Dismiss Notice
You are browsing this site as a guest. It takes 2 minutes to CREATE AN ACCOUNT and less than 1 minute to LOGIN

Barack OBAMA

Discussion in 'Jukwaa la Lugha' started by Choveki, Oct 6, 2008.

  1. C

    Choveki JF-Expert Member

    #1
    Oct 6, 2008
    Joined: Apr 16, 2006
    Messages: 448
    Likes Received: 8
    Trophy Points: 35
    Obama

    Barack mwana Obama, ushindi nakutakia
    Na pia uwe salama, hilo nasisitizia
    Najua si lelemama, kwa Mungu nakuombea
    Ushindi twakutakia, Barack mwana Obama

    Ushinde hiyo Novemba, wabaki wakishangaa
    Uingie kwenye nyumba, nyeupe ukipepea
    Najua utaukumba, ushindi kuunyakua
    Ushindi twakutakia, Barack mwana Obama

    Walianza kukuponda, pia kukupakazia
    Wajua utawaponda, novemba ikifikia
    Utayaona matunda, ya uungwana sikia
    Ushindi twakutakia, Barack mwana Obama

    Tunajua mwana kwetu, novemba ni kidedea
    Wakati huu ni wetu, ni nani wakubishia?
    Twaomba hata kikwetu, kilugha kukuombea
    Ushindi twakutakia, Barack mwana Obama

    Ni kheri pia fanaka, ambayo nakutakia
    Neema kuongezeka, Ikulu ukihamia
    Ukuu ni kutukuka, ongoza kinadharia
    Ushindi twakutakia, Barack mwana Obama

    Chini waanguke puu!, udenda kuwatokea
    Wajue wewe ni juu, ushindi kuunyakua
    Wakati wako ni huu, wa kwako kujishindia
    Ushindi twakutakia, Barack mwana Obama

    Ngoma tutacheza sana, huku tuki chekelea
    Pia tutashimakana, hatamu ukishikia
    Cheo wasema dhamana, nawe uje kumbukia
    Ushindi twakutakia, Barack mwana Obama

    Mcheza kwao hutuzwa, nami nakukumbushia
    Kweli huwezi puuzwa, dunia yakupendea
    Kura zisije kuuzwa, macho uje fungulia
    Ushindi twakutakia, Barack mwana Obama

    Obama sasa kwaheri, mwisho ninapoishia
    Ngunguru sema ngangari!, toto wakijatishia
    Uwaondoe kiburi, pia wanavyoringia!
    Ushindi twakutakia, Barack mwana Obama


    Choveki.
     
  2. C

    Choveki JF-Expert Member

    #2
    Oct 29, 2012
    Joined: Apr 16, 2006
    Messages: 448
    Likes Received: 8
    Trophy Points: 35


    Mpendwa Barack,


    Narudi tena Obama, ushindi kukutakia
    Ingawa kuna lawama, kwa mengi sijaridhia

    Nakutakia salama, ushindi kukufikia

    Ushindi nakutakia, nasema bwana Obama


    Ningali natumaini, ukweli umejulia

    Umejua akilini, ambapo ulipotea

    Moyoni pia kichwani, ni wapi umekosea

    Ushindi nakutakia, nasema bwana Obama


    Umechemsha kwa mengi, na hilo nakumbushia

    Ukasahau misingi, iliyo jenga Dunia

    Kujifanya bwana bigi, ubabe ukitumia

    Ushindi nakutakia, nasema bwana Obama


    Ongeza pia busara, sikia kaka sikia

    Punguza zalo hasira, busara zitakujia
    Hasira pia hasara, wahenga weshasemea

    Ushindi nakutakia, nasema bwana Obama


    Ushinde hiki kimbembe, ni mimi nakuombea

    Vishinde vyao vijembe, wabaki wakishangaa

    Uvunje pia na pembe, za tembo na yake pua

    Ushindi nakutakia, nasema bwana Obama


    Wakate vyao viburi, wabaki wakiduwaa

    Wajue nawe ngangari, halafu hujachokea

    Ushinde tena vizuri, wabaki wakiumia

    Ushindi nakutakia, Barack mwana Obama


    Hapa nasema tamati, kwa heri ndugu sikia

    Naaga pia umati, tuzidi kumuombea

    Ushindi uwe thabiti, na tena uso na doa

    Ushindi nakutakia, Barack mwana Obama



    Wakatabahu waraka,

    Choveki,

    Mtaani,
    Jamii Forum. Octoba, 2012
     
Loading...