Dismiss Notice
You are browsing this site as a guest. It takes 2 minutes to CREATE AN ACCOUNT and less than 1 minute to LOGIN

Jopo la Maaskofu lakutana Mbagala, latoa tamko zito

Discussion in 'Habari na Hoja mchanganyiko' started by Kiranja, Oct 18, 2012.

  1. K

    Kiranja JF-Expert Member

    #1
    Oct 18, 2012
    Joined: May 19, 2007
    Messages: 754
    Likes Received: 4
    Trophy Points: 0
    Maaskofu19 wa KKKT wanaongoza ibada maalum katika kanisa lao lililochomwa moto na wanatarajia kutoa tamko zito wakati wowote kuanzia sasa ambalo tutawaletea hapa.

    ============
    SALAAM ZA MAASKOFU WA KKKT KWA WATANZANIA WOTE KUHUSIANA NA MATUKIO YA KUCHOMA MOTO MAKANISA YA KIKRISTO ENEO LA MBAGALA – DSM.

    Wapendwa Katika Bwana,
    Waumini wa KKKT, Wakristo Wote na Watanzania kwa Ujumla.

    Neema na Iwe kwenu na amani itokayo kwa Mungu Baba na Bwana wetu Yesu Kristo, Amina.

    Sisi maaskofu wa Kanisa la Kiinjili la Kilutheri Tanzania (KKKT), tumepokea kwa mshtuko mkubwa taarifa za matukio ya uchomaji wa makanisa katika eneo hili la Mbagala. Tumekuwa katika mkutano wetu wa Mwaka wa Lutheran Mission Cooperation (LMC) huko Moshi pamoja na vyama vyote vya Kimissioni vya Ulaya na Marekani. Tumelazimika kukatisha mkutano huo ili kufika hapa Mbagala. Tumekuja kwa madhumuni makubwa matatu:

    1. Tumekuja kuwapa pole na kusimama pamoja nanyi katika uchungu mkubwa mlio nao. Machozi yenu ni machozi yetu. Machozi yetu ni machozi ya Kristo mwenyewe aliye Bwana wa kanisa linaloteswa. Jipeni moyo kwa kuwa yeye aliushinda ulimwengu (Yohana 16:33).
    2. Tumekuja kuonyesha majonzi yetu makubwa kwa vitendo vya uvunjifu wa amani, kuporomoka kwa umoja na mshikamano wa watanzania. Huu ni msiba mkubwa, na wenye msiba ni watanzania wote, wenye dini na wasio na dini.
    3. Tumekuja kushiriki pamoja nanyi kupokea matumaini ya Tanzania mpya. Katika majivu haya yaliyotokana na kuchomwa kwa madhabahu ya Mbagala, Tanzania mpya itazaliwa. Majivu haya na machozi yenu ni rutuba ya Tanzania mpya itakayojali upendo, uvumilivu, ustahimilivu, umoja, mshikamano, uhuru wa kuabudu na dola isiyo na dini.
    Katika ujio huu wa maaskofu hapa Mbagala, hatukuja hapa kufanya haya yafuatayo:

    1. Hatukuja kuwahukumu hata kama hatukubaliani na wanaokashifu dini za wenzao, wawe na ruhusa kutoka mamlaka zilizo juu au kama wanajituma wenyewe.
    2. Hatukuja kuwahukumu hata kama hatukubaliani na wanaodhalilisha misahafu ya dini; wawe wametumwa, kutegeshewa na mamlaka zozote au kwa misukumo ya utashi wao binafsi ili kupata kisingizo cha kugombanisha madhehebu ya dini.
    3. Hatukuja kuwahukumu hata kama hatukubaliani na wanaochoma makanisa na kuiba mali za makanisa kwa kisingizio cha kumtetea Mungu. Kisasi cha dhambi hiyo tunamwachia Mungu mwenyewe aliyedhihakiwa na walionajisi madhabahu yake.
    Wapendwa wana KKKT na watukuka sana, wana na mabinti wa Tanzania ya Julius Kambarage Nyerere; kilichotokea Mbagala katika wiki ya kuadhimisha siku ya Baba wa Taifa, ni kebehi si kwa Baba wa Taifa bali ni kebehi kwetu sisi wenyewe tunaokalia kiti alichokalia Baba wa Taifa. Yeye amelala baada ya kazi njema. Apumzike kwa amani na tunu zake zifufuke katika majivu haya yaliyotokana na kuchomwa kwa amani na mshikamano wa Tanzania aliyoijenga.

    Kilichotokea Mbagala ni mateso ya kimbari, yaani mateso ya Kanisa (Persecution). Mateso haya ni matokeo ya mbegu ya magugu iliyopandwa katika bustani njema na sasa magugu hayo yanazaa matunda machungu. Dalili za mateso ya kimbari kama ilivyo kwa mateso ya kanisa; zilianza kitambo na hazikushughulikiwa na waliomrithi Baba wa Taifa. Dalili hizo ni kama hizi zifuatazo:

    • Uchochezi wa wazi kuwa taifa hili linaendeshwa na unaoitwa "mfumo Kristo", na kuwa Baba wa Taifa alaaniwe kwa yote aliyolitendea taifa hili.
    • Ubishi usio na tija juu ya idadi ya waumini wa dini mbalimbali hapa nchini na hata kudiriki kushawishi na kugomea zoezi la sensa ya watanzania. Lengo la ubishi huu ni mbegu inayoweza kuratibisha na kurasmisha mateso ya kimbari na mateso ya kanisa.
    • Matumizi mabaya ya baadhi vyombo vya habari, vyenye lengo la kujenga hofu ya kudumu na migawanyiko ya kidini miongoni mwa watanzania
    • Ukimya wa vyombo vya dola juu ya vitendo vya uvunjaji wa sheria ya matumizi ya vyombo vya habari. Kwa vyovyote vile, uvumilivu wa dola hauna maslahi mapana kwa mustakabali wa taifa letu na ni mateso ya kimbari, mateso kwa kanisa, na kwa wantanzania wote; wawe wengi dhidi ya wachache au wachache dhidi ya wengi.
    • Madai yasiyo ya kawaida na ya mara kwa mara kwa serikali inayodaiwa kutokuwa na dini. Madai hayo ni kama:


    1. Kulazimisha uvaaji wa alama za kidini katika taasisi za umma ili kurahisisha na kuratibisha tofauti za watanzania. Tunajiuliza: Likitokea la Mbagala katika mashule yetu na vyuo vya umma, watachomwa wangapi na kuuawa wangapi?
    2. Madai yanayojirudiarudia kutaka balozi za nchi fulani kufungwa hapa nchini. Madai haya yanaashiria kutaka balozi za nchi fulani tu ndiyo ziwe hapa nchini.
    3. Madai na mashinikizo ya Uanzishwaji wa mahakama za kidini hapa nchini
    4. Mashinikizo ya kidini yanayoingilia mifumo ya kitaaluma na kisheria.
    5. Mashinikizo ya kidini juu ya mfumo wa uteuzi wa watendaji wa serikali na katika ofisi za umma,
    6. Kuhoji na kupotosha juu ya ushirikiano wa serikali na mashirika ya dini katika utoaji wa huduma za kijamii hususan afya na elimu hapa nchini
    Wapendwa wana KKKT na Wapendwa watanzania wote. Hata kama wanaofanya mambo haya ya kusikitisha wametunukiwa hadhi ya kuitwa kuwa ni "wana harakati", tofauti na wanaharakati wanaotambuliwa na watanzania walio wengi, tunawiwa kuonya kwa uvumilivu wote kuwa uana harakati wao usitumike kuvunja nchi na sheria za nchi. Tanzania yenye amani na mshikamano ni tunda la dini zote, makabila yote, itikadi zote za vyama, rangi zote na hali zote za kiuchumi. Hata wasio na dini wanachangia amani ya nchi hii.

    Kwa macho na masikio yetu, tumeendelea kushuhudia vitendo vya uchomaji makanisa huko Zanzibar, Mwanza, Mdaula, Mto wa Mbu, Tunduru, Rufiji, Kigoma na sasa Mbagala. Wakati wote uvumilivu wa wakristo huenda umetafsiriwa kuwa ni unyonge na woga. Ikumbukwe kuwa hata wanyonge na waoga, hufika wakati wakasema "sasa basi" pale wanapodhalilishwa kupita kiasi. Hatuombei wakristo wafikishwe hapo.

    Tumeshuhudia wizara zetu zikivamiwa mchana kweupe na kushinikiza kuachiwa kwa watuhumiwa wa uhalifu; tumeshuhudia vituo vya polisi vikichomwa moto; mahakama zikilazimishwa kufunga shughuli zake, misikiti ikitekwa, uhai wa viongozi wa dini ukitishiwa hadharani na viongozi wastaafu wakizabwa vibao hadharani kwa sababu ya zinazoitwa harakati za kidini. Tumefikia kuhoji, watu hawa wavamie nini ndipo hatua zichukuliwe? Wachome nini ndipo viongozi wenye dhamana ya kulinda mali na uhai washtuke? Wamwue nani ndipo iaminike kuwa watu hawa ni tishio kwa usalama wa taifa letu?

    Sisi tulioitwa kwa njia ya nadhiri na viapo vitakatifu, tunawasihi sana waumini wa dini zetu na watanzania kwa ujumla, wenye wajibu wa kututii na wasiolazimika kututii, kuzingatia kuwa Mwenyezi Mungu analipenda taifa hili na watu wake. Kamwe hawezi kuliacha liangamie.

    Kwa Wakristo wote, huu ni wakati wa kuendelea kufunga na kuomba kwa ajili ya amani ya taifa hili. Mkristo wa kweli ni yule aliye tayari kuteswa kwa ajili ya Kristo na kanisa. Wakristo hatuko tayari kuua, kutesa, kulipiza kisasi ili kumtetea Kristo. Mungu wetu hatetewi kwa kuua wengine na kuchoma madhabahu ya dini nyingine.

    Katika mateso haya, kanisa litaimarika zaidi; na katika majivu haya ya Mbagala, Tanzania mpya itazaliwa na ukombozi wa kweli utapatikana. Tunawataka wakiristo wote kusamehe na kuendelea kuwa raia wema. Kushiriki kikamilifu katika kuleta mabadiliko ya kweli kwa kupitia njia sahihi zilizowekwa. Wakati wengine wanaweka mikakati ya kuchoma madhabahu, wakiristo tuweke mikakati ya kuomba na kushiriki vema katika haki zetu za uraia. Pamoja na kuwa wapole kama njiwa, imetupasa pia kuwa na busara kama nyoka (Mathayo 10:16).

    Daima tukumbuke kuwa, "KUSHINDANA KWETU SISI SI JUU YA DAMU NA NYAMA BALI NI JUU YA FALME NA MAMLAKA, JUU YA WAKUU WA GIZA HILI, JUU YA MAJESHI YA PEPO WABAYA KATIKA ULIMWENGU WA ROHO" (Waefeso 6: 12).

    Ni sisi Maaskofu wenu kwa Neema ya Mungu,

    1. Askofu Dr. Alex G. Malasusa – Mkuu, KKKT na D/Mashariki na Pwani
    2. Askofu Dr. Stephen Munga –Mkuu, D/Kaskazini Mashariki
    3. Askofu Dr. Martin Shao – Mkuu, D/Kaskazini
    4. Askofu Dr. Thomas Laizer – Mkuu- D/Kaskazini Kati
    5. Askofu Dr. Benson Bagonza- Mkuu, D/Karagwe
    6. Askofu Isaya J. Mengele – Mkuu, D/Kusini
    7. Askofu Levis Sanga – Mkuu- D/Kusini Kati
    8. Askofu Elisa Buberwa – Mkuu –D/Kaskazini Magharibi
    9. Askofu Andrew Gulle – Mkuu, D/Mashariki ya Ziwa Victoria
    10. Askofu Michael Adam –Mkuu, D/Mkoani Mara
    11. Askofu Renard Mtenji – Mkuu, D/Ulanga-Kilombero
    12. Askofu Dr. Israel-Peter Mwakyolile – Mkuu, D/Konde
    13. Askofu Job Mbwilo – Mkuu, D/Kusini Magharibi
    14. Askofu Dr. Owdenburg Mdegella- Mkuu, D/Iringa
    15. Askofu Jacob Ole Mameo- Mkuu, D/Morogoro
    16. Askofu Zebedayo Daudi – Mkuu, D/Mbulu
    17. Askofu Paulo Akyoo – Mkuu, D/Meru
    18. Askofu Charles Mjema – Mkuu, D/Pare
    19. Askofu Mteule Amon Kinyunyu- Mkuu, D/Dodoma
    20. Askofu Mteule Dr. Alex Mkumbo- Mkuu, D/Kati


    Mbagala, DSM, 18 Oktoba 2012.
     
  2. carmel

    carmel JF-Expert Member

    #2
    Oct 18, 2012
    Joined: Aug 24, 2009
    Messages: 2,842
    Likes Received: 3
    Trophy Points: 0
    Hao waliochoma hayo makanisa hawana idea ya laana itakayowazunguka wao na vizazi vyao ...hakuna kitu kibaya kama kuchoma kanisa na altare.
     
  3. t

    thatha JF-Expert Member

    #3
    Oct 18, 2012
    Joined: Apr 29, 2011
    Messages: 15,193
    Likes Received: 118
    Trophy Points: 160
    Liwe tamko la amani tu, kwa sababu kwanza tayari suala lenyewe linashughulikiwa na Serikali.
     
  4. POMPO

    POMPO JF-Expert Member

    #4
    Oct 18, 2012
    Joined: Mar 12, 2011
    Messages: 6,694
    Likes Received: 8
    Trophy Points: 135
    Na imani busaara itatawala mazungumzo yao, watoe tathimini ya gharama, tuwachangie! mambo yaishe tupige kazi.
     
  5. Maundumula

    Maundumula JF-Expert Member

    #5
    Oct 18, 2012
    Joined: Nov 4, 2010
    Messages: 7,038
    Likes Received: 24
    Trophy Points: 135
    Serikali inabidi ichukue hatua kali zaidi ili haya yasitokee tena.
     
  6. Comi

    Comi JF-Expert Member

    #6
    Oct 18, 2012
    Joined: Oct 2, 2011
    Messages: 3,350
    Likes Received: 443
    Trophy Points: 180
    Wakristu siku zote si watoa hukumu kwani hawashughuliki na mwili ambao utabaki duniani ila wanashughulika na roho ambayo itapata hukumu siku ya kiama
     
  7. Titans

    Titans JF-Expert Member

    #7
    Oct 18, 2012
    Joined: Dec 31, 2010
    Messages: 601
    Likes Received: 269
    Trophy Points: 80
    nasikia waliovamia makanisa walikula hadi sacramenti ya Bwana...mh njaa kali sana.
     
  8. L

    Lorah JF-Expert Member

    #8
    Oct 18, 2012
    Joined: Aug 22, 2008
    Messages: 1,193
    Likes Received: 2
    Trophy Points: 0
    wafia kristo tupo watoe tamko tu...
     
  9. nyabhingi

    nyabhingi JF-Expert Member

    #9
    Oct 18, 2012
    Joined: Oct 12, 2010
    Messages: 8,892
    Likes Received: 1,328
    Trophy Points: 280
    ponda ni agent wa kikwete..huwezi kujiamini kiasi hiki tanzania-the home of most brutal cops
     
  10. s

    shemaboy New Member

    #10
    Oct 18, 2012
    Joined: Jan 25, 2012
    Messages: 4
    Likes Received: 0
    Trophy Points: 3
    kisasi sio chetu bali ni cha mungu, kazi yetu wakristo ni kuwasamehe.
    Hata yesu baada ya mateso makali pale msalabani, mwishowe kabla ya kukata roho alisema, "baba uwasemehe kwa maana hawajui walitendalo".
     
  11. Kiraka

    Kiraka JF-Expert Member

    #11
    Oct 18, 2012
    Joined: Feb 1, 2010
    Messages: 2,121
    Likes Received: 239
    Trophy Points: 160
    Kama kawaida nchi ya matamko tu, mpaka sasa yamefika 100. Hivi likiwa kali itasaidia nini?
     
  12. Marire

    Marire JF-Expert Member

    #12
    Oct 18, 2012
    Joined: May 1, 2012
    Messages: 11,341
    Likes Received: 167
    Trophy Points: 160
    hakika umenena ,Nisiongeze neno nisije kuharibu ujumbe huu
     
  13. mgomba101

    mgomba101 JF-Expert Member

    #13
    Oct 18, 2012
    Joined: Oct 21, 2011
    Messages: 1,769
    Likes Received: 36
    Trophy Points: 145
    Amen..tupo pamoja na maaskofu wetu.watashindana nasi lakini hawatashinda!
     
  14. Kashaijabutege

    Kashaijabutege JF-Expert Member

    #14
    Oct 18, 2012
    Joined: Oct 20, 2010
    Messages: 2,700
    Likes Received: 13
    Trophy Points: 0
    Mama Obama, hiki ni kizazi cha nyoka. Nini kuchoma madhabau, watu wako tayari kuzini madhabauni! Pita Kinondoni makaburini usiku uone watu wanavyoyafanya makaburi na misala "piki piki". Laana hii ni kwetu sote, Wakristo na Waislam.
     
  15. M

    Mdondoaji JF-Expert Member

    #15
    Oct 18, 2012
    Joined: Mar 17, 2009
    Messages: 5,102
    Likes Received: 38
    Trophy Points: 145
    Tunawatakia kila la kheri na matamko yao ila wafahamu hii nchi ni ya Waislamu na Wakristo. Busara na hekima itumike na sio vitisho na mikwala. Kwani vijana wa kiislamu na waislamu wengi wamewachoka sio siri. Ni vema wakatafakari vizuri kitu wanachokizungumza isije kuishia tukashindwa kuishi kwa amani nchini mwetu hali ni mbaya.
     
  16. N

    Ndonya Member

    #16
    Oct 18, 2012
    Joined: Oct 14, 2012
    Messages: 34
    Likes Received: 0
    Trophy Points: 0
    Mmmmmmmh kama kweli vile, hisije ikawa mchezo wa kuyumbisha upepo wa M4C
     
  17. E

    EMMANUEL NSAMBI JF-Expert Member

    #17
    Oct 18, 2012
    Joined: Oct 25, 2011
    Messages: 402
    Likes Received: 1
    Trophy Points: 35
    Mbona wewe sasa ndio unatoa vitisho?Waache waseme walichokusudia kukisema.Wale wanaakili na ni wasomi na kamwe
    hawawezi kutoa kauli yoyote ya kuchochea vurugu.Kwani kuchomwa makanisa kumeanza leo?Mbona siku zote hawajachochea vurugu?
     
  18. r

    raymg JF-Expert Member

    #18
    Oct 18, 2012
    Joined: Jun 30, 2012
    Messages: 845
    Likes Received: 0
    Trophy Points: 33
    hahahaaa....
     
  19. s

    salmar JF-Expert Member

    #19
    Oct 18, 2012
    Joined: Oct 13, 2012
    Messages: 771
    Likes Received: 81
    Trophy Points: 45
    .
    Hawana lolote hao kesi ipo ma:kamani
     
  20. cacico

    cacico JF-Expert Member

    #20
    Oct 18, 2012
    Joined: Mar 27, 2012
    Messages: 8,308
    Likes Received: 7
    Trophy Points: 135
    hao walikula sacrament, urojo hauwatoshi?? watakuwa wamemiss mapilau ya bure!
     
Loading...