Dismiss Notice
You are browsing this site as a guest. It takes 2 minutes to CREATE AN ACCOUNT and less than 1 minute to LOGIN

BAWACHA: nafasi za uongozi wanawake ziongezwe

Discussion in 'Jukwaa la Siasa' started by MASEBUNA, Mar 16, 2012.

  1. M

    MASEBUNA JF-Expert Member

    #1
    Mar 16, 2012
    Joined: Oct 9, 2011
    Messages: 243
    Likes Received: 0
    Trophy Points: 0
    Baraza la Wanawake wa Chama cha
    Demokrasia na Maendeleo (Bawacha),
    limesema fursa za wanawake ngazi
    mbalimbali za uongozi bado ni chache licha ya
    maazimio kadhaa yaliyopitishwa kitaifa na
    kimataifa kuhakikisha kuna kuwa na usawa baina ya wanawake na wanaume. Mwandishi Wetu amezungumza na Katibu
    Mkuu wa Bawacha ambaye pia ni mbunge wa
    viti maalum mkoa wa Mbeya, Naomi Kaihura,
    wakati akizungumzia siku ya wanawake
    duniani ambayo huadhimishwa Machi 8 kila
    mwaka. Naomi anasema dhana hiyo bado ni vigumu
    kufikiwa kwa sababu wanawake na wasichana
    wengi hawajajitokeza kwa wingi kupigania
    nafasi za uongozi licha ya ukweli kwamba
    wengi wanazimudu. Anasema mpaka sasa ni asilimia 30 tu ambayo
    imefikiwa, na kwamba asilimia 20 iliyobakia
    sio kazi rahisi kuifikia endapo hakutakuwepo
    na jitihada za dhati za kupambana na
    vipingamizi vinavyosababisha wanawake
    wasijitokeze katika nafasi hizo. Kaihula anasema elimu, mila na desturi ni
    moja ya sababu kubwa zinazochangia lengo
    hilo lisifikiwe kwani baadhi ya watu bado
    wanafikra potofu kuwa uongozi ni kwa ajili ya
    wanaume. Anaeleza kwamba mpaka sasa baadhi ya
    makabila hapa nchini, bado yanatawaliwa na
    mfumo dume kutokana na misingi mibovu
    iliyojengeka tangu awali, ya kuthamini na
    kumpa kipaumbele mtoto wa kiume kuliko
    mtoto wa kike. Anafafanua kuwa, kuanzia katika ngazi za
    shule za msingi hadi elimu ya juu, watoto wa
    kike wanashindwa kupambana na watoto wa
    kiume katika masomo kutokana na mazingira
    mabovu waliyomo ingawa wakati mwingine
    hujidharau au kukatishwa tamaa na wenzao au mila na desturi walizojengewa nazo tangu
    awali. Anasema kutokana na mila na desturi
    walizolelewa tangu awali, baadhi ya watoto
    wa kike hushindwa kujiamini wakiwa bado
    shuleni, kwamba baadhi ya masomo ni ya
    wavulana wao hawayawezi, na hivyo
    kusababisha kushindwa hata kama walikuwa na uwezo wa kufanya vyema kwenye
    masomo hayo. Anasisitiza kwamba uwezo wa mtu unatokana
    na namna anavyojiamini na kwamba hilo ni
    moja wapo ya kikwazo kinachowafanya
    wanawake washindwe kupambana na
    wanaume hata wanapokuwa wakubwa. Akizungumzia upande wa siasa, anasema
    baadhi ya vyama vya siasa bado vinambagua
    mwanamke kushiriki katika nafasi za juu,
    vikiamnini kwamba labda hawezi kufanya
    vizuri. Anatolea mfano katika nafasi ya urais,
    kwamba karibu vyama vilivyo vingi havitowi
    nafasi hiyo kwa mwanamke kugombea, jambo
    linaloonyesha dhahiri kwamba bado
    mwanamke hajapewa kipaumbele. Kadhalika anasema baadhi ya wanawake
    wanashindwa kupata nafasi kutokana na
    ubinafsi ambao upo kwa wanaume walio
    katika ngazi za juu. Anasema wanaume wengine hasa wale walio
    katika ngazi ya utoaji wa ajira, mara nyingi
    hawatoi ajira kwa wanawake na wakati
    mwingine huwataka wawatumie kimapenzi
    ndiyo wawajiri. “Wanawake wanapata shida sana, kwa sababu
    wakati mwingine wanapotafuta ajira
    hawapewi, hasa pale waajiri wanapokuwa
    wanaume, baadhi yao wanataka mpaka
    wawatumie katika mapenzi eti ndiyo
    wawaajiri, kwa taswira hii ni vigumu kufikia 50 kwa 50”, anasema. Anasema mpaka sasa idadi ya wawakilishi wa
    wanawake katika nyanja mbalimbali za
    uongozi ni chache sana, na kwamba ndio
    sababu kubwa inakwamisha wasipate haki zao
    za msingi. Anaongeza kwamba endapo wataondoa hofu
    na kuanza kupigania ipasavyo nafasi hizo,
    wataunganisha nguvu na kufikisha ipasavyo
    changamoto mbalimbali zinazowakabili. “Bado tunapigania wanawake wengi
    wajitokeze katika nyanja mbalimbali za
    uongozi, ili tuunganishe nguvu ya pamoja
    kupigania haki zetu”. “Hivi unafikiri ni jambo rahisi mtu kupigia
    kelele matatizo yako, kama wewe
    mwenyewe haujayapigia?, hivi ndivyo ilivyo
    kwa wanawake, matatizo yao hayawezi
    kutatuliwa endapo wao wenyewe
    hawatajipigania, na itakuwa rahisi sana kufikisha kero zao sehemu husika endapo wao
    wenyewe watashika nafasi”, anasema. Akizungumzia suala la nafasi ya viti maalum
    anasema, licha ya nafasi hiyo kuwasaidia
    wanawake kuonyesha uwezo wao katika
    nyanja ya uongozi, lakini baadhi ya wananchi
    wameanza kubeza nafasi hiyo na kutaka
    iondolewe. Anasema inasikitisha kuona baadhi ya
    wananchi wanabeza nafasi hizo, huku
    wakisahau kwamba ndiyo nafasi ambayo
    imesaidia kuonyesha uwezo wa mwanamke,
    na hata kuchangia wanawake wengi kuanza
    kujitokeza katika nafasi mbalimbali za uongozi na kutetea haki zao. “ Viti maalum ni nafasi pekee ambayo
    imetusaidia wanawake kufikia hapa tulipo,
    kwa kupigania na kuyapigia kelele matatizo
    yaliyokuwa yanatukabili, mbali na hilo pia
    tunafanya kazi nyingi sana huko mikoani. Anaongeza kwamba, kuweka wabunge wa viti
    maalumu ilikuwa ni chachu ya kuwapa nafasi
    ya kuonyesha uwezo wao, hasa baada ya
    kuonekana wamekandamizwa sana na mila na
    desturi za mfumo dume, na kwamba nafasi
    hiyo ndiyo imesaidia katika kumkomboa mwanamke na kuonekana anaweza. Anawata wananchi kuacha kubeza nafasi ya
    viti maalum kwani ndiyo, imechangia
    kuonyesha uwezo wa mwanamke na
    kusisitizia kwamba sio kweli kwamba
    wabunge wa viti maalum hawafanyi kazi. Pia anaiomba serikali, taasisi za kiserikali na
    zisizo za kiserikali kuendelea kupigia kelele
    mifumo kandamizi kwa wanawake ili
    ibomolewe kabisa. Kwa upande wake, Victor Kimesera, ambaye
    ni Katibu Mtndaji wa Chama cha Demokrasia
    na Maendeleo (Chadema), anasema
    mwanamke ni msingi mkubwa wa maendeleo,
    hivyo anatakiwa kuthaminiwa. Anasema kati ya viongozi ambao ni waaminifu
    wanaposhika uongozi ni wanawake, na ndio
    maana baadhi ya vyama vinapohitaji
    mafanikio katika vyama vyao hutumia sera ya
    kutatua matatizo ya wanawake. Haki ya wanawake ya kushiriki katika maisha
    ya kisiasa pia imesisitizwa katika mikataba
    kadhaa ya kimataifa, lakini kuibadirisha haki
    hiyo kutoka katika maandiko hadi kwenye
    vitendo kunahitaji jitihada zaidi miongoni mwa
    wahusika. Kulingana na ripoti mpya ya utafiti
    iliyochapishwa kwa ushirikiano wa Shirika la
    Mpango wa Maendeleo la Umoja wa Mataifa –
    UNDP na Taasisi ya Taifa ya Demokrasia kwa
    Masuala ya Kimataifa, ni kwamba ijapokuwa
    asilimia 40 hadi 50 ya wanachama wa vyama vya kisiasa kote ulimwenguni ni wanawake,
    asilimia 10 pekee ndio inashikilia nyadhifa za
    uongozi. Msimamizi wa UNDP Helen Clark, anasema
    kuwa huku kukiwa na chini ya asilimia 20 ya
    viti vya bunge ulimwenguni vinavyokaliwa na
    wanawake, ni wazi kwamba vyama vya
    kisiasa vinahitaji kupiga hatua zaidi na
    vinahitaji kusaidiwa katika juhudi hizo, za kuwasaidia wanawake katika kujiimarisha
    kisiasa. Mkurugenzi wa Kikundi cha Jinsia cha Shirika
    la UNDP Winnie Byanyima, anasema ikiwa
    tunataka kueneza demokrasia na kuwapa
    uwezo wanawake kisiasa, ni sharti tushirikiane
    na vyama vya kisiasa na ikiwa wanawake
    hawapewi uongozi wa vyama vya kisiasa, basi hawawezi kuziongoza serikali. Utafiti wa kimataifa unasema, idadi ya
    mawaziri wanawake serikalini ni asilimia 16
    tu, huku idadi ya viongozi wanawake wa nchi
    na serikali bado iko chini, na kwamba idadi
    hiyo imepungua katika miaka ya hivi karibuni
    hadi kufikia asilimia 5 mwaka 2011. Utafiti huo unasema idadi hiyo ya chini
    imeendelea kushuhudiwa katika miongo
    mitatu iliyopita ya uhamasisho na juhudi za
    jamii ya kimataifa kuangamiza ubaguzi na
    kuwapa uwezo wanawake. Aidha, Umoja wa Mataifa ulitambua umuhimu
    wa wanawake katika maendeleo na kuamua
    kuwapa uwezo kama mojawapo ya malengo
    manane ya Maendeleo ya Milenia wa mwaka
    2000. Hata hivyo, kwa mujibu wa utafiti huo,
    hakuna eneo lolote ulimwenguni ambalo liko
    katika harakati za kufikia asilimia 30 ya
    wanawake katika nafasi za kufanya maamuzi,
    japokuwa kuna maeneo yanayojaribu
    kujidhatiti na kutimiza lengo hilo. Kutokana na takwimu za hivi karibuni za
    Chama cha Kimataifa cha Wabunge IPU na
    Wanawake wa Umoja wa Mataifa, idadi ya
    wanawake viongozi wa nchi na serikali ni 18
    tu, kutoka katika nchi 193. Utafiti huo wa UNDP na NDI unataja baadhi ya
    mikakati inayoweza kutumiwa wakati wa
    uchaguzi, kama vile kuwapa mafunzo na
    kuwahimiza wagombea wa kike kwa
    kuhakikisha wanajitokeza kwa wingi katika
    kampeni. Shirika la NDI linasema linajitahidi kufanya
    kazi na zaidi ya vyama 720 vya kisiasa,
    mashirika na nchi zaidi ya 80, ili kuweka
    mazingira bora na ya wazi ambapo wanaume
    na wanawake wanaweza kushiriki kikamilifu
    katika mchakato wa demokrasia. Shirika hilo linasema, kabla ya uchaguzi, usajili
    na uteuzi wa wagombea ni muhimu
    kuhakikisha kuwa wanawake wanashirikishwa
    ipasavyo katika siasa.
     
Loading...