Dismiss Notice
You are browsing this site as a guest. It takes 2 minutes to CREATE AN ACCOUNT and less than 1 minute to LOGIN

Kwa walimu wote

Discussion in 'Jukwaa la Elimu (Education Forum)' started by kobe mzee, Jan 6, 2012.

  1. k

    kobe mzee Member

    #1
    Jan 6, 2012
    Joined: Dec 18, 2011
    Messages: 10
    Likes Received: 0
    Trophy Points: 0
    SHAIRI HILI LINAITWA "KWA WALIMU WOTE" LIMEANDIKWA NA PROFESA KEZILAHABI MWALIMU NA RAFIKI YANGU.

    sikilizeni wimbo huu:
    nilipokuwa mtoto niliitwa
    Chacha
    kwa matamshi yangu ya sasa
    nilipokuwa kijana niliitwa Chaupele
    nilipokuwa mtu mzima niliitwa manywele
    nilipokuwa mwalimu niliitwa BURE.

    Huu utakuwa wimbo wako
    utakapostaafu urudipo nyumbani
    umelewa kangara na nyayo zako
    zikishindwa kulenga njia nyembamba vijijini.
    utakuwa kichekesho kwa watoto
    watapokuita, ticha! popote upitapo.

    kumbuka mwalimu utakapostaafu.
    mijusi watataga mayai ndani ya viatu
    vyako vilivyokwisha visigino
    na ndani ya sidiria chakavu
    zilizoshikizwa kamba kwa pini.
    mende watazaliana ndani ya chupa tupu
    za marashi na za bia.

    na manyigu yatajenga ndani ya kofia
    zilizosahaulika kutani.
    utakapokufa nge watazaliana
    chini ya jiwe juu ya kaburi lako,
    na mlevi fulani akipita atapenga
    na kupangusa vidole kwenye jiwe pweke.
    mwanzo na mwisho wako ndio huo.

    lakini wakati ungali hai
    unaweza kubadili mkondo wa maji.
    lakini kwanza tuzungumze. wewe na mimi.
    acha mioyo yetu izungumze.
    baada ya kunyanyaswa
    na kisha nusu mshahara,

    utafundisha tena nyimbo za kusifu viongozi?
    utafundisha tena ngonjera?
    utapeleka tena wanafunzi asubuhi
    wakajipange barabarani kusubiri
    mgeni afikaye saa kumi, an apitapo
    apunga tu mkono kuwatia kichaa cha shangwe
    na huku nyuma mwasambaa na njaa?

    tazama rundo la daftari mezani
    utalimaliza kwa mshahara wa mkia wa mbuzi?
    tuzungumze. ninyi na mimi.
    acha mioyo yetu izungumze.
    mkiwa waoga na kujikunya kama jongoo
    mtawekwa kwenye kijiti na kutupwa
    nje ya ua, na ndani mtawaacha
    wacheza ngoma wakitunga nyimbo mpya.

    sikilizeni walimu.
    anzeni kufundisha hesabu mpya:
    mjinga mmoja kujumlisha wezi ishirini
    ni sawa na sifuri.
    fundisheni historia mpya:
    hapo zamani za sasa
    hapakuwa na serikali.

    sikilizeni kwa makini.
    umoja hatuna:
    twasambaratika kama nyumbu.
    tulichonacho ni woga,
    na kinachotuangusha ni unafiki.
    lakini tusikate tamaa kama mbuni.
    tukiupata umoja bado tunayo silaha.
    KURA.
    SHAIRI HILI LINAPATIKANA KATIKA KITABU CHA "DHIFA"
     
  2. M

    Mr.creative JF-Expert Member

    #2
    Jan 7, 2012
    Joined: Aug 8, 2011
    Messages: 494
    Likes Received: 2
    Trophy Points: 35
    mh kuna kaukweli ukifumba macho yatatimia
     
  3. Pukudu

    Pukudu JF-Expert Member

    #3
    Jan 7, 2012
    Joined: Jan 7, 2011
    Messages: 2,806
    Likes Received: 467
    Trophy Points: 180
    swadakta hamna mtu mwenye e mail ya mkoba rais wa cwt tumtumie ujumbe mahsusi na usambazwe kwa walimu
     
Loading...