani mwao?
    Kama anavyofanya Maige? Au Maige ameandikwa kwenye paji la uso kuwa
    sharti awe waziri? Au anayoyasema sasa kayajua baada ya kung’olewa
    uwaziri? Na iwapo CCM inashindwa kumwajibisha mtu wa namna hii basi
    haistahili kuwa hata chama cha upinzani kwenye nchi yetu! Haitakuwa
    matusi kama nikisema namfanisha Maige na nyoka aliyepigwa mkiani kisha
    anaendelea kujitikisatikisa sasa busara zinanituma ukitaka kuua nyoka
    umponde kichwa CCM wanangoja Nyerere afufuke kumshughulikia Maige!


    Naomba nimkumbushe Maige juu ya wingu la kashfa zinazomwandama za
    kujenga mjumba wa mabilioni ya shilingi? ambazo pasi na shaka
    zitamwandama milele, watanzania bado wana kiu ya kumsikia akijibu
    tuhuma hizi napengine kuomba msamaha jinsi alivyoacha maliasili zetu
    kuporwa na wageni kwa ahadi za “ten percent”.

    Watu wa aina ya Maige wanapaswa wafunge midomo sasa hususani kipindi
    hiki ambacho watanzania wameamua kuchukua hatua za kujikomboa wenyewe
    kupitia kile kinachoitwa “M4C” chini ya mwavuli wa CHADEMA. Maige
    anapojigeuza mtabiri kwasasa hana tofauti na mtu anayenunua sanda
    nzuri kwaajili ya marehemu ilihali hakumsaidia chochote akiwa mgonjwa.

    Alipopewa nafasi ya uwaziri alipaswa kuwaonyesha walalahoi kuwa Rais
    Kikwete hakukosea kumteua badala yake akajiingiza kwenye ulaji
    mwishowe kamshika “kipofu” mkono . Au alidhani uwaziri ni kuvaa suti?
    Au mikogo na tambo za “ubwana mkubwa”? Watanzania watakuwa watu wa
    ajabu kuendelea kuchakaza viwambo vya masikio yao kusikiliza kilio cha
    “mamba aliyepigwa mkuki”.

    Iwapo CCM inadai wanaotoka ndani ya chama hiko ni “oil chafu” kwa
    mantiki hiyo wanaobaki ni oil safi halafu wakaacha watu wa aina ya
    Maige kuendelea kujitafutia “cheap popularity” kwa staili ya
    kuitabiria kifo CCM basi niseme wazi kuwa na shaka sana nahii “oil
    safi” ya aina ya Maige! Hofu yangu huko tuendako gari itazima kabisa .

    Nani leo hii hafahamu jinsi makampuni ya kigeni yanavyomaliza
    wanyamapori wetu? Nani hajui misitu inavyoteketea kwa kasi ya kimondo?
    Mtu alipewa dhamana ya kusimamia haya, kashindwa kafukuzwa kazi halafu
    anataka tumsikilize ati leo amekuwa na busara ala! Busara kazichota
    wapi? kwanini Maige ajigeuze kocha wakati alipokuwa mchezaji kwenye
    mechi hiyohiyo kaachia magoli lukuki?

    Maige anadai CCM kuna fitina! Na fitina zitaua chama, hivi sasa viroja
    yaani leo hii Maige ndiyo kaliona hili ? Kwanini hakuwasikiliza kina
    Dk Salim na Sumaye 2005? Au alikuwa kaahidiwa uwaziri? Hivyo akakaa
    kimya wakati wenzake wanafitiniwa, akakenua meno kwa furaha. Sasa
    msumeno umeanza kurarua na upande B ndiyo anastuka. Hivi Maige hajui
    kwamba msumeno hukata kila upande? Kama aliyajua haya kwanini
    alalamike muda huu?

    Mimi nadhani watanzania tuseme imetosha sasa kwa hawa kina Maige ambao
    hawaishi kutukera kwa maneno ya kinafiki na kizandiki. Mara utasikia
    CCM ndiyo chama dume , mara hakuna kama CCM lakini pale vitumbua vyao
    vinapoingia mchanga utasikia kila aina ya laana dhidi ya CCM hiyohiyo
    wanalaani mpaka mapovu yanawatoka. Tuwaambie pasi na shaka kuwa muda
    wa kuwasikiliza umeisha miaka hamsini ya kuwasikiliza imeyeyuka, sasa
    ni zamu yetu wananchi kutenda wao ni watu wa kungoja matokeo mara
    ifikapo oktoba 2015.

    Maandishi tayari yameshaandikwa ukutani , si kwa majeshi au propaganda
    ni lazima maandiko yatimie. Sasa Maige yaelekea anataka kuanza
    propaganda za “kitoto” za kutaka kuwahadaa wana wan chi hii kwa maana
    nyingine anataka kuzuia unabii usitimie ala haula! Maige kakosea sana
    ! yaani anadhani uanbii unaweza kuzuiwa usitimie. Najiapiza hili katu
    hawezi.

    Badala ya kuendelea kuvumilia uasi ndani ya chama busara iwaongoze
    Mukama, Nape na timu yao kuondoa “utando wa buibui” chumbani mwao ili
    kivutie wageni vinginevyo sioni kwanini CCM iendelee kulipa posho
    watendaji wabovu wanaochekelea chama kuvuliwa nguo hadharani na mtu
    anayedhani ana hakimiliki ya uwaziri.



    Mimi ni shabiki wa watoto wakweli lakini sitamuunga mkono hata kidogo
    mtoto anayekiri ukweli mbele ya wageni kuwa baba yake amejamba au
    chupi ya baba yake imetoboka. Lolote liwalo hii ndiyo aina ya ukweli
    unaotoka kinywani mwa Ezekiel Maige kwa staili ya “Kikwete mwaga
    mboga” mimi namwaga ugali. Sasa ingekuwa busara CCM ikang’ata kuliko
    kuendelea kuitwa “jibwa koko” au mbwa kibogoyo asiyeweza kung’ata !
    CCM ina mawili kukubali kuubusu mkono ulioasi kwasababu ya hofu ya
    kuukata au imwachilie Maige aende kwa maana anachekesha walimwengu kwa
    kutaka kusuma gari akiwa ndani.


    Nova Kambota ni mwandishi na mchambuzi wa maswala ya kisiasa,
    anapatikana kwa anwani ya barua pepe novakambota@gmail.com , au waweza
    kutembelea tovuti yake www.novakambota.com
     
  2. Ruttashobolwa

    Ruttashobolwa JF-Expert Member

    #2
    Jun 22, 2012
    Joined: Feb 22, 2012
    Messages: 38,938
    Likes Received: 5,401
    Trophy Points: 280
    Maige ana haki ya kutoa maoni yake! Leo hii mnaona amekosea kutoa utabiri mzuri na waukweli?

    Mbona cdm ilivyo mkemea shibuda mlimtetea kuwa ana haki?

    Minaona maige yuko right kabisa uwaziri wa ccm ni ulaji tu.
    Na ni ukweli usiopingika 2015 cdm lazima tuibuke kidedea.
     
Loading...