Dismiss Notice
You are browsing this site as a guest. It takes 2 minutes to CREATE AN ACCOUNT and less than 1 minute to LOGIN

Chaguzi ndogo zinavyoiweka ccm uchi

Discussion in 'Jukwaa la Siasa' started by MASEBUNA, Mar 11, 2012.

  1. M

    MASEBUNA JF-Expert Member

    #1
    Mar 11, 2012
    Joined: Oct 9, 2011
    Messages: 243
    Likes Received: 0
    Trophy Points: 0
    KAMA kuna kitu kinachokitesa Chama Cha
    Mapinduzi (CCM) kwa sasa basi kitu hicho ni
    chaguzi ndogo za majimbo. Chaguzi hizo
    zinaivua CCM nguo na kuiweka uchi. Lakini kwa vile chaguzi hizo kwa namna moja
    au nyingine zimeushikilia uhai wa chama
    hicho ndipo kinapojikuta hakina ujanja
    isipokuwa kukubali kuchagua moja kati ya
    mawili. Mosi, kuficha uchi na kukubali kufa kwa
    kuogopa fedheha au kujiweka uchi ili kila
    mmoja ayaone maradhi yanayokisumbua
    chama hicho katika jitihada za kuulinda uhai
    wake. Imesemwa mpaka na makada wakubwa wa
    chama hicho, na inajionyesha wazi kwa kila
    mmoja kwamba makosa yaliyofanyika ndani
    ya CCM yamekiondolea chama hicho mvuto
    kwa wananchi. Kwa kuukubali ukweli huo
    mwenyekiti wa CCM, Rais Jakaya Kikwete, akatangaza mkakati aliodhani ungeweza
    kuurudisha mvuto wa chama kwa wananchi. Akasema ni lazima chama kijivue magamba.
    Mpaka hapo mwenyekiti alikuwa amekiri
    kwamba chama chake kilikuwa nayo matatizo
    makubwa, ambayo yeye aliamua kuyaita
    magamba kwa lugha ya kisanii. Bila shaka Mwenyekiti Kikwete alikuwa na
    imani kwamba kauli hiyo ya kuikiri dosari
    ndani ya chama chake na kuahidi
    kuishughulikia ilitosha kuwarudishia imani
    wananchi kwamba chama hicho sasa ni safi
    hata kabla ya kuuona utekelezaji wa ahadi hiyo. Kwamba wananchi wangekubali
    kumnunua mbuzi kwenye gunia. Ila baadhi yetu tuliichukulia kauli ya JK ya
    kujivua gamba, kama dawa ya kutuliza
    maumivu tu kwa mgonjwa anayesumbuliwa
    na saratani bila kukigusa kiini cha tatizo
    ambacho ni saratani yenyewe. Matatizo yanayotajwa kwenye Chama Cha
    Mapinduzi ambayo yameshamiri na kuanza
    kukitenga chama hicho na wananchi, kama
    vile rushwa, ufisadi wa aina mbalimbali,
    mmomonyoko wa maadili, myeyuko wa
    uzalendo kwa nchi nakadhalina, ni matatizo yaliyokwishageuka saratani. Kwahiyo si rahisi kuyaondoa matatizo hayo
    kwa ahadi tu ya kujivua gamba. Maana
    kawaida ya saratani ni lazima iondoke na
    baadhi ya viungo kama imewahiwa
    kugundulika na kuonyesha dalili za kuponyeka
    na kuunusuru uhai. Wasiwasi nilio nao ni kwamba kitu hicho
    hakijapata ujasiri wa kukimudu ndani ya CCM
    ya sasa. Kwa sasa ni vigumu kutenganisha rushwa na
    CCM. Pamoja na kanuni ya chama hicho
    isemayo rushwa ni adui wa haki, sitatoa wala
    kupokea rushwa, ni mwana CCM gani
    anayeweza kusimama na kujigamba kwamba
    hajawahi kutoa rushwa katika kuhakikisha usalama wa nafasi yake ndani ya chama? Kama hali iko hivyo unawezaje kuifuta rushwa
    ndani ya CCM ukabaki na CCM iliyo hai? Hiyo
    tayari ni saratani ndani ya chama hicho. Chama ambacho kimeikumbatia rushwa na
    kuifanya ndiyo nyenzo kuu ya mafanikio ya
    kila kitu kinawezaje kuwahakikishia wananchi
    ustawi wao huku haki ya kila mmoja ikiwa
    imezingatiwa? Vilevile inaonekana jinsi chama hicho,
    ambacho mwanzoni kilikuwa cha wakulima na
    wafanyakazi tena kikiwategemea haohao
    kujiendesha, kilivyojigeuza mithili ya jini na
    kuwakumbatia mabwanyenye ambao kwa
    sasa ndio nguzo kuu za chama hicho. Sasa unawezaje kuzitishia nguzo hizo halafu
    udai unakitakia mema chama hicho na mtu
    akuelewe? Hiyo ndiyo inayoonyesha kwamba
    kauli ya kujivua gamba ilitolewa kimzaha bila
    kuupima uzito wa ukweli uliokuwa umebebwa
    ndani yake. Kauli kama hiyo ya kujivua gamba ingeweza
    isihojiwe na wananchi kwa kudhani kwamba
    ingeweza kutekelezeka kama dhamira
    ilivyosikika bila kuonekana na ikizingatiwa
    kwamba aliyetoa kauli hiyo ndiye kinara wa
    chama. Lakini bahati mbaya sasa kauli hiyo imeanza
    kuchokonolewa na hizi chaguzi ndogo na
    hivyo kuonekana kwamba kumbe haikuwa na
    uzito wowote. Uchokonozi huo ulianzia Igunga ambako
    mhimili mmoja wa CCM, Rostam Aziz, baada
    ya kusakamwa sana ndani ya chama chake
    hicho akidaiwa kwamba yeye ni gamba
    lililohitajika kuvuliwa, akaamua kujivua
    mwenyewe bila kusubiri kuvuliwa. Wenzake ndani ya chama wakadhani ni
    masihara kwa vile kauli hiyo ililengwa
    kuyatuliza maumivu bila kutibu ugonjwa,
    lakini walikuwa wamechelewa maana mhimili
    huo ulishauvua hata ubunge uliopatikana kwa
    tiketi ya CCM. Hapo ndipo CCM ikalazimika kubaki uchi kwa
    mara ya kwanza, ikayaweka hadharani
    maradhi yanayoisumbua ikiwa imeutilia
    maanani wimbo ulioimbwa na kada maarufu
    wa chama hicho, John Komba, usemao
    kwamba “mwenye kuficha maradhi kwa aibu au kwa kuogopa fedheha ni lazima kilio
    kitamfichua”. Badala ya CCM kufanya sherehe kushangilia
    kwamba gamba moja limeondoka vikaanza
    kufanyika vikao vya kutafuta namna ya
    kumwangukia Rostam ili akubali kuibeba CCM
    ili iweze kulirudisha jimbo hilo kwenye
    himaya yake. Hebu tujiulize, mpaka hapo tunaonaje? Rostam alikuwa gamba kwa chama au mhimili
    wa chama? Badala yake msemaji wa chama
    ambaye muda wote alikuwa amebeba bango la
    magamba ndiye akaonekana mchafu kwa
    chama na kupigwa marufuku asikanyage
    Igunga kukichafua chama katika harakati za kulirudisha jimbo hilo kwenye himaya kikiwa
    mabegani mwa mhimili wake. Kama nilivyosema awali, chaguzi ndogo
    zinaitesa sana CCM kwa kukilazimisha kubaki
    uchi na kuyaanika maradhi yake. Kwa sasa
    kuna uchaguzi mdogo katika jimbo la Arumeru
    Mashariki kufuatia kifo cha mbunge wa jimbo
    hilo, Jeremiah Sumari (CCM). Tumeona mnyukano ulivyokuwa ndani ya
    chama hicho katika kumpata mgombea wake.
    Hapo kuna mambo kadhaa ya kuyaangalia kwa
    makini ili kuona namna uchaguzi mdogo
    unavyoisulubu CCM. Mpambano mkubwa wa kumpata mgombea
    wa CCM ulikuwa kati ya CCM ikiongozwa na
    mwenyekiti, upande mmoja, na Sioi Sumari
    anayesemekana kusimamiwa na kambi ya
    Lowassa kwa upande mwingine. Ikumbukwe
    Lowassa ni mmoja wa makada wa CCM wanaodaiwa kuwa ni magamba. Kwa hiyo kilichofanyika ni Lowassa kutaka
    kuwaonyesha CCM uwezo wake kwa
    kumpitisha mgombea anayemtaka yeye huku
    chama nacho kikiwa kimejipanga kuizuia
    nguvu ya Lowassa. Lakini mwisho wa yote kambi ya Lowassa
    ikaibuka kidedea kuashiria kuwa yeye bado ni
    mhimili ndani ya CCM na wanaomuita gamba
    wakome. Akaibwaga kambi ya CCM
    ikiongozwa na mwenyekiti! Pamoja na ushahidi wa wazi wa kwamba
    ulichezwa mchezo mchafu wa rushwa katika
    kumpitisha Sioi Sumari kwenye kura za maoni,
    bado vikao vya juu vya CCM vimeshindwa
    kuyabatilisha matokeo hayo, kama ilivyokuwa
    ikifanyika miaka ya nyuma. Vimeamua kuyabariki matokeo ya kura za
    maoni licha ya uchafu ulioambatana nayo.
    Hofu ya CCM ni kwamba uamuzi wowote
    ambao ungekwenda kinyume na matokeo
    hayo machafu ungeweza kukionyesha chama
    njia ya kwendea kuzimu. Hayo ni mateso mengine yanayokikabili chama hicho katika
    hizi chaguzi ndogo. Fikiria, kama chama kinaletewa ushahidi wa
    waziwazi kwamba mmoja wa makada wake
    amekiuka maadili ya chama kwa lengo la
    kujinufaisha yeye binafsi huku akiwa
    amekipaka chama matope, lakini chama
    kikashindwa kumchukulia hatua yoyote kwa kuhofia nguvu iliyo nyuma ya mtu husika. Huo utakosaje kuwa uthibitisho kuwa chama
    hakiko tena kwenye misingi ya maadili yake
    bali kimesimama juu ya nguvu za watu fulani
    waliojigeuza mihimili ya chama hicho hata
    kama watu hao ni wachafu kiasi gani? Jambo jingine linaloshangaza ndani ya CCM,
    kama ambavyo tumekuwa tukionyesha mara
    kwa mara, ni la chama hicho kujiendesha
    kifamilia na kikoo mithili ya ufalme badala ya
    kujiendesha kitaasisi. Mbunge aliyekufa wa Arumeru Mashariki ni
    Jeremiah Sumari. Kabla hata maiti yake
    haijaoza kaburini chama kinamteua mtoto
    wake kuirithi nafasi ya baba yake! Nani
    kasema kwamba ukoo wa Sumari ndio pekee
    unaopaswa kutoa mbunge wa Arumeru Mashariki? Mimi naamini kwamba Sumari kaacha mali
    nyingi alizowarithisha wanae, lakini ubunge si
    kati ya mali hizo. Ubunge ni mali ya wana
    jimbo wala haikuwa mali yake. Kwa hiyo wana Arumeru Mashariki ndio
    wanaotakiwa kuelewa mali hiyo wampatie
    nani bila kuangalia anatoka ukoo gani. Ila niwatahadharishe wana Arumeru Mashariki
    kwamba kutoa nafasi hiyo kwa zaidi ya mtu
    mmoja ndani ya familia moja ni kutengeneza
    aina fulani ya ufalme ambapo wananchi
    wengine watakuwa wamejitenga kabisa na
    nafasi hiyo ya uwakilishi wa wananchi. Tukirudi kwenye utata wa maamuzi ya CCM
    tunapata tetesi kwamba mwenyekiti mstaafu,
    Benjamin Mkapa, ndiye kapewa jukumu la
    kuhakikisha chama hicho kinaibuka mshindi
    katika uchaguzi huo mdogo. Lakini ni CCM hiyohiyo ambayo katika
    mkutano wake wa Halmashauri Kuu
    uliofanyika majuzi kule Dodoma, imefikia
    uamuzi wa kuibadili katiba yake ili kuwaondoa
    viongozi wastaafu katika NEC na badala yake
    kuwaundia chombo kingine ambacho bilashaka kitakuwa hakileti vikwazo katika maamuzi
    ambayo wazee hao wasingeyaafiki. Wastaafu wameenguliwa kwenye maamuzi na
    kufanywa washauri. Lakini walio katika
    maamuzi wakisha boronga wazee walio katika
    ushauri waitwe haraka kuokoa jahazi! Pamoja na hiyo ikumbukwe kwamba mng’ao
    wa CCM ulianza kufifia wakati wa uenyekiti wa
    Mkapa. Mkapa ni kiongozi aliyepigiwa debe na
    Baba wa Taifa, Julius Nyerere huku
    akiwashangaa waliokuwa wakiitamani Ikulu
    kiasi cha kutoa hata fedha ili wafanikiwe kuingia. Mwalimu Nyerere aliuliza Ikulu kuna biashara
    gani? Kwamba mtu anayetoa pesa kuingia
    Ikulu atazirudishaje? Ndipo Mwalimu
    alipoonya kwamba Ikulu ni sehemu takatifu, si
    mahali pa kufanyia biashara. Lakini haukupita muda mrefu tangu Mwalimu
    alipotutoka tukapata habari kwamba Rais
    Mkapa kasajili kampuni ya biashara kama
    mjasiriamali aliyekuwa akiishi Ikulu! Mkapa
    akaigeuza Ikulu yetu sehemu ya biashara
    akiwa ameisaliti imani aliyokuwa nayo Baba wa Taifa kwake. Baada ya hapo nguvu ya ushawishi iliyokuwa
    nayo CCM kama ile aliyoitumia Mwalimu
    kuwashawishi wananchi ili wamkubali Mkapa,
    ikaporomoka kwa kishindo na kukiacha chama
    hicho kikitegemea mabavu na shinikizo kwa
    msaada wa vyombo vya dola kufanikisha matakwa yake. Ni katika kipindi hicho cha Mkapa, Tanzania
    kwa mara ya kwanza katika historia ya
    ulimwengu, ikazalisha wakimbizi kufuatia
    mauaji yaliyofanywa na vyombo vya dola
    Unguja na Pemba katika CCM kutafuta ushindi
    kwa mabavu. Kwahiyo ikiwa Mkapa atajitokeza kuifanyia
    kampeni CCM Arumeru Mashariki itabidi
    wananchi wamuulize maswali hayo. Hata
    kama hakutatolewa fursa ya kumuuliza moja
    kwa moja, nina imani hakuna atakayeweza
    kuyazuia maswali hayo yasiulizwe kimoyomoyo. Mkapa aulizwe ni kitu gani kilichosababisha
    uadilifu ndani ya chama chake kumomonyoka
    kiasi cha kumfanya yeye akiwa kiongozi
    mkuu wa chama na kiongozi wa nchi kuamua
    kuigeuza Ikulu yetu, ambayo aliambiwa na
    Mwalimu wake kuwa ni sehemu takatifu, pango la ulanguzi? Aulizwe ulikokwenda ushawishi wa CCM
    ambao nafasi yake imechukuliwa na shinikizo
    la kutumia mabavu kwa vitisho. Maana ni katika kipindi cha Mkapa tulipoanza
    kushuhudia kampeni kama hizo za uchaguzi
    zikiendeshwa kwa mtindo wa kivita kwa
    kutumia vyombo vya dola badala ya
    kuwashindanisha makada wa vyama kumwaga
    sera kwa wananchi. Mkapa pia aulizwe CCM kina uhalali gani wa
    kuendelea kuaminiwa na Watanzania katika
    ujumla wao iwapo wanachama wake
    hawaaminiani tena wala kukiamini chama
    chao? Suala la wana CCM kutishiana maisha kiasi cha
    makada wake wa ngazi za juu kutoleana
    shutuma za kulishana sumu na mambo
    mengine machafu na ya hatari linawezaje
    kukifanya chama hicho kiendelee kuonekana
    ni tegemeo la Watanzania? Aulizwe kwamba CCM imegeuka chama cha
    kifalme? Vinginevyo aeleze inakuwaje chama
    kinajishughulisha na namna mtu atakavyorithi
    nafasi ya baba yake, kitu kinachohamisha
    shughuli za chama, kama taasisi ya ki-nchi, na
    kukifanya chama kionekane kinashughulikia mirathi ambayo inapaswa kuwa shughuli ya
    kifamilia.
     
  2. Losambo

    Losambo JF-Expert Member

    #2
    Mar 11, 2012
    Joined: Nov 8, 2011
    Messages: 2,625
    Likes Received: 8
    Trophy Points: 0
    Ilipofika CCM ni point of no return, inakwenda kuzama na makundi yake na siku yakizama makundi hayo yatabaki kulaumiana tu maana hawajui mchezo wanaoufanya hatma yake ni nini.
     
  3. jogi

    jogi JF-Expert Member

    #3
    Mar 11, 2012
    Joined: Sep 25, 2010
    Messages: 11,107
    Likes Received: 3,654
    Trophy Points: 280
    Masebuna umechambua vizuri sana! wakisoma robo yao watapata shinikizo la damu, chapisho linaweza kutengeneza by election kadhaa!!!
     
  4. M

    Mr.Busta JF-Expert Member

    #4
    Mar 11, 2012
    Joined: Mar 24, 2011
    Messages: 673
    Likes Received: 3
    Trophy Points: 35
    uchambuzi mzuri sana! Big up!
     
  5. Head teacher

    Head teacher JF-Expert Member

    #5
    Mar 11, 2012
    Joined: Mar 10, 2012
    Messages: 1,814
    Likes Received: 2
    Trophy Points: 0
    Ina maana SIOI ndi msimamizi wa mirathi ya baba, wamechemk, rithi mali si madaraka
     
Loading...